MARKA 4 - DARA GADAIN N.T. with PSA and PRO (BSI)

Maimu saiyaba ni daogari

¹ Jisu Galili dihkharnai dergong ha sling riphin ba. Subung gabang githim bani, bo dih basao ni rung ha kham kha. Rung dih basao ha daopha lang ba, ode subung buthu dihnar ni dergong ha kham ba.

² Bo bonsi khe daogari jang sling ri ba.

³ Khna lah, sainsi khali ha subung saosi maimu sai mane thang ba.

⁴ Bo maimu saipha langba ha, khaisa lama bijing ha galai ba, dao buthu phai hi maigrong buthu khe khonji thar ba.

⁵ Khaisa longphlai, hah bayaba ha galai ba. Hah ba bani maisla sangga ning bre kha.

⁶ Thikhabo, sain dungba jang, yader giri bani rainlang la kha.

⁷ Gejesi busuling ha galai hi busuh phang jang mai khe dip phung kha. Odebani, mai thai phuya kha.

⁸ Thikhabo, gibin gejesi de, hah hamba ha galai ba. Basla jahi depha lang hi mai thai kha. Phantha thimjhi, phantha bisatham, ode phantha jang rjasi thai ba.

⁹ Odehe, Jisu thi ba, Khna mani khmao dong khade khna la thing.

Daogari ni ortho

¹⁰ Bo sao jang dongba ha, bo grao daogari thiyaba khe boni yaohon rikphayarao jang gibin khrip subung phai hi singphai ba,

¹¹ Bo bonsi khe thiphin ba, Madai ni raji ni grao makhao khe nisi ne ragaosisi ang sainthi ri kha. Thikhabo, gibin subung buthu nede daogari jang se sainthi ba.

¹² Bede thikhade, bonsi nai khabo, nuya lai se Khna khabo, khmao hap nang niya. Olei niya khade Bonsi Madai niha phaiphin hi Bo bonsi khe map khlai ma.

Maimu saiyaba daogari ni ortho

¹³ Odehe, Jisu bonsi khe sing ba, Ebo daogari grao khe nisi bujiya? Ode thikha la, gibin asaba daogari khe nisi bede khlai hi buji phu ma?

¹⁴ Maimu saiyaba de grao khe se sai ba.

¹⁵ Sereba subung de maimu lama bijing ha galaiyaba lai se. Bonsi graojma khe khna kha ning, Soithan phai hi khah bising ni graojma khe lang la re.

¹⁶ Sereba subung de longphlai, hah bayaba ha galaiyaba maimu lai jasosi se. Grao thiyaba de khna ba jang graojma khe khaja sisi ajao re;

¹⁷ Thikhabo, bonsi ni bising ha yader giri bani budu glao dong phuya. Graojma ni khlai hi dukhu hadi sophai kha ning, bonsi gar la re.

¹⁸ Gibin de busuling bubrip gejer ha maimu saiba lai se. Bonsi grao khe khna kha,

¹⁹ thikhabo, habsao ni gede waimu nang hi gnang jama ni baobai hi ode gibin gibin jinis buthu khe nangjao dada dip phung hi bathai thaiya hi thao ba.

²⁰ Hah hamba ha galaiyaba thiyaba de, grao khe khna hi ajaoyarao se. Bonsi graojma khe khna hi ajao re, ode phantha mathimjhi, phantha bisatham, ode phantha rjasi bathai thai re.

Phung khlipyaba thaophari

²¹ Jisu bonsi khe thiphla ba, Asaba bo thaophari phnang dada, khamphlu niya khade thuthan ni bakhla ha phungkhlip hi deng re? Thaophari khe la dengthan ha deng nang niya?

²² Khao hi deng mani musi giri, phlaya hi hui mani musibo giri.

²³ Khna mani khmao dong khade khna la thing.

²⁴ Jisu bonsi khe thi ba, Nisi snadi khe grao khna ba, khah ha deng lah. Malai ne suba lai nisi bo sujaoma se. Thikhabo, bangdao hi nisi ne ri ma.

²⁵ Sere niha bangdao hi dong re, bonthane baopha ma se. Sere niha gijisa dong, bo ni phrang langso lama se.

Bumu gaiyaba ni daogari

²⁶ Jisu bonsi khe thi ba, Madai ni Raji de bumu gaiyaba lai se.

²⁷ Subung saosi hah ha bumu gai ba. Hor ha thu re, sain ha baija re. Thikhabo, jar bumu gaiba khe bakhali baola jahi depha lang ba jar mithiya, olei se.

²⁸ Hah ning bo ni phrang bathai thai ri ba. Sagangthao maiphang khe nujao re, boni yaohon ha, thorai hi, maiding phura ja re.

²⁹ Odese, mai min kha bani ra mani basain sophai ba ha, jar ni sunggi khe laha hi mai ra re.

Yaoleigrong ni daogari

³⁰ Jisu bonsi khe thi ba, Madai ni raji khe la, snadi jang suthai nang? Jing snadi daogari jang suthai hi thi nang?

³¹ Yaolei bogrong de khrip bogrong tha khasi daothao.

³² Thikhabo, hah ha sai bani yaohon hade, bedep jahi depha lang re, ar gibin samphang tha bedep dedao re.

³³ Subung buthu mithi phu mane khlai hi, Jisu gibin gibin daogari jang sling ri ba.

³⁴ Daogari khe yaowaiya hi bonsi niha grao thiya. Thikhabo, jar ni yaohon rikphayarao nede phirik phirik grao sainthi phla thar re.

Baryungma khe thaolang kha

³⁵ Okhali ni sainbli ha bo bonsi khe thi ba, Tha, jing dihkharnai ni nar ha thang nang.

³⁶ Boni yaohon ha subung buthu khe garhi, Jisu khamyaba rung ha boni yaohon rikphayarao hap ba. Ode, bonsi bokhe lang pha ba. Gibin rung buthu bo oraha ning dong ba.

³⁷ Dei thiba ha, baryungma phai hi rung ni bising ha hapsing ba, ar dih gablai didih ja ba.

³⁸ Thikhabo, Jisu de gandu lahi rung ni khithong ha thuhi dong ba. Odebani yaohon rikphayarao bokhe masa hi thi ba, Slingriyah, jingde thi tharma ja kha, ning la waimu nangya?

³⁹ Jisu baigo hi baryungma khe jo ba, ode dihkharnai khe bo phirik phirik dongma sani ba jang thao lang la kha.

⁴⁰ Odehe, Jisu jar ni yaohon rikphayarao khe thi ba, Snabani nisi khin ba? Nisi niha lonma giri kho na?

⁴¹ Thikhabo, bonsi hamsi ning khin hi saosi jang saosi thi lai ba, Ebo subung la sere kho? Bar hadi ar dithon buthubo boni grao khe khna du lao?