MARKA 15 - DARA GADAIN N.T. with PSA and PRO (BSI)

Jisu Pilat ni sagang ha

¹ Phorongma ha Jonthaimarao, Dara khe slingriyarao ar bisardarrao jang goronlai hi sainlai ba, ode Jisu khe Pilat niha siklang ba.

² Pilat Jisu khe sing ba, Ning Judarao ni Raja? Jisu thiphin ba, Ning ning thila kha.

³ Jonthaimarao boni basao ha gabang gajai bisar ri ba.

⁴ Odebani Pilat bokhe phin singphin ba, Ning thiphinya kha? Nai lah, ning khe bisar riyarao khe.

⁵ Jisu musi khebo thiphinya bani Pilat hamsi ning gmang ba.

Sthai mane Jisu khe khlai ba

⁶ Baiglai ni melni bising ha, phathoha dongyarao ni bising phrang, sere khe subung buthu nangjao re, Pilat saosi khe bonsine haiger ri re.

⁷ Bo bubliha subung saosi, Barabba thiyaba, hamyayarao ni dol jang subung sthaipha bani phathoha dong ba.

⁸ Odehe, subung buthu Pilat niha bojom jahi nalai bede yaowaiba olei bonsi ne dang ri mani khlai hi khainsu ba.

⁹ Pilat bonsi khe sing ba, Nisi ni khlai hi Judarao ni Raja khe haiger ma nisi nangjao du?

¹⁰ Bede thikhade, Jonthaimarao hingsa ni rang jang bokhe boni ha yaophaba thihi mithi du.

¹¹ Thikhabo, Jonthaimarao subung buthu khe bonsi ne Barabba khe haiger ri mane sani ba.

¹² Odebani, Pilat githim laiyarao khe singphin ba, Judarao ni Raja nisi thiyaba khe snadi ang khlai ma?

¹³ Bonsi jirik khaophin hi thi ba, Bokhe kross ha dikpha lah.

¹⁴ Pilat bonsi khe thi ba, Bo snadi dang gajai ba? Bonsi jirik khao ba, Kross ha dikpha lah.

¹⁵ Subung buthu khe Pilat khaja rima nangjao bani Barabba khe haiger ri kha, ar Jisu khe la su ri dada kross ha dikpha mane yaopha kha.

Siphaiyarao Jisu khe minithai ba

¹⁶ Odehe, siphaiyarao Jisu khe bisardar ni nohkhoh, Praitorian ha lang ba, ar bonsini dol ni khrip khebo long ba.

¹⁷ Bonsi Jisu khe rih gajao phin rihi, ar busuni bedep jang khrothu slam hi, bokhe thu riba.

¹⁸ Juthai, Judarao ni Raja, nini hayu lao thing! thihi bokhe bonsi khlim ba.

¹⁹ Bonsi boni bokhro ha goda jang do ba ar bokhe khudi thuphra ba. Ode, bonsi sagang ha yasgu thuhi khlim ba.

²⁰ Odehe, bokhe mlao-thalao khlai bani yaohonha bonsi rih gajao khe khohi bone boni rih khe thuphin riba ar bonsi dikthai mane bokhe lang ba.

Jisu khe dikpha ba

²¹ Kurini noleini subung saosi Simon khe siphayarao lama ha remhi Jisuni kross khe bain riba. (Bode Aleksandar jang Rufus ni bupha se.)

²² Odehe, Jisukhe Golgotha hathanha langba, boni ortho de Laokhrong hathan thiyaba se.

²³ Oraha murra jang grep bidih gibringyaba khe bonsi bone ling rima bao ba, thikhabo lingya.

²⁴ Odehe, bokhe kross ha dikpha kha ar bonsi boni rih phinyaba khe khophal naihi ron laiba.

²⁵ Phorong ni bubli masgu ha ning bonsi Jisu khe kross ha dikthai ba.

²⁶ Boni basao ha sijithai musuthai ni grao Judarao ni Raja khe reb hi deng ba.

²⁷ Makhao mithim gini khebo bonsi Jisu jang baosi dikpha ba, boni yaoda gede saosi ar yaosi gede saosi.

²⁸ Odelei ning Madai ni grao hade, Bobo phaphirao jang baosi sainpha jao kha thiyaba grao sophai ba.

²⁹ Odehe, thangyarao phaiyarao nuhi, bokhro thingkhrai dada, musu ba, Yao, ning ning Madai khoh khe saintham ni bising ha dangphin ma thiyaba!

³⁰ Duha ning jarkhe sogo hi kross ni phrang nakhai bu sang.

³¹ Odelei ning Jonthairao jang Dara khe slingriyarao Jisukhe mlaohi thi ba, Bo malai khe sogo phu du, jar khe la sogo phuya.

³² Jing nuhi lonphu mane Messiah, Israelraoni Raja duha kross ni phrang akhai bu thing, thihi bonsi thi ba. Bo jang baosi gini dikpha jaoyababo bokhe musu ba.

Jisu thih ba

³³ Odehe, sainjer bubli magin phrang sainbli ni bubli matham sosi mulug andar ja ba.

³⁴ Bubli matham ha Jisu bak jang jirik khao hi, Eloi, Eloi, Lama sabakthani (boni ortho de ‘Ani Madai, Ani Madai, snadi jabani ning angkhe dangkhlai ba’?)

³⁵ Oraha songhi dongyarao gejesi khnahi thi ba, Khna sang, bo Elija khe long ba se.

³⁶ Bonsini bising ha saosi subung khai phalang dada grep bidih khe jemyaba sponj lang hi goda buju ha khepre dada, bo Jisuni khujer ha sugu hi bone ling riba, ar thi ba, Jon kho, Elija bokhe dikhlai mane phai nang na phaiya jing nai nang.

³⁷ Jisu bak jang jirik khao dada hang jam kha.

³⁸ Madaikhoh bising ha dimphongyaba rih phi gin khlaihi basao ni phrang bakhla sosi jigao lang la ba.

³⁹ Boni rogong ha songhi dongyaba siphaiyarao ni hoja, bo olei thiba khe nuhi bo thi ba, Gibi jang ebode Madai ni basa se.

⁴⁰ Odehe, gajain ni phrang masainjik buthu bo naihi dong ba. Bonsi ni bising ha Mari Magdalin, gidi daoyaba Jakob ar Josep ni buma Mari ar Salomi bonsi ni bising ha dong ba.

⁴¹ Jisu Galili rajiha dongbaha bo jang baosi rikbaipha dada khusi dang juruyarao ar masainjik gabang Jerusalem ni phrang phai phayaraobo oraha dong ba.

Jisu khe phip ba

⁴² Sainblibo ja kha ode Lenggo basain ni khlai hi, salai hi deng mani bubli bo jakha,

⁴³ Boha, Arimathai nolei ni bisardar, man gnangyaba Josep, Madai ni raji khe asa khlai hi dongyaba subung, khinya hi Pilat niha hapsing dada Jisu ni manggathi khe sain ba.

⁴⁴ Pilat Jisu srap thih bani grao khe khna hi hamsisi gmang ba. Bo siphaiyarao ni hoja khe longha hi thihba lao kha na laoya thihi bokhe sing ba.

⁴⁵ Siphaiyarao ni hoja ni phrang grao khe khnaba ni yaohonha manggathi khe Josep ne ri kha.

⁴⁶ Josep rih miyao dudu barai hi, manggathi khe dekhlai dada rih miyao dudu ha merai hi longthaima khe jaoyaba mangkhlong ha thu ri ba, ode mangkhlong derga khe longphlai jang khlip phung ba.

⁴⁷ Mari Magdalin ar Josep ni buma Mari Jisu ni manggathi thu riyaba khe naihi ning dong ba.