LUKE 23 - DARA GADAIN N.T. with PSA and PRO (BSI)

Jisu Pilat ni sagang ha song ba

¹ Githim laiyarao khrip bo baija hi Jisu khe Pilat niha lang ba,

² boha bokhe thising ba, Ebo subung jini jadi ni subung buthu khe hamya lama gede langpha ba ha, jing bo khe rem ba, Kaisar niha khajna riya mane subung buthu khe bo magna ba, ode, bo jar khe Krista Raja thila ba khebo jing khna ba.

³ Pilat bokhe sing ba, Ning Judarao ni Raja se? Ning ning thila du, Jisu thiphin ba.

⁴ Jonthairao ar subung githim laiyarao khe Pilat thi ba, Ebo subung khe sthai mane musi bo gajai ang maiya.

⁵ Thikhabo, bonsi thi ba, Juda raji khrip habo, boni slingrithai jang yisisi khlai hi, Galili raji ni phrang eraha sosi bo sophai ba, thihi bonsi hamyadao hi thi ba.

Jisu Herod ni sagang ha song ba

⁶ Pilat ebo grao khe khna hi, Ebo subung Galili rajini subung na niya? thihi bonsi khe sing ba.

⁷ Herod ni haphai ha dongyaba subung thihi mithi bani, Herod niha bokhe haiha ba; okhali ha bo Jerusalem ha dong ba.

⁸ Herod, Jisu khe nuhi hamsi ning khaja ba; sumjabani thikhala boni grao khe khna hi bokhe nai mane budu glao jon hi dong ba. Bede thikhala gmang thaosisi khusi Jisu dangyaba khe naima bo asa khlai ba.

⁹ Odebani Herod Jisu khe grao gabang sing ba. Thikhabo, bo musi grao khe bo thiphinya.

¹⁰ Jonthairao ar Dara khe slingriyarao sagangha phai dada, Jisu khe hamsi ning gajai ri ba.

¹¹ Herod ar boni siphaiyarao, Jisu khe siji hi mlao hi minithai hi, dukhu ri ba, ar bonsi bokhe rih gajao phin ri dada, Pilat niha haiphin ha ba.

¹² Bo basain ni phrang Herod ar Pilat lugu jalai kha; boni sagangha la bonsi gini jang miliya hi dong ba.

Jisu khe sthai mani bisar

¹³ Jonthairao, hojarao ar subung buthu khe Pilat longthim hi,

¹⁴ bonsi niha thi ba, Ebo subung la, subungrao khe hamyayaba lama gede langpha ba thihi nisi bokhe ani ha labu ba. Duha nisini sagangha ang bokhe ragaosisi grao sing kha, thikhabo, nisi bisar ribani grao ha bokhe musibo gajai khe ang maiya.

¹⁵ Herod bo mai daoya bani, aniha bokhe haiphin ha kha. Khna lah, bo sthai jao mane sosi musibo boni gajai giri.

¹⁶ Odebani, ang bokhe suri dada, bokhe ang haiger nang.

¹⁷ Baiglaini Mel ha, jebjaoyaba subung asaba saosi khe Pilat haigerma dara dong.

¹⁸ Subung githim laiyarao jang jirik khao lai ba; Bo khe sthai lah! Jinthane Barabba khe se haiger ri lah!

¹⁹ Subung khe sthai bani ar nogor ha yisisi khlai bani Barabba khe phatho ha jeb ba.

²⁰ Pilat de Jisu khe haigerma nangjao bani subung githim laiyarao khe grao thiphin ba,

²¹ thikhabo, bonsi jirik khaophin ba, Bokhe kross ha dikpha! Kross ha dikpha!

²² Pilat phintham thi ba, Snadi jabani? Thimani sosi boni basao ha musibo gajai maiya. Do dada ang bokhe haiger nang.

²³ Thikhabo, bonsi bol jang, jirik khao dada, bokhe kross ha dikthai mane khainsu ba, ar bonsini khurang jang bokhe de kha.

²⁴ Odebani, bonsi khainsuba lai ning Pilat mani kha.

²⁵ Bonsi nangjaoba lai, subung khe sthai bani phatho ha jebjaoyaba khe bonsi saniba lai bo bonsine haiger ri ba, ar Jisu khe de bonsi nangjaoba lai dang mane bonsine yaopha kha.

Jisu khe dikpha ba

²⁶ Siphaiyarao Jisu khe langhi thangba ha, hagra ni phrang nogor gede phaiyaba, Kurini nolei ni subung, Simon khe bonsi remhi kross khe boni basaoha deng hi, Jisu ni yaohon gede bokhe bain ri ba.

²⁷ Subung gabang boni yaohon rikpha ba; ode bonsini bising ha gejesi masainjikraobo dong ba; bonsi Jisuni khlai hi khahbao dohi rikpha ba.

²⁸ Jisu bonsini gede naiphin hi thi ba, Jerusalem ni masainjikrao, ani khlai hi de da gra, nisi jar ne ar jarni ansarao ni khlai hi se gra lah.

²⁹ Masainjik sagrimarao, nana hajaiyayarao, nana bamyayarao bonsini khophal hambi thihi subung buthu thimani basain sophai nang.

³⁰ Bo bubliha de subung buthu hahrang buthu khe jini basaoha graiphai ar hading buthu niha jing khe khlipphung hi deng lah thi nang.

³¹ Bongphang gathang khe ning bonsi olei khlai kha la, bon grain khe la belei sosi khlai nang bo?

³² Bo jang baosi sthai mani khlai hi gajai subung gibin gini khebo langpha ba.

³³ Laokhrongni hathan thiyaba ha bonsi sohi dada, oraha bokhe kross ha dikthai kha, ar dang gajai subung gini khebo, boni yaoda gede saosi, ar boni yaosi gede saosi, bonsi dikthai ba.

³⁴ Jisu thi ba, Abai! bonsi khe map khlai lah, bonsi sumjadi khusi dang ba, bonsi mithiya; Ode boni rih khe sma naihi bonsi ronlai ba.

³⁵ Subung buthu songyarao bokhe nai ba, ar hojarao bokhe musu ba, Madai saikhoyaba Krista thikhade, bo jar khe sogo la thing!

³⁶ Siphaiyaraobo bokhe minithai ba; boni ha phai hi, bokhe grep bidih brabyaba khe ling ri ba.

³⁷ Judarao ni Raja ning thikhade, ning jar khe sogo lah, thihi thi ba.

³⁸ Boni khrosao ha, EBO NING JUDARAO NI RAJA thihi reb hi dong.

³⁹ Oraha dikthai jaoyaba subung saosi jo ba, Ning Krista niya? Ning jar khe sogo hi, jing khebo sogo lah! thi ba.

⁴⁰ Thikhabo, gibin saosi de bokhe johi thi ba, Madai khebo ning khinya? Jing la baosi ning saja mai ba se.

⁴¹ Jing de saja maima ning; jini khusi dangthai jang maiba se. Bo la gajai khusi musibo dangya.

⁴² Ode bo Jisu khe thi ba, Jisu, nini raji ha ning sohiba ha, ang khe wainso hah.

⁴³ Jisu bokhe thi ba, Ang gibi jang ning khe thi du, dini ha ning ang jang baosi paradis ha dongpha nang.

Jisu thih bani grao

⁴⁴ Sainjer bubli majhigin beren ni phrang, sain jnaya kha, ar bubli matham sosi khrip habsao andar ja thar kha.

⁴⁵ Ar Madaikhoh bising ha lamphongyaba rih gejer ha phigin jigao lang la kha.

⁴⁶ Jisu bol jang jirik khaohi, Abai! Ani bese khe nini yaoha ang yaopha la du! Ebo khe thi dada singjli jagao lang la kha.

⁴⁷ Siphaiyarao ni hoja bo sophaiyaba jathai khe nuhi, Ebo subung de gibi jang ning gibi subung se, thihi bo Madai khe bakhan khlai ba.

⁴⁸ Bo gmang thaosisi khe nai mane phaiya ba khripbo, dukhu nang bani, jarni khahbao dohi dohi, jar jarni noh ha thangphin la kha.

⁴⁹ Jisu khe basao mithiyarao, khripbo Galili raji ni phrang phaiyaba masainjikraobo gajain ha songhi, bokhe nai ba.

Jisu khe phip bani grao

⁵⁰ Subung saosi, bumu Joseph thiyaba, bisardarrao ni bisingha dormo subung saosi dong ba.

⁵¹ Bo subung Juda rajini Arimathai nolei ni phrang phaiyaba se. Bonsini khusi ha gabaya, Madaini raji khe jonhi ning dong ba.

⁵² Bo Pilat niha thanghi Jisuni manggathi khe sain ba.

⁵³ Odese, Jisuni manggathi khe dik khlai dada rih miyao dudu jang bokhe merai hi, longthai gabla phu hi saosi khe bo phipba giriyayaba mangkhlong ha bokhe thu ri ba.

⁵⁴ Bo basain salaihi dongmani basain Sukri se, ar Lenggo basain sampha kha.

⁵⁵ Galili ni phrang phaiyaba masainjikrao, bo jang rikphayarao, thanghi mangkhlong ar manggathi khe bedehe bonsi thu ri ba, bonsi nu hi ba.

⁵⁶ Ar bonsi noh gede thangphin hi, manggathi ha hu mane, midimyaba thao midim khe bonsi salai ba. Lenggo basain ha de dara ha dongba lai bonsi lenggo ba.