MARKA 6 - DARA GADAIN N.T. with PSA and PRO (BSI)

Jisu khe Nazareth ha hamjaoya kha

¹ Jisu oraha ni phrang, boni yaohon rikphayarao jang, boni nolei ha thangphin ba.

² Lenggo basain ha sunagog ha thanghi khrip subung buthu ne sling ri ba. Boni slingrithai khe khna hi, oraha dongyarao khrip bo gmang hi bonsi thi lai ba, Ebo subung la braha ni phrang grao mai ba? Bone riyaba ringthai snadi kho? Bede khlai hi bo gmang thaosisi khusi khe dang ba?

³ Ebo la Jakob, Josia, Juda ode Simon ni buphlung, Mari ni basa, mistri niya kho? Boni bahandao thu eraha dong ba niya kho? Odehe, bonsi bokhe hamjaoya kha.

⁴ Jisu bonsi khe thi ba, Jar ni nolei hade, hainthirao khe garhi de khrip habo gorasali khe man khlai re.

⁵ Khaisa subung limyarao ni saoha yao denghi ham riba khe garhi de, bo hathan ha gibin gibin gmang thaosisi khusi khede dang phuya.

⁶ Subung buthu bokhe lonya bani hamsi ning gmang ba. Odehe, bo hathan ni nolei buthu ha Jisu thang hi, subung buthu khe sling ri ba.

Jisu jhigin khe haiha ba

⁷ Odehe, bo jhigin khe longthim hi, gini gini khlai hi haiha ba. Bo bonsi khe bese gusu buthu ni basao ha raothai rihi haiha ba.

⁸ Bonsi khe thi ba, Nisi thangba ha goda khe garhi de hon, juli, rang, musi khebo da lang pha.

⁹ Yaphadap ga lah, grang gin da lang phah.

¹⁰ Bonsi khe eleibo thi ba, Nisi khe sere noh ma thao ri du, oraha ni phrang baigoya hi, oraha ning dong lah.

¹¹ Asaba habo nisi khe noh ha hap riya ar nisi ni grao khebo khnaya thikhade, oraha ni phrang baigo langba ha, bonsi mithi mane, nisi ni yapha ni haduri khe thisa khla lah.

¹² Odehe, bonsi thang hi subung buthu khe khah phin mani grao khe sainthi ba.

¹³ Gabang bese gusu buthu khe rikkhlai hi limyarao sayarao khe khro ha thao huhi ham ri ba.

Baptisma riyaba Johan thihba ni grao

¹⁴ Jisu ni bumu khrip hathan ha gubblung tharba ni Raja Herod tharmai ba. Baptisma riyaba Johan githi ni phrang baija phin ba, odebani se gmang thaosisi khusi khe dang mane boniha raothai dongba thi hi lon ba.

¹⁵ Gibin subung thi bu du, Bo Elija se ode, sereba subung buthu thi bu du, Manang ni gorasalirao ni bising ha saosi ja nai du, thihi thi ba.

¹⁶ Herod bo grao khe khnahi thi ba, Johan ni bokhro khede ang ning dainso ri ba, bo githi ni phrang baija phinba se.

¹⁷ Herod jar ni buphlung Philip ni bihih Herodias khe noh jama jaya thihi Johan magna bani, Herod ning subung haiha hi, bokhe remhi, khah dada phatho ha jeb mani hukhum ri ba.

¹⁸ Johan ning Herod khe alang alang thi ba, Ning nini buphlung ni bihih khe noh dang jiba de dara ha giri.

¹⁹ Odebani khlai hi ning Herodias de Johan khe naisle hi bokhe sthaima baoba; thikhabo Herod ni khlai hi bo sthai phuya.

²⁰ Herod de Johan khe subung gibi ar gathar thihi tharmai du ar khinbo khinhi bokhe naiso re. Boni grao sainthiyaba khe khusi hamba gabang dangba thihi khajahi khna re.

²¹ Yaohon thao ha Herod ni hajaiba basain sophai kha bani, boni rajini gedebarao ar siphaiyarao ni hojarao ode Galili raji ni gedebarao dongba si ne mel salai riba ha,

²² Herodi ni bisik phaihi bai ba. Bo Herod ar mel jiyarao khe khaja ribani Raja bokhe thi ba, Ning snadi khe nangjao du, sain lah, ninthane ang ri nang;

²³ Ning asaba sainyaba khede raji gejer jakhabo ang ninthane ri nang, ode thihi boni ha bo smai dang ba.

²⁴ Odehe, masainjik baigo langhi, jarni buma niha sing ba, Ang snadi khe sain ma? Baptisma riyaba Johanni bokhro khe sain lah, thihi boni buma thiphin ba.

²⁵ Boha bo mathla srap Raja niha thanghi thiba, Baptisma riyaba Johanni bokhro khe, khopra masi ha anthane deng riphaima ang nangjao du.

²⁶ Raja khnahi hamsi ning khah ha waimu nang kha. Thikhabo, bo jang khamphayarao ni sagang ha grao hanggai hi smai dangba ni khlai hi, bo grao slaiphin phuya kha.

²⁷ Odebani, Raja bokhe raokhiyaba siphaiya saosi khe Johan ni bokhro khe dainso hi mane phatho ha haiha kha. Ode bo thang hi, Johan ni bokhro khe dainso kha.

²⁸ Odehe, boni bokhro khe khopra masi ha dikhu buhi mathla ni yao ha ri kha. Mathla jarni buma ne ri ba.

²⁹ Johan ni rikphayarao khnaba jang phai dada, boni manggathi khe laphai hi mangkhlong ha phip ba.

Jisu rjing bowa khe ji ri ba

³⁰ Yaohon rikphayarao Jisu niha bojom japhai hi snadi khusi khe bonsi dangba ar sling ri ba, bokhe khna ri ba.

³¹ Subung thangyarao phaiyarao bang bani Jisu jang yaohon rikphayarao, makham jimane hajora maiya bani bonsi khe bo thi ba, Jing bokja lenggo phuma ne, tha jing gibin hathan ha thang nang.

³² Bonsi rungha ga dada siri siriyaba hathan ha thang la kha.

³³ Subung gabangma bonsi thangba khe nuhi tharmai dada, nolei sersi giding ni noleisarao igah jang hemhi bonsi thane sagang sohi ba.

³⁴ Jisu rung ni phrang baigoba ha, subung gabang githim laiba khe nuhi, melma raokhiya giri lai nu dada, bonsi khe khasao sisi jajao hi khasaoma ni grao khe sainthi hi bonsi khe sling ri ba.

³⁵ Sainbli ja kha bani boni yaohon rikphayarao phai hi bokhe thi ba, Duha sainbli ja kha, ar ebo hathan de siri siriyaba hathan se.

³⁶ Ebo hathan ni rogong buthu ha ar nolei phadain buthu ha jima lingma barai mane subung buthu khe haikhla ha, ode bonsi thi ba.

³⁷ Bo bonsi khe thiphin ba, Nisi ning bonsi ne jima ri lah. Bonsi bokhe singphin ba, Jing thanghi rang rja gin ni hon barai hi bonsi ne rima?

³⁸ Jisu bonsi khe sing ba, Hon pher bislei nisi niha dong? Nai sang. Bonsi nai hi tharmai bani, Hon pher bowa ar nah magin dong, ode thi ba.

³⁹ Jisu subung buthu khe sam dubri ha bojom bojom kham ri mani, jarni yaohon rikphayarao khe sani ba.

⁴⁰ Subung buthu rensi ha rjasi ar dan dan kham ri ba.

⁴¹ Odehe, Jisu hon pher bowa khe ar nah magin khe laha hi, nokhasao gede naikhu dada, hamthai ri ba. Ode, hon khe sbai hi, bonsi ne ron rimane yaohon rikphayarao khe sani ba ar nah magin khebo khrip ne ron ri ba.

⁴² Bonsi khripbo jiha si mai ji lai kha.

⁴³ Odehe, honduri ar nah bo longkhai jhigin gablai si khonthim ba.

⁴⁴ Hon jiyarao de, miyahrao gajah rjing bowa lai ja du.

Jisu dih basao ha hem ba

⁴⁵ Bo jar ning subung buthu khe haidahi dihkharnai ni ojang nar, Bethsaida nolei ha boni sagang ha thang mane yaohon rikphayarao khe rung ha srap gakhu ri ba.

⁴⁶ Bonsi khe haiha bani yaohon ha, bo bih mane khlai hi hading ha thang ba.

⁴⁷ Odehe, sari hade rung dih kharnai gejer ha dong ba, bode hakhong ha sao jang dong ba.

⁴⁸ Boni yaohon rikphayarao dih kharnai ha hamsi ning bar meser phai bani rung jaophuyaba khe nuhi hamsi ning dukhu nangba.

⁴⁹ Thikhabo, bonsi Jisu dih basaoha hemhi bonsini gede phaiba khe nuba jang, Sgo janai du thihi bonsi jirikkhao ba.

⁵⁰ Bokhe nuhi bonsi khrip khin ba; thikhabo Jisu bonsi khe thi ba, Waimu da nang, ang se, da khin.

⁵¹ Bonsi dongyaba rung ha Jisu bonsi jang gakhu pha kha. Ode, baryung ho thao kha, Boha bonsini bisingha gmang lai ba.

⁵² Bede thikhade, bonsi hon ni balam ni graokhe bo bonsini khah rao bani, bonsi mithi phuya kha.

Genesaret ha limyarao khe ham ri ba

⁵³ Odehe, bonsi dih nar khe bailang dada Genesaret rajiha sophai ba, Odehe, rung khe dergong ha khathaohi deng ba.

⁵⁴ Rung ni phrang akhai buba jang subung buthu bokhe thi ba.

⁵⁵ Bo rajiha dongyarao, bo oraha dongba thihi tharmai ba jang khaibu thar hi, limyarao sayarao khe rih ha thu ri hi, bainbu dada boni ha phai ba.

⁵⁶ Noleisa, noleima, phadain habo Jisu braha thang ba, hathai habo, limyarao sayarao khe labu hi, boni rih bergong khe dopha mani khlai hi boni ha biba. Dophayarao si khrip bo ham ba.