MATTHEW 12 - DARA GADAIN N.T. with PSA and PRO (BSI)

Lenggo basain ni slingrithai

¹ Bo bubli ha Jisu lenggo basain ha hadi ni mailing khe lailang ba. Boni yaohon rikphayarao hukhri jao hi maiding buthu khe saso hi bonsi ji ba.

² Boha Pharisairao Jisu khe nuhi bokhe thi ba, Nai lah, nini yaohon rikphayarao lenggo basain ha dang thaoyayaba khe bonsi dang du,

³ Boha bo bonsi khe thi ba, Boni lugurao hukhri jaoba ha David khusi dangyaba khe nisi phuriya?

⁴ Jithaoyayaba hon khapra ha dengyaba khe bo jang boni lugurao Madai khoh ha hap hi jiba, bo hon kha la Jonthaimarao se ning jiphu ba.

⁵ Thikhala, Madai ni bikhoh ha jonthai dongyarao lenggo basain ha bonsi bojom jahi rege rege khlai la khabo gajai jaya thihi Dara ni grao ha nisi phuriya na?

⁶ Asaba ja thing, Madai ni bikhoh tha dedaoyaba eraha dong thi hi ang nisi khe thi du.

⁷ Thikhabo, Bandai khe nangjaoya hi khasaoma khe se ang nangjao ba, thiyaba ni ortho khe mithi khade subung ringyaraobo nisi khe gajai ri nang niya mu!

⁸ Marsi ni Basa de lenggo basain nibo Gabra se.

Yao adur khe ham riba

⁹ Jisu oraha ni phrang thang hi bonsi ni bikhoh ni noh ha hapsing ba.

¹⁰ Boha, subung saosi yao adur jayaba dong ba. Jisu khe gajai rima baoyaraobo dong ba, bonsi Jisu ni basao ha gajai ri mane khlai hi, Lenggo basain ha ham riba jadu na jaya? thi hi bo khe sing ba.

¹¹ Jisu bonsi khe thiphin ba, “Nisi ni bising ha sere ni melma masi mang mang dongyaba, bo ning lenggo basain ha hakhor ha galaising kha la, sere khaikhoya ma?

¹² Melma masi thane, subung saosi la gabang muilo jadao thi! Odebani lenggo basain ha hamba khusi dangba de gathar se.”

¹³ Boha ning bo subung khe, Nini yao khe sugu lah, thi hi thi ba. Odehe, boni yao sugu ba, ode boni yao gongsi lai ning ham lang la kha.

¹⁴ Odebani Parisairao baji ha baigo hi bokhe sthai mane khlai hi bonsi sainlai ba.

Saikhu jaoyaba leng

¹⁵ Jisu ebo grao khe khna hi oraha ni phrang bo thangla kha. Gabang subung boni yaohon rikpha ba, ode khrip khebo bo ham thar ri ba.

¹⁶ Boni graojma khe gublung riya mane bo magna ba.

¹⁷ Ebo grao buthu khe gorasali Isai thi langyaba phura gibi jaso ba:

¹⁸ Nai lah, ani leng, ang saikhuyaba, Ang hamjao daothao ani khasu ha bokhe gabang khaja du; Boni basao ha ani bese khe ang deng nang, Odehe, Jentailrao ni grao khe bo thi ma se.

¹⁹ Niya nang niya, jirikkhao bo jirikkhao nang niya, Khorong daoglap buthu ha saosi nebo khurang khna nang niya.

²⁰ Bisar de mane haihaya side Dobung baila bo jagao nang niya Khun khamya bani waikhudi bo sthai nang niya.

²¹ Odese, boni bumu ha Jentailrao bo asa mai ma.

Jisu jang Beelzebub

²² Bo bubli ha subung saosi muthai gana, grao jophuyayaba, sgainjik gajaoyaba boni ha bonsi labu ba. Ode bokhe bo ham rihi boha ning grao jophu kha, ode muthai gana bo muthai nu lang la kha.

²³ Khrip subung buthu bo hamsi ning gmang lai ba, Ebo subung la David ni basa niya na? bonsi thi hi sing lai ba.

²⁴ Pharisairao bo grao khe khna hi, Ebo subung la sgain madai ni raja Beelzebub ni khlai hi niyakha de sgain madai khe rik khlai phu nang niya, thihi bonsi thi lai ba.

²⁵ Jisu bonsi ni baothai buthu khe tharmai hi bonsi niha thiba, Asaba raji habo jar jang jar nanglai khade bonsi jam re. Asaba nogor ja thing, ar nokhorsi habo ja thing, jar jang jar nanglai khade songkhu phu nang niya.

²⁶ Soithan Soithan khe rikhun lai kha la, jar jang jar nanglai ba se. Boni raji la bede songkhu phu ma?

²⁷ Ang Beelzebub ni juruma jang se Soithan khe rikhun ba thikhala, nini subung buthu la sere ni juruma jang rikhun ba? Odebani, bonsi ning nini khlai hi bisar khlaiyaba jama se.

²⁸ Ang Madai ni bese ni juruma jang se sgain madai buthu khe rik hunba se thikhade Madai ni raji nisi niha sophai kha.

²⁹ Bede thikhala asaba subung bol raoyaba khe srap khadaya kha la, subung bol raoyaba ni noh ha hap hi boni rang khe bede la la phu ma? Kha bani yaohon ha se boni noh ni rang khe lang la phu ma.

³⁰ Sere ani gede gabaya, bo ang jang nanglaiba se, odehe sere ang jang bojom khlaiphaya, bo saidra ba se.

³¹ Ang nisi khe thi du, subung ni khrip jadi phap ode Madai khe sijiyaba bo map mai nang. Thikhabo Bese Gathar khe sijiyaba de map mai nang niya.

³² Sere Marsi ni Basa khe sijidu, boni sijima de map mai nang. Thikhabo Bese Gathar khe sijiyaba de thanghi dongba habo, ar phaiginyaba bubli habo map mai nang niya.

Bongphang jang boni bathai

³³ Bongphang ham kha de, boni bathai bo hambi, bongphang hamya khade, boni bathai bo hamya nisi thi re, bongphang de boni bathai ha tharmai du.

³⁴ Nisi jbu ni greng buthu, nisi hamya hi ning, nisi bede hamba grao thi phu ma? Khah ha gablaiyaba khe se khuh jang thiba thi.

³⁵ Subung hamba de jar ni khah khoh ni hamba ni phrang grao hamba buthu khe khaikho re. Subung hamya de jar ni khah khoh ni hamya ni phrang hamya grao buthu khe khaikho re.

³⁶ Odehe, ang nisi khe thi du, nisi bislei hamya grao thidu khrip bisar ni basain hade bo buthu khe hisap rima nangma se.

³⁷ Ning jar ni grao ha ning gajai jaya ma se, ning jar ni grao ha ning gajai ha galai ri jao ma se, ning mithiya? ode bo thi ba.

Shin phnu ri mane khainsuba

³⁸ Bo bubli ha Dara slingriyarao ode sereba Pharisairao ni bising ni subung, bonsi boni ha thi ba, Gedeba, nini phrang jing shin numa nangjao du.

³⁹ Jisu bonsi khe thiphin ba, Ebo jug ha bislei hamyayarao ode gaorirao se oleiyaba shin khe smai ba. Thikhabo gorasali Jona ni shin khe garhi de bonsi niha musi shin khebo ri nang niya kha.

⁴⁰ Jona nokha saintham hortham nahyung ni bohoh bising ha dongba lai, Marsi ni Basa bo nokha saintham hortham hakhor bising ha dong ma.

⁴¹ Ninevi nogor ni subung buthu bisar ni basain ha duha ni jug ni subung buthu jang baosi song ri nang, odehe, nisi khe bonsi gajai rijao ma se; Jona grao sainthi bani bonsi khah phin ba. Jona thabo dedaoyaba eraha dong thi hi nisi mithi lah.

⁴² Sainkharti yaoda ni rani bisar ni basain ha duha ni jug ni subung buthu jang baija hi bonsi khe gajai ha galai ri ma se; bede thikhade Solomon ni girikma khe khna mane khlai hi mulug jamthaoba ni phrang phai du. Nai lah, Solomon tha dedaoyaba eraha dong thi hi nisi tharmai lah.

Bese gusu phaiphin ba

⁴³ Jekhali sgain madai gusu subung ni bising ni phrang baigo hi dig riyaba hathan ha lenggo than smai ba, thikhabo maiya.

⁴⁴ Odehe, Ang braha ni phrang baigoba bo noh ha ning ang thang phin la nang, ode bo thiba. Odese, bo thangphin hi sohi da da, khongja khlai hi, ragao sisi salai hi deng ba khe bo nuhi kha.

⁴⁵ Boha ning bo thanghi jar tha hamya daoyaba sgain madai sni khe langpha hi, oraha ning bonsi hapsing hi dong song ba, ode bo subung ni dongthai de sagang ni dongthai tha bo hamyadao kha. Olei jasosi ning duha ni jug ni subung buthu ni basao habo ja ma se, thi hi Jisu thiphin ba.

Jisu ni buma jang daphlungrao

⁴⁶ Jisu subung buthu niha grao thisaiba ha, boni buma jang boni daphlungrao bo jang sain laima bao hi baji ha song hi dong ba.

⁴⁷ Subung saosi Jisu khe thi ba, Nini buma jang nini daphlungrao ning jang sain lai ma bao hi baji ha song hi ning dong.

⁴⁸ Thikhabo, sainthiyaba khe Jisu thi ba, Ani buma sere? Ani daphlungrao bo sere?

⁴⁹ Odese, bo slingriyarao ni gede yao sugu hi thiba, Nai lah, ani buma jang ani daphlungrao khe!

⁵⁰ Sere ani Bupha sorgo ha dongyaba nangjaoba lai dangyaba de ani daphlung jang ani bahandao ode ani buma se.