MATTHEW 10 - DARA GADAIN N.T. with PSA and PRO (BSI)

Rikphayarao Jhigin

¹ Jisu boni rikphayarao khe long hi bonsi rikhlai mane khlai hi sgain madai ni basao bo hukhum ri ba; ode, khrip limthai-sathai ham riphu mane khlai hibo bo hukhum ri ba.

² Boni rikphayarao jhigin ni bumu edehe-sagangthao ha Simon, Peter thiyaba, ode boni buphlung Andri, Zebedai ni basa Jakob, ode boni daphlung Johan,

³ Philip jang Bartholomai, Thoma jang khajna khrangyaba Matthew, Alphai-ni basa Jakob jang Thaddai,

⁴ Kanaan ni subung Simon ar bokhe rem riyaba Juda Iskariot ning ja kha.

Jhigin ni khusi dangyaba

⁵ Bonsi jhigin niha Jisu grao rihi bonsi khe haiha ba, Jentailrao ni lama ha da thang, Samari buthu ni musi nolei habo da hap lah;

⁶ Thikhabo, Israel jadi ni melma gmayarao niha se thang lah.

⁷ Nisi thanghi sorgo raji de sampha kha thi hi sainthi phalang lah.

⁸ Limyarao khe ham ri lah, githirao khe mathang phin lah, khunthi jayarao khe ragao ri lah, sgainjik khe rikhun lah, nisi magna mai ba, magna ri lah.

⁹ Nisi ni jengkhong khayaba buthu ha gajao, guphu, rang, rang bagrai musibo da lang pha.

¹⁰ Mophosol thang mane khlai hi juli ja thing, sola grang gin ja thing, jutha ja thing, goda ja thing, musi khe bo nisi da lang pha. Khusi dangyaba ni khlai hi de mai jimani hok se.

¹¹ Odehe, nogor gedeba ha ja thing, khasiba ha ja thing, nisi hapsingyaba si ha, nisi khe noh mathao riginyaba khe smai lah, ode, nisi baigo phinya side oraha ning dong lah.

¹² Noh ha nisi hapsing hi Nisi niha santi dong thing thi lah.

¹³ Bo noh ni subung buthu nisi khe noh mathao ri du thikha de, nisi ni hamthai ni grao bonsi ni basao ha sohi thing; thikhabo, nisi khe lamjaoya thikhade, nisi ni hamthai ni grao de nisi ni basao ha ning phaiphin la thing.

¹⁴ Odehe, saosibo nisi khe lamjaoya, ar nisi ni grao khebo khnaya thikhade, bo noh ni phrang baigo hi nisi ni igah ni haduri khe thisa lah.

¹⁵ Gibi jang nisi khe thi du, wainso bani basain hade bo nogor buthu thane de Sodom jang Gomorra nogor ni dukhu jayadao nang kho.

Dukhu sophai ginyaba

¹⁶ Nai lah, rasa buthu ni gejer ha melma dongba lai ang nisi khe haiha du; Odebani, jbu lai girik hi daothu lai maigru gru dong lah.

¹⁷ Subung ni bising hade girik lah. Bonsi ni bisardarrao nisi khe rem rima, ode, bikhoh ni noh buthu ha nisi khe doma-suma se.

¹⁸ Bisardarrao ar rajarao ni sagang ha bonsi ni basao ha, ode Jentailrao ni basao ha sakhi jamani, ani khlai hi bonsi nisi khe lang la ma se.

¹⁹ Thikhabo bonsi nisikhe rem ri lakhabo, bede ja ma, snadi grao khe ang thi ma? thihi khah waimu da nang; nisi grao thima ne khlai hi de bubli ha nisi khe bese jang tharmai ri nang.

²⁰ Boha grao thiginyaba de nisi ja nang niya, nisi ni Bupha ni bese nisi niha grao thiyaba se grao thi ma.

²¹ Sthai mane khlai hi daphlung jar jang jar rem ri lai ma, buphabo jar ni basa khe rem ri ma, basathubo jar ni buma-buphathu jang nam jalai ma, ode sthai rima se.

²² Ani bumu ni khlai hi khrip subung jang nisi naisle jao ma, thikhabo jamthaoba sosi sere dukhu khah lao du bo se ning sogo jao ma.

²³ Masi nogor ha nisi khe dukhu rikha de, nogor gibin ha khailang lah; gibi jang ang nisi khe thi du, Marsi ni Basa phai mani sagang ha de Israel ni khrip nogor buthu ha thang thar phu nang niya.

²⁴ Slingyaba jar ni slingriyaba thane dedaoya, lengbo jar ni bubra thane dedaoya.

²⁵ Slingyaba de slingriyaba lai dong khade santi ja thing, ode lengbo jar ni bubra lai dong kha ning ja kha. Noh ni bubra khe ning Beelzebul bonsi thi khala, boni noh ni subung buthu khe la bislei thi nang.

Khinma nangyaba

²⁶ Odese, subung khe da khin. Nujaoya mane khlai hi huiyaba musibo giri, tharmaiya mane hui khaoyababo musibo giri.

²⁷ Andar ha ang ning khe thiyaba khe ning jnayaba ha thi lah, ar khmao jang nisi khnayaba bokhe nokhim sao ha gahi baikhla lah.

²⁸ Saomang khe sthai hi bese khe sthai phuyayaba khe da khin. Thikhabo, norok ha bese jang saomang sthai phuyaba khe khin lah.

²⁹ Daophersi magin khe phaisa masi jang phainya? Thikhabo, bonsi ni bising ha nisi ni bupha nangjaoya kha de masi jahi bo hah ha galai nang niya.

³⁰ Nisi ni khnai rim sosi khebo sainso thar du thi hi tharmai lah.

³¹ Odebani, da khin, daophersi gabang thanebo nisi muilo jadao.

Maniyaba ar maniyayaba

³² Asaba subung buthu ni sagang ha angkhe mani du thikhade, angbo ani bupha, sorgo ha dongyaba ni sagang ha bokhe mani ma se.

³³ Thikhabo, sere subung buthu ni sagang ha angkhe nangjaoya ja re, angbo ani bupha, sorgo ha dongyaba ni sagang ha bo khe nangjaoya jama se.

Santi niya hi seng dao riba

³⁴ Habsao ha milima dao ri mane khlai hi ang khe phai ba da bao; milima dao ri mane khlai hi ang phaiya. Seng bai ri mane se ang phai ba.

³⁵ Subung bupha jang basa khe, bisik jang buma khe, bahamjik jang busuma khe nam jalai rimane ang phai ba thi hi nisi tharmai lah.

³⁶ Subung jar ni nokhor bising ha ning sotru jama se.

³⁷ Sere anthane jar ni buma bupha khe khasaodao, bo ani subung ja phuya; anthane sere jar ni basa-bisik khe khasaodao bo ani subung ja phuya.

³⁸ Sere jar ni kross khe bain hi ani yaohon rikphaya, bo ani subung ja phuya.

³⁹ Sere ani khlai hi hayu sjam re, bo hayu mai ma se; sere jar ni hayu khe sogo re, bo gma ma se.

Yaosandi

⁴⁰ Sere nisi khe lamjao du, bo angkhe se lamjao ba. Sere angkhe lamjao du, bo angkhe haihayaba khe se lamjao ba.

⁴¹ Sere gorasali khe gorasali sebani lamjao du, gorasali ni yaosandi mai ma se. Sere subung dormo khe dormo subung sebani lamjao du, bo dormo subung ni yaosandi mai ma se.

⁴² Odehe, sere ebo subung khasi daothao ni bising ha saosi niha ani yaohon rikphayasa tharmai hi disain bela si thikhabo dih lingma rikha de, gibi jang ning khe ang thi du, boni yaosandi de gmathaoya, bo thi ba.