LUKE 2 - DARA GADAIN N.T. with PSA and PRO (BSI)

Jisu hajaiba ni grao

¹ Bo bubli ha Kaisar Augasta, habsao raji khrip dongba si ha, khrip subung ni bumu khe rebkhu mane hukhum ri ba.

² Boha Suria raji ni Kurini latsap ni bubli ha bumu reb khu jen ba.

³ Khripbo jar jar ni nolei ha bumu rebkhu jao mane thang ba.

⁴ Odehe, Josepbo David ni sarik surik ar greng se bani Galili raji ni nolei masi Nazareth ni phrang Judai raji ni David ni nolei Bethlehem thiyaba ha,

⁵ Jar ni bihih Mari, sao khonggin jayaba khe langpha hi, bumu reb khu jao mane thang ba.

⁶ Bonsi oraha dongba ha ning hajai mani bublibo sophai ba.

⁷ Ode, hajai jenyaba basa sagra mai ba. Bokhe rih merai hi mihrung ha thu ri ba. Bede thikhade naorai thaothan ha bonsi dongthan maiya.

Melma raokhiyarao jang sorgo deglarao

⁸ Odehe bo raji ni hathan masi ha gejesi melma raokhiyarao hor ha jarni melma khe raokhi hi dong ba.

⁹ Gabra ni phrang degla masi, bonsi niha songpha phai ba, ode sersi giding bonsi niha sring sring jdanpha ba. Odebani bonsi hamsi ning khin ba.

¹⁰ Thikhabo degla bonsi khe thi ba, Nisi da khin ar khna lah. Ang khrip jadi ni khlai hi khaja sisiyaba hamba graojma khe labuba se.

¹¹ Dini ha nisi ne khlai hi David ni nolei ha sogoyah Gabra Krista hajai kha.

¹² Odehe, nisi ni khlai hi mithi mani sin ebo se, nana khe rih merai hi mihrung ha thu riba khe nisi nuhi nang.

¹³ Boha ning, degla niha sorgo ni subung gabang nujao hi Madai khe edehe bakhan ri ba,

¹⁴ Judaothao ni Madai niha muima ja thing Ode, habsao habo hamjaoyaba subungrao ni basaoha milima dong thing, thihi bonsi thi ba.

¹⁵ Deglarao sorgo ha thangla bani yaohon ha, melma raokhiyarao thi lai ba, Tha, jing Bethlehem ha thang nang, sumjadi japhai ba Gabra sainthiyaba grao khe naihi nang.

¹⁶ Ode, bonsi srap thang hi, Mari jang Josep, mih ni ahar riyaba mihrung ha nana thu riba khe bonsi nuhi kha.

¹⁷ Melma raokhiyarao bokhe nuba jang nana ni basao ha degla sainthiyaba graojma khe bonsi niha sainthi ba.

¹⁸ Khnayarao si melma raokhiyarao sainthiyaba grao khe khna hi gmang ba.

¹⁹ Thikhabo, Mari ebo grao buthu khe khrip jarni khah bisingha deng ba.

²⁰ Melma raokhiyarao degla bonsi niha sainthiba lai jasosi nuhi bani Madai khe bakhan rihi bonsi thangphin la kha.

Jisu ni bujuh rasoba

²¹ Sainjai so ba ha, bujuh raso bani basain so bani, bo sathip ha dongyaba ni ha degla bumu dengma saniba lai bumu khe Jisu thihi deng ba.

Jisu khe bikhoh ha yaopha ba

²² Odebani, Moses ni dara ha dongba lai bokhe thar mani basain sokha bani bokhe Jerusalem ha langpha hi thang ba.

²³ Gabra ni dara ni grao ha dongba lai hajai jenyaba basa sagra khede Gabrani khlai hi gathar se thihi reb ba lai.

²⁴ Gabra niha yaopha mani khlai hi daothu jorsi thikhabo, daophri basa magin thikhabo, Gabra ni dara ni grao ha reb ba lai labu hi bandai ri ba.

²⁵ Bo bubli ha, Jerusalem ha subung saosi Simeon thiyaba dong ba. Bo dormo ni subung se. Bo Madai khe mani hi Israelrao khe sogo ri mane jon hi dongyaba se. Ar boni basaoha Bese Gathar dongpha ba.

²⁶ Gabra Krista khe nuya side thi nang niya thihi Bese Gathar jang bokhe mithi ri ba.

²⁷ Bese jang langpha jao hi, Simeon Madai khoh ha hap hiba. Dara ha dongba lai dang ri mane nana Jisu khe buma jang bupha labu ba ha,

²⁸ Simeon nana khe bam dada Madai niha hamjaoma ri ba:

²⁹ Gabra, duhade nini grao lai, nini leng khe khah santi jang haiha la ga.

³⁰ Bede thikhala nini sogoyah khe ani muthai jang nu la kha.

³¹ Ebo khe khrip jadi ni muthai ha ning ning salai rihi deng ba.

³² Jentailrao nini ha nini jnama khe nuphu mani khlai hi ar Israelrao niha nini muima japhu mane.

³³ Nana ni basao ha grao thiyaba khe buma bupha gini jang hamsi ning gmang ba.

³⁴ Simeon bonsi khe hamthai ri dada boni buma Mari khe thi ba, Khna lah, ebo nana de Israelrao ni bising ha gabang subung buthu khuda mane ar sogo mane saikho ba. Ar malai jang siji jaomane sinbo phnu nang.

³⁵ Nini khah bo seng jang iphlaba lai sa ma se. Ode gabang subung ni khah khebo baothai phnu nang.

³⁶ Ode, Asher jadi ni Phanuel ni bisik gorasali saosi, Anna thiyaba dong ba. Bo hamsi ning grajik jakha. Bo noh jahi basai jang maithai sni mang mang dongpha ba.

³⁷ Bo nokha maithai jang bisa bri maithai bri banjik jahi dong ba. Ar Madaikhoh khe garyahi nalaibo hoh khongja donghi bo Madai niha bi re.

³⁸ Ode, okhali ni basain ha ning bo phai dada Madai niha hamjaoma ri ba, ode Jerusalem khe sogo mane lonhi jonyarao niha khrip nana ni balam khe sainthi ba.

Nazareth ha bonsi thangphin ba

³⁹ Gabra ni dara ha dongba lai khrip khusi khe dangblai bani yaohon ha bonsi Galili raji, jarni nolei Nazareth ha thangphin la kha.

⁴⁰ Nana de dedao phalang ba, ar raodao phalang hi bo girikthai jang gablai ba, ar Madai ni khasaoma boni basao ha dong ba.

Bikhoh ha nana Jisu

⁴¹ Maithai phrong Jisu ni buma bupha Baiglai ni Mel mani mane Jerusalem ha thang re.

⁴² Bo maithai jhigin soba ha dara ha dongba lai Baiglai ni Mel mani mane bonsi thang ba.

⁴³ Ode mel jamhi phaiphin ba ha, ansa Jisu Jerusalem ha dongthao la kha, bo khe buma jang bupha mithiya.

⁴⁴ Odebani, sainsi ni lama ha thang hi bonsi subung buthu ni bising ha ar lugurao ni dol ha ar basao mithiyarao niha bo khe smai hi nuya kha.

⁴⁵ Ode, bonsi bo khe nuyabani smai phalang hi Jerusalem gede thangphin kha.

⁴⁶ Saintham ni yaohon ha Jisu khe Madaikhoh bising ha bonsi slingriyarao ni gejer ha khamba khe nuhi ba, ar bonsini grao khe khnahi singbo sing ba.

⁴⁷ Bo joyaba grao khe khnayarao ar boni girikthai jang grao thiphinyaba khe khnayarao khrip bo gmang ba.

⁴⁸ Odehe, buma jang bupha, bo khe nuba jang hamsi ning gmang ba. Odebani, buma bo khe thi ba, Ani basa, sumjabani jing khe elai dukhu ri ba? Nai lah, napha jang ang waimu jang ning khe smai ba.

⁴⁹ Bo bonsi khe thiphin ba, Sumjabani nisi ang khe smai ba? Ani bupha ni noh ha ang dongma thihi nisi mithiya?

⁵⁰ Thikhabo, bo thiphinyaba grao khe bonsi bujiya.

⁵¹ Ode, bo bonsi jang baosi Nazareth ha thangphin ba. Oraha bo bonsini grao khe mani hi dong ba. Boni buma khrip ebo buthu grao khe khah ha deng ba.

⁵² Jisu ringpha langhi girikpha langhi sao bo dedao phalang hi jupha lang ba, ar Madai jang subung buthu ni khasaoma hamjaoma maihi dong ba.