LUKE 19 - DARA GADAIN N.T. with PSA and PRO (BSI)

Jisu jang Zakaia

¹ Jisu, Jeriko ha thanghi bokhe baiso lang ba,

² oraha, subung saosi, bumu Zakaia thiyaba, dong ba.

³ Bo Jisu khe bede laiyaba subung thihi naima bao ba; thikhabo subung bangbani ar bo hilik bani, bo Jisu khe nuha phuya,

⁴ Odebani, bo Jisu thangmani lama ha, subung githim laiyarao ni sagang ha, khailang dada, Jisu khe naimane, bo thaikhrao phang ha gakhu ba.

⁵ Jisu oraha sophai ba ha, bo naikhu hi, Zakaia khe thi ba, Zakaia, ning srap akhai bu lah, dini ha nini noh ha ang noh mathao ma.

⁶ Odebani, Zakaia srap akhai buhi, bo khe jarni noh ha noh mathao ri kha.

⁷ Bo khe nuyarao khrip bo berlai ba, Ebo subung la phaphi subung ni noh ha noh mathao ba.

⁸ Zakaia songkhu dada, Gabra khe thi ba, Gabra, ani ha dongba si ni phrang ang gejer khe dukhisarao ne ri nang; ang sereba subung ni rang khe thokhi dada ang la kha thikhade, ang bo ne phantha bri riphin ma.

⁹ Jisu bo khe thi ba, Dini ha ebo noh ha, goma sophai kha; bede thikhade, bo bo Abraham ni basa ning.

¹⁰ Gamayarao khe smaihi sogo mane se Marsini Basa de phai ba.

Gajao ni rang botho ni daogari

¹¹ Jisu ni grao khe subung buthu khnaba ha, Madai ni raji sophai kha thihi bonsi lonbani bonsi ne daogari masi sainthi ba.

¹² Bo edehe thi ba, Subung gedeba saosi, raja slamjao mane, raji gajain ha thang du, odehe yaohon ha bo phaiphin ma bao ba.

¹³ Bo thangya sani ha, jarni leng jhi khe long dada, khrip ne gajao ni rang botho, masi masi khlai hi ri ba; ar bonsi khe thi ba, Ang phaiphinya si de, ebo rang jang bephar khlai lah.

¹⁴ Thikhabo, boni rajini subung buthu bokhe naisle ba, jini raja jamane ebo subung khe jing nangjaoya thihi bo khe khna rimane, boni yaohon ha bonsi graodiyahrao khe haiha ba.

¹⁵ Bo raja slamjao hi, phaiphin dada bo rang riyaba khe bonsi bislei lab mai kha thihi sing mane boni leng buthu khe longthim ba.

¹⁶ Sagang thaoyaba phai hi, boniha thi ba, Gedema, ning riyaba gajaoni rang botho majhi lab mai kha.

¹⁷ Bo bo khe thi ba, Ning hamba leng, ning hamba khusi dang kha, gejesi ni basao ha ning lonma dong bani, nolei majhi ni basaoha hoja ja lah.

¹⁸ Giniyaba leng phai hi thi ba, Gedema, ning riyaba gajaoni rang botho masi de mabowa lab mai kha.

¹⁹ Bo bo khe thi ba, Ning bo raji mabowa ni basao ha hoja jahi dong lah.

²⁰ Gibin leng bo phaihi thi ba, Gedema, ning riyaba gajaoni rang eraha dong; rihsa jang merai hi, ang phip ba.

²¹ Ning khah raoyaba subung jabani, ning khe ang khin ba; sumjabani thikhala, jarni niyayaba khe ning la re, ar braha ning gaiya, oraha ni phrang ning ra re.

²² Bo bokhe thi ba, Hamyayaba leng! Nini jarni grao jang ning, ang ning khe gajai ri du! Ang ning khah raoyaba subung, jarni niyayaba khe layaba ar gaiyayaba ha rayaba thihi ning mithi du na?

²³ Ode thikhala, ning sumjabani ani rang khe bephar ni noh ha dengya ba? Ang phaiphin ba ha, sut jang ang mai kha mu!

²⁴ Oraha songyarao khe bo thi ba, Boni ha dongyaba gajaoni rang botho masi khe, bo ni phrang se lang lah, ar gajao ni rang majhi dongyaba niha ri lah.

²⁵ Thikhabo, bonsi bo khe thi ba, Gedema, bo la rang botho majhi mai kha!

²⁶ Bo thiphin ba, “Ang nisi khe thi du, sere niha dong, bonthane baosing ri nang. Ar sere niha giri, boniha dongyaba khebo, bo ni phrang lang lama se.

²⁷ Thikhabo, bonsini basao ha ang khe raja jamane maniyayarao khe eraha labu hi, ani sagang ha bonsi khe sthai lah.”

Jisu Jerusalem ha hapsing ba

²⁸ Bo grao khe sainthi blaihi Jisu saganghi Jerusalem gede thang ba.

²⁹ Bethphage jang Bethani nolei rogong ni Oliv hading ha, bonsi sohi dada, bo jarni rikphayarao ni bising ha, subung gini khe haiha ba.

³⁰ Bo bonsi khe thi ba, Nisi ni sagang phrang song nolei ha, thang lah, nisi sohi kha ning, mihleng basa, boni basao ha saosi bo gaba giriyaba, masi khe nisi nu nang; bo khe khru dada eraha labu lah.

³¹ Asaba bo, sumjabani bo khe nisi khru ba thihi nisi khe sing re thikhade, slingriya bo khe nang du thihi bo ni ha thi lah.

³² Ode, haihayarao thang la kha. Bonsi niha sainthiba lai ning khrip khe bo bonsi nuhi kha.

³³ Mihleng basa khe khrusaiba ha, bubra bonsi khe thi ba, Sumjabani nisi bo khe khru ba?

³⁴ Bonsi bo khe thiphin ba, Gabra bo khe nangjao du.

³⁵ Ode, mihleng khe Jisu niha sikbu hi labu dada, bonsini rih khe mih ni basao ha yen hi Jisu khe ga ri ba.

³⁶ Bo gahi thangba ha, subung buthu bonsi ni rih khe lama ha yen phalang ba.

³⁷ Jerusalem ha sophai ma ja ba ha, Oliv hading ha thangmani, lama sohiba ha boni rikphayarao khrip bo, boni khusi gmang thaosisi khe nuhi, bonsi khrip bo khaja ba, ar khrip bo jirik khao hi, Madai khe bakhan khlai ba.

³⁸ Gabra ni bumu jang phaiyaba Raja bakhan ja thing. Sorgo ha shanti dong thing, basaothao ni muima ja thing!

³⁹ Subung buthu githim laiyarao ni bising ha, Pharisairao gejesi Jisu khe thi ba, Slingriyah, nini rikphayarao khe phirik phirik dongma sani lah.

⁴⁰ Jisu thiphin ba, Nisi khe ang thi du, bonsi phirik phirik dong re thikhade, longthai buthu bo jirik khao ma se.

Jisu Jerusalem ni basao ha gra ba

⁴¹ Bo sampha phaihi nolei khe nuba jang, bo gra ba.

⁴² O! Ning bo shanti ni grao khe tharmai kha de ham nang mu dou! Thikhabo, duha la ning bo khe nuphuya kha.

⁴³ Nini sotrurao, nini basaoha sersi giding gading hi khrip gede ni phrang ning khe gaso mane basain sophai nang.

⁴⁴ Nini bising ha dongyaba ansarao ar ning bo dangkhlai jaohi dong nang; ar nini khorong ni longthai thaisi bo gurungya hi dong nang niya, sumjabani thikhala, ning khe sogo mane Madai phai bani bubli khe ning mithiya.

Jisu Madaikhoh gathar khlai ba

⁴⁵ Odehe, Jisu Madaikhoh ha hap hi, oraha bephar khlaiyarao khe rikhlai thar ba.

⁴⁶ Bo bonsi khe thi ba, Ani noh de bimani noh se thihi reb du. Thikhabo, nisi la bo khe makhaorao ni thimkhoh slam kha.

⁴⁷ Sain midi bo Madaikhoh ha slingri ba. Jonthairao ar Dara khe slingriyarao ar Pharisairao bo khe sthai ma bao ba.

⁴⁸ Thikhabo, subung buthu khah jang muh jang bo sainthiyaba grao khe khnabani, bo khe bonsi musi khlai phuya.