LUKE 7 - DARA GADAIN N.T. with PSA and PRO (BSI)

Siphaiya hojani leng khe ham ri ba

¹ Odehe, subung buthu tharmai mane grao sainthi blaihi Jisu Kapernaum ha hap hi ba.

² Oraha dongyaba siphaiyarao rjasi ni hoja, boni leng maya nangyaba, limhi thi didih ja ba.

³ Bo Jisu ni grao khe khna hi, boni leng khe ham rimane khlaihi Jisu niha khainsu mane boni ha dongyaba Juda khraorao khe haiha ba.

⁴ Bonsi Jisu niha sohi dada boni ha khah jang muh jang khainsu ba. Ebo subung juru jao ja re.

⁵ Bo de jini Juda jadi khe hamsisi maya nang du. Jini sunagog khe bo hamsisi dang riba, thihi bonsi thi ba.

⁶ Odehe, Jisu bonsi jang thangpha ba. Ar noh ha sohi didih ha siphaiya ni hoja niha grao sainthi mane boni lugurao khe haiha ba, ar boniha thi ba, Gedeba, ning jar khe dukhu da ri. Ani noh ha ning hapsing mane gathaya.

⁷ Odebani, ang nini ha phaima bo nangdaoya. Ning graothai rikha ning ani ansa hamphin nang.

⁸ Ang bo malai ni bakhla ha donghi ani bakhla ha siphayarao dong. Ang saosi khe thang thikhade bo thang re, gibin khe phai thikhade, bo phai re. Ode ani leng khe ebo khusi khe dang ang thikhade, bo dang re.

⁹ Jisu bo grao khe khnaba jang, hamsi ning gmang ba. Odebani, bo jang rikphayarao khe naiphin hi, bo thi ba, Israelrao ni bising ha bo elei lonma gnang khe ang nuya kho!

¹⁰ Haiha jaoyarao noh gede thangphin kha ode leng bo hamphin kha thihi nu ba.

Nain ni banjik ni basa

¹¹ Khaisa yaohon ha, Jisu Nain thiyaba nolei ha thang ba. Boni rikphayarao ar subung buthu bo jang thangpha ba.

¹² Bo nolei ni daoglap ha sohi ba jang, subung githi, banjik ni basa, saosi mang mangyaba khe bainbu hi phai ba. Nolei ni subungrao bo thangpha ba.

¹³ Bo banjik khe nuba jang hamsi ning bo khe khasaosisi jajao hi, bo khe thi ba, Da gra.

¹⁴ Bo sampha hi dolei khe rem ba, bo khe bainyarao songthao kha. Jisu thi ba, Nagadao, ang ning khe thi du, baija lah.

¹⁵ Githi subung baija hi grao jo kha, ode Jisu bo khe jarni buma ne ri kha.

¹⁶ Subung buthu khrip bo khinseng hi Madai khe bakhan khlaihi thi ba, Madai jarni subungrao khe naiso mane jini bising ha gorasali dedaothao baigo kha lao!

¹⁷ Jisu ni grao Judai raji ode boni sere bere haphai ha gublung thar kha.

Johan subung haiha ba

¹⁸ Johan ni rikphayarao ebo buthu khrip grao khe Johan niha sainthi ba.

¹⁹ Odebani Johan jarni rikphayarao ni bising ha subung gini khe longha hi, Phaiginyaba ning ning, na gibin khe jing jon ma kho? thihi singmane Gabra niha haiha ba.

²⁰ Bonsi boni ha sohi dada, bonsi thi ba, Phaiginyaba ning ning, na gibin khe jing jon ma kho? thihi Baptisma riyaba Johan jing khe singmane nini ha haiha ba.

²¹ Bo bubli ha Jisu limyarao sayarao gabang khe ham riba ode muthai ganarao khe muh nu ri ba.

²² Odehe, Johan ni rikphayarao niha bo thi ba, Nisi thangphin hi, Johan niha nisi sumjadi khe nu ba, ar nisi khnayaba khe sainthi tha. Ganarao muthai nuphin kha, khorarao hemphin kha, khunthi jayarao ragaophin kha, nathongrao khnaphin kha, githirao baijaphin kha, dukhisarao niha hamba graojma sainthi kha.

²³ Asaba bo ani basao ha jajaoya jayayaba de boni khophal hambi!

²⁴ Johan subung haihayarao thangphin bani yaohonha subung githim laiyarao niha, bo Johan ni grao khe sainthi ba. Naithao sisi khe naimane sumjabani hajengling ha nisi thangba kho? Bar sib baha dobung maoyaba khe?

²⁵ Niya kha la, sumjadi khe nai mane thang ba? Rih miyao dudu phinhi sal khlaihi dongyaba khe? Nai lah, oleiyaba subung buthu de Rajani noh ha se dong ba.

²⁶ Niyakha la, sumjadi khe nai mane thangba kho? Gibi jang ang nisi khe thi du, gorasali khe naima ning thangba se thi! Bo gorasali thane dedaoyaba eraha dong.

²⁷ Nai lah, ani haiyasa khe nini sagang ha ang haiha du, bo de nini sagang ha ninthane lama slamhi deng nang thihi Madai ni laisi ha boni balam ha rebyaba de ebo Johan ning.

²⁸ Ang nisi khe thi du, masainjik ni phrang hajaiyaba ni bising ha, Johan tha dedaoyaba saosi bo giri kho. Thikhabo, Madaini raji hade subung khasi daothao bo Johan tha dedaothao ja phu du.

²⁹ Boni grao khe khnayarao khrip bo, ar khajna kharangyarao bo Johan niha baptisma jama ni khlai hi Madai gibi khe bonsi ajao la kha.

³⁰ Pharisairao ar Dara khe slingriyarao de Johan ni yao ha baptisma lamane nangjaoya. Bede thikhade Madai salai riyaba khe bonsi ajaoya.

³¹ Jisu thisai ba, “Duha ni subung buthu sumjadi jang ang suthai hi thi nang kho? Gabang ning dubi lao?

³² Bonsi de ansarao hathai ha khamlai hi, dolsi gibin dol niha, ‘Nisi ne jing jukhu bani muri dam ba, nisi la baiya lao. Ar grathai jang jing gra kha bo, nisi la graya,’ thiyarao lai se!

³³ Baptisma riyaba Johan phai ba, bo makham jiya, grep bidih bo lingya. Bo khe nisi thibu du, sao ha sgo sgain ni lugu se

³⁴ Marsini Basa phai ba, bo jidu ling du. Nisi thiphin du, Nai ha sang, bo subung de jiba raoyaba ar grep bidih lingba raoyaba khe ar khajna kharangyarao ar phaphirao ni lugu se thihi nisi thi du!

³⁵ Thikhabo, girikma de boni khrip ansarao bo khe gajai riya.”

Simon ni noh ha Jisu thao ba

³⁶ Pharisai saosi makham jimane Jisu khe jama ba.

³⁷ Bo nolei ha masainjik hamya khusi dangyaba saosi dong ba. Bo masainjik khna ba Jisu Pharisai ni noh ha makham khalai kham du thi hi. Odebani, alabastar thao midim khe bitholsi labu ba,

³⁸ Jisu ni igah gabasi ha songphai hi gra ba, ode boni mudithai Jisu ni igah ha serkhru thar ba. Ode boni khnai jang phusa ba. Ode boni igah khe khudim hi thao hu ba.

³⁹ Pharisairao bo khe nu dada, khah ha elei bao ba, Ebo subung gorasali gibi thikha la, bo khe dophayaba masainjik sere ar boni hamyathai khe mithima se mu!

⁴⁰ Jisu boni ha thi ba, Simon nini ha ang grao thaisi sainthima nang du. Bo bokhe thiphin ba, Dei, thi sang, slingriyah

⁴¹ Jisu bo khe thi ba, Rang jaoba riyaba niha subung gini lagai nang ba. Saosi denarion rjasi, saosi ne thodan lagai nang ba.

⁴² Thikhabo, bonsi lagai khe bone suphin phuya hi thao ba. Odebani gini khebo bo map khlai kha. Ode thikhala bo sere khe maya nang dao?

⁴³ Simon thiphin ba, Sere khe bangdao hi map khlaiyaba, bo ja nang. Jisu thiphin ba, Gibi grao khe ning thi kha dou.

⁴⁴ Odehe, masainjik ni gede naiha hi, Simon khe thi ba, Ebo masainjik khe ning nu kha? Nini noh ha ang hapsing hiba ha, ning de ani igah sumane bo dih riya. Bo masainjik de boni mudi jang ani igah khe su dada boni khnai jang rusa ba.

⁴⁵ Ning de ang khe khudimya, bo de ang sophai bani phrang thaoya si ani igah khe khudim ba.

⁴⁶ Ning de ani khro hah thao doriya, bo de ani igah buthu ha thao midim hu ri ba.

⁴⁷ Odebani, ang ning khe thi du, ebo masainjik khe maya gabang phnu mane boni phap gabang khe ang map khlai kha.

⁴⁸ Ode Jisu, bo masainjik khe thi ba, Nini phap dongba si khrip khe ang map khlai kha.

⁴⁹ Bo jang khalai khamyarao thilai ba, Bo sere ja nang, phap khe map khlai phuya ba.

⁵⁰ Jisu bo masainjik khe thi ba, Nini lonma jang ning khe sogo kha, shanti jang thang lah.