MATTHEW 23 - DARA GADAIN N.T. with PSA and PRO (BSI)

Slingriyahrao ode Pharisairao phrang sibringba

¹ Jisu subung buthu khe ar jar ni yaohon rikphayarao khe bo grao thi ba,

² Dara Slingyarao ode Pharisairao de Moses ni khamthan ha bonsi kham re.

³ Odebani, bonsi nisi khe dangma saniyaba si khe mani hi dangpha lang lah; thikhabo, bonsi jang khusi da dang pha lai. Bede thikhade bonsi thiba de khuh jang thi du, thikhabo bonsi khusi dangya.

⁴ Bonsi bubain risi slam hi, subung buthu ne bonsi nepha re, thikhabo bonsi de jar ni yaopha jang dopha ma nangjaoya.

⁵ Khrip bonsi khusi dangyaba buthu khe subung khe phnu mane bonsi dang re. Bonsi khadu buthu ode honyaba buthu khe gede khlai rihi bonsi ni rih ni bergong khe logalai ri re.

⁶ Mel phaiyaba ha hathan hamba buthu ar bojom jayaba noh ha khamthan hamba buthu,

⁷ hathai buthu ha malai jang khlimjao hi, Rabbi thijaoba khe bonsi nangjao re.

⁸ Thikhabo, nisi de Rabbi thi hi da longjao; nisi ni slingriyasa de saosi se ning, nisi khrip bo daphlung gaja se.

⁹ Phirthi sao ha saosi khebo jar ni bupha da thi; nisi ni Bupha de saosi se ning, sorgo ha dongyaba.

¹⁰ Hojarao thihibo nisi da longjao; bede thikhade nisi ni hoja saosi se ning, bo de Krista.

¹¹ Sere nisi ni bising ha dedaothaoyaba de bo nisi ni dangyasa ja ma se.

¹² Sere jar khe dedao du, bode khasi rijao ma se; sere jar khe khasi ri la du, bo de gede khlaijao ma se.

Jisu Pharisairao khe siji ba

¹³ Nisi Dara khe slingriyaba ode Pharisai giriklaiyarao, nisi ni bubain risi bi. Sorgo raji ni lama khe nisi subung buthu ni khlai hi phrao du; nisi bo hapya, malai hapginyarao khebo nisi hap riya.

¹⁴ Nisi Dara khe slingriyaba ode Pharisai giriklaiyarao, nisi ni bubain risi bi. Bede thikhade, nisi banjikrao ni rang khe jithar hi, subung khe thokhi mane khlai hi budu galao nisi bi du; odebani nisi gabang gajai maidao ma se.

¹⁵ Nisi Dara khe slingriyaba ode Pharisai giriklaiyarao, nisi ni bubain risi bi! Subung hamya slam mane khlai hi sagor ha ode hakhong ha nisi daobai re, ode olei ning hamya ja khade bokhe nisi thane phantha gin bangdao hi saja thani norok ni basa ha nisi slam re.

¹⁶ Nisi muthai gana hojarao, sere Madai ni bikhoh khe lahi smai dangyaba de musibo niya, thikhabo sere Madai khoh ni gajao khe lahi smai dang re thikhade bode khajao ma se, thihi thiyaba slingriyarao ni bubain risi bi!

¹⁷ O gibir subung ar muthai ganarao, beleyaba dedao, bo gajao, na Madai ni bikhoh ni gajao khe gathar khlaiyaba?

¹⁸ Sere khapra khe lahi smai dang khade musibo ja nang niya; thikhabo sere khapra ni basao ha dengyaba khe lahi smai dang khade, bo khajao ma se, thihi nisi sling ri re.

¹⁹ Nisi ni muthai bislei gana ja kha. Bo beleyaba dedao, khapra ha jinis riyaba na khapra ha jinis gathar khlaiyaba?

²⁰ Odebani, sere khapra khe lahi smai dang du, bonsi khapra jang boni basao ha khrip jinis dongyaba khe lahi smai dang ba se.

²¹ Sere Madai ni bikhoh khe lahi smai dang du, bonsi Madai ni bikhoh jang boni bising ha dongyaba khe lahi smai dang ba se.

²² Sere sorgo khe lahi smai dang du, bonsi Madai ni khamthan jang boni basao ha khamyaba khe lahi smai dang ba se.

²³ Nisi Dara khe Slingriyaba ode Pharisai giriklaiyarao, nisi ni bubain risi bi! Pudina, muri, jira ni phantha jhi ha phantha si nisi ri du, thikhabo nisi nang daothaoyaba grao buthu hamjaoma, khasaoma, ode lonma khe nisi dangkhlai re, gibin khe dangya hi bo buthu khe se dangma nang ba thihi nisi bao lah.

²⁴ O muthai ganarao, thampi khe sagi hi mihhajeng khe moloyarao,

²⁵ Nisi Dara khe slingriyaba ode Pharisai giriklaiyarao, nisi ni bubain risi bi. Bela jang khopra khe baji gede susa du; thikhabo, boni bising hade hamyayaba ar huikhaoyaba jang nisi gablai du.

²⁶ Ning Pharisai, muthai ganarao, bela jang khopra khe baji gede bo ragao phu mane khlai hi bising gede susa da lah, odese ragao phu ma.

²⁷ “Dara khe slingriyaba ode Pharisai giriklaiyarao, nisi ni bubain risi bi! Mangkhlong majangba, baji gede majang sisi nu du, thikhabo boni bising hade manggreng buthu jang khrip jabai jang gablaiba lai se, thihi nisi mithiya.

²⁸ Nisibo olei jasosi ning baji gede subung ni muh hade hamba jahi nisi nujao re; thikhabo, bising hade giriklaiyaba ode hamya phap jang nisi gablai du.”

Jisu bonsi ni saja khe thiphla du

²⁹ Nisi Dara khe slingriyaba ode Pharisai giriklaiyarao, nisi ni bubain risi bi! Gorasali ni mangkhlong buthu khe nisi dang du, subung hamba buthu ni mangkhlong buthu khebo nisi lali ri du,

³⁰ Jini buju ni sao ni phrang bonsi jing jang dongpha khade gorasalirao khe sthaiba ha jing gabaya kha mu thihi nisi thi re.

³¹ Odebani, gorasalirao khe sthaiyaba ni basa se thihi nisi ning sakhi ri la du.

³² Ning jar ni bupha bujurao ni phap suyaba khe gablai ri lah.

³³ O jbu buthu, jbu ni basa buthu, nisi norok ni saja ni phrang bede go ma?

³⁴ Nai lah, nisi niha gorasalirao subung gyanirao, slingriyarao khe ang haiha du; bonsi sthai hi kross ha dikpha ri ma, sereba khe longjomkhoh buthu ha migur ni wadu jang nisi su ma, ode masi nogor ni phrang gibin nogor ha rikkhlai ma.

³⁵ Odebani, Abel dormo subung ni thijao ni phrang Madai ni bikhoh ode khapra ni gejer ha Baraki ni basa Zakari khe nisi sthaiba sosi ha, phirthi sao ha dormo subung ni thijao baigoyaba khrip nisi ni basao ha sophai ma se.

³⁶ Gibi jang ang nisi khe thidu, ebo buthu khrip duha ni jug ni subung buthu ni basao ha sophai ma se.

Jerusalem ni khlai hi graba

³⁷ O Jerusalem, Jerusalem! Gorasalirao khe sthaiyaba, nini ha haihayaba buthu khe longthai jang lemthaiyaba, daoma jar ni basathu khe bagrang bakhla ha gorophung ba lai angbo nini basathu khe gorophung ma bao ba; thikhabo, nisi la nangjaoya!

³⁸ Nai lah, nisi ni noh khebo khongja nisi ne galang kha.

³⁹ Ang nisi khe thidu, Gabra ni bumu jang phaiyaba de bakhan ja thing, nisi thiyasi de duha ni phrang de ang khe nisi nu nang niya kha.