LUKE 13 - DARA GADAIN N.T. with PSA and PRO (BSI)

Khah phinma ni sibringthai

¹ Bo bubli ha, subung gejesi phaihi, Galili subungrao ni khlai hi gibin gibin thih khe Pilat gibring bani grao khe Jisu niha sainthi ba.

² Bo bonsi khe thiphin ba, Olei sthaibani dukhu nangba la, bonsi Galili ni khrip subungrao thane bonsi khe hamyadao bao ba?

³ Niya dou! ang nisi khe thidu, nisi jarni phap ni phrang khah phinya thikhade, nisi bo olei ning ja tharma se.

⁴ Siloam nohju jang subung jhijai khe baiphip jaoyarao la, Jerusalem ha dongyarao gibin khrip subung thane phaphi thihi nisi bao ba?

⁵ Phaphi nidaoya! Ang nisi khe thi du, nisi khah phinya thikhade, olei ning gma thar ma se, ode thiba.

Bathai thaiyaba thaikhrao phang ni daogari

⁶ Odehe, ebo daogari grao khe bo sainthi ba, Subung saosi, jarni grep bari ha thaikhrao phang masi gai ba. Bo boni bathai khe smai ba, thikhabo bo musi maiya.

⁷ Odebani, grep bari naisoya khe bo thi ba, ‘Nai lah, maithai thamni bising ha, ebo thaikhrao phang ha ang bathai smaiphai du, thikhabo musibo nuya. Odebani bo khe bokhla lah. Sumjabani hah gmahi dongpha lang ma?’

⁸ Thikhabo, bari naisoya thiphin ba, Gedema, maithai si dongda la thing, boni sersi giding ha hah jao dada, ang haphlam luding nang.

⁹ Ode phaiginyaba maithai ha thai re thikhade ham nang, thaiya re thikhade, ning bo khe bokhla lah.

Lenggo Basain ha ham riba

¹⁰ Lenggo Basain khali, sunagog noh masi ha Jisu sling ri ba.

¹¹ Maithai jhijai saoha sgo gajaoyaba masainjik saosi oraha gong jro jro dong ba, hamsisi beleng hi song phuya.

¹² Jisu bo khe nuhi long ba, Masainjik, nini sao hamphin kha!

¹³ Bo boni bokhro ha, yao dengba jang, bo beleng theng theng songkhu kha, ar bo Madai khe bakhan khlai ba.

¹⁴ Jisu, Lenggo Basain ha bo khe ham riba ni, sunagog ni hoja thamsi baigo ba. Bo subung buthu khe thi ba, Khusi dang mani jinthane saindo dong, bo basain buthu ha phai hi nisi ham ri la, Lenggo Basain ha de niya hi!

¹⁵ Gabra bo khe thiphin ba, Nisi giriklaiyarao! Lenggo Basain ha bo nisi jarni musu jla ar mihleng buthu khe khahi dengyaba khe, khruhi mihrung khoh ni phrang langhi, dih ling riya na somo?

¹⁶ Ebo masainjik, Abraham ni bisik khe, Soithan maithai jhijai remhi khah kha, bo khe Lenggo basain thikhabo khru nang niya?

¹⁷ Bo olei grao thiba ha, boni sotrurao khrip hamsi ning laji kha, subung buthu la bo gmang thaosisi khusi dangyaba buthu ni khlai hi hamsi ning khaja la kha.

Yaoleigrong ni daogari

¹⁸ Jisu sing ba, Madai ni raji khe sumjadi jang ang suthai hi thi ma?

¹⁹ Bo de edehe. Subung saosi, yaolei grongsi khe laha hi, jarni bariha sai ba, ode yaolei grong berehi, buphang ja hi boni bedep buthu ha dao buthu bithip thip ba lai se.

Humao ni daogari

²⁰ Bo thiphinba, Madai ni raji khe sumjadi jang ang suthai ma?

²¹ Bo de edehe. Masainjik saosi, humao khe lahahi honduri beher jang bisagin ha, hon yertharya si saphinba lai se.

Daoglap khasiba

²² Jerusalem gede thangba ha, Jisu nolei gedeba ar khasiba ha thangpha lang hi bonsi khe sling ri ba.

²³ Subung saosi boni ha thi ba, “Gedema, subung gijisa se ning goma khe mai ma?” Jisu bonsi khe thiphin ba,

²⁴ “Derga khasiba ha hapma bao lah. Ang nisi khe thi du, gabang subung hapma bao du, thikhabo hap phu nang niya.

²⁵ Noh ni bubra baija hi derga phrao bani yaohon ha de, nisi bajiha song hi, Gedema, derga khuru, thihi derga do khabo, bo nisi khe thiphin nang, Nisi braha ni subung? Ang nisi khe mithiya, bo nisi khe thiphin nang.

²⁶ Odehe, nisi thiphin nang, Jing ning jang jipha lai ba lingpha lai ba, ning ning jini nolei ni lamayung ha sling riba, nisi ode thi nang.

²⁷ Thikhabo, bo nisi khe thiphin nang, Nisi khe ang thi du, nisi braha ni subung ang mithiya, nisi hamya khusi dangyarao, ani phrang thang lah thihi thijaoma se.

²⁸ Abraham, Isak, Jakob ar Gorasalirao Madaini raji ha dongba khe nisi nu nang. Thikhabo, nisi de baji ha dong dada, dangkhlai jaohi gra ma se.

²⁹ Sainja sainjroba, sain yaoda sainyaosi ni phrang subung buthu phai hi Madai ni raji ha khamhi jilai nang.

³⁰ Yaohonthao ha dongyarao sagangthao ja nang, sagangthao ha dongyarao yaohonthao ja nang.”

Jerusalem ni basaoha Jisu graba

³¹ Olei baha Pharisairao gejesi, boni ha phai hi, bo khe thi ba, Eraha ni phrang baigo hi thang lah, Herod ning khe sthai mane smai du.

³² Bo bonsi khe thiphin ba, Nisi thang hi bo mosrong khe thi ri tha, dini habo, dakhna habo, sgo sgain khe rik khlai hi, limyarao sayarao khe ham ri nang, ar saintham ha jarni khusi khe dang blai nang.

³³ Asaba bo ja thing, duha bo, danang ha bo, gibin basain ha bo, thangpha langma se, ode Jerusalem baji ha gorasali khe sthai mani dara niya.

³⁴ O Jerusalem! Jerusalem! Gorasalirao khe ning sthaiyaba, nisi ne haihayarao khe longthai jang lemthai hi, sthaiyaba. Daoma jarni daosa buthu khe jarni bagrang bakhla ha goro phungba lai nisi ni ansarao khe ang goro phung ma bao du, thikhabo nisi maniya!

³⁵ Nai lah, nisi ni noh garjao hi thao nang. Ang nisi khe thi du, Gabra ni bumu jang phaiyaba de hamthai dong thing thiyasi de ang khe nuphin nang niya.