LUKE 11 - DARA GADAIN N.T. with PSA and PRO (BSI)

Jisu biba khe slingri ba

¹ Sainsi khali Jisu hathan masi ha Madai biba, bo bibani yaohon ha boni rikphayarao ni bising ha, saosi bo khe thi ba, Gabra, Johan jarni rikphayarao khe Madai biba sling riba lai, ning bo jing khe sling ri lah.

² Jisu bonsi khe thi ba, Nisi bikha de edehe bi lah: Jini Abai, Nini bumu gathar man ja thing, Nini raji sophai thing.

³ Nalai ni jinthane jimu ri lah.

⁴ Jini phap khe map khlai lah, Jing bo jini ha lagai dongyarao khe map khlai du, Ode jing khe naigrik ha da langpha.

⁵ Ode bo bonsi khe thi ba, Nisi ni bising ha lugu saosi dong nang, jarni lugu niha horjer ha thang dada, Lugu, hon phertham jaoba anthane ri sang.

⁶ Ani lugu gibin nolei ni phrang ani ha sophai ba ha, ani ha jima giri thire thikhade,

⁷ Bo noh bising ni phrang, Ang khe yisisi da khlai; duha de derga phrao kha, ang bo ani ansarao bo thuyam ha thu kha, ang baija phuya kha, ningthane rimane musibo giri bo olei thiphin kha de;

⁸ Ang nisi khe thi du, bo boni lugu jabani baija hi bonthane riyakha bo, bo sain ba thaoya bani bo baija hi bo khe nangjaoba lai ri nang.

⁹ Odebani ang nisi khe thi du, sain lah ode nisine ri nang, smai lah ode nisi mai nang, derga do lah, ode nisine khuru ri nang.

¹⁰ Odebani, ang nisi khe thi du, asaba sere sain re, bo mai nang; sere smai re, bo nu nang, ar sere derga ha do re, bone khuru nang.

¹¹ Nisi bupharao, nisi ni bising ha jarni basa nisi niha hon sainba ha, hon ni baslai sere longthai ri ma? Ar nah sainba ha, nah ni baslai sere jbu ri ma?

¹² Niyakha la, daodi sainba ha, yungkhangkhrai khe sere ri ma?

¹³ Nisi phaphi subung thikhabo, jarni ansaraone hamba khe riba mithi kha de, nisini bupha, sorgoha dongyaba niha sere sain re, bangdao hi Bese Gathar ri nang niya?

Jisu ar Belzebul

¹⁴ Grao jophuyayaba subung saosi sgo sgain gajaoyaba khe Jisu rikkhlai ba. Sgo sgain baigoba jang, bo subung grao jophu ba, ar subung buthu hamsi ning gmang lai ba.

¹⁵ Thikhabo, bonsini bising ha gejesi subung buthu thi lai ba, Sgo buthu ni Raja, Belzebul ning bokhe bone rikkhlai mane raothai ri ba.

¹⁶ Gibin subung gejesi, bo khe nainai mane nokhasao ni phrang sin phnu mane khusi khe boni ha khainsu ba.

¹⁷ Thikhabo, bonsini baothai khe Jisu mithi du. Odebani Jisu bonsi khe thi ba, “Asaba raji masi ha jar jang jar nanglai kha de jam la re, nokhorsi bo jar jang jar nanglai kha de bo nokhor de jam lama se.

¹⁸ Soithan bo jar jang jar nanglai kha de, boni raji bede khlai hi songphu ma? Nisi thi du, Belzebul ni khlai hi sgo sgain khe ang rikhlai du.

¹⁹ Ang Belzebul ni khlai hi rikkhlai ba thikhala, nisini subung buthu la sere ni khlai hi rikkhlai ba kho? Odebani, bonsi nisi ni basao ha bisar khlaiginyaba ja nang.

²⁰ Odebani, Madai ni yao jang sgo sgain buthu khe rikkhlai ba thikha de, Madai ni raji de nisi niha sophai kha.”

²¹ “Subung bol gnang, yaodi di dada, jarni noh khe raokhi du si de, jarni don go re.

²² Thikhabo, bo tha raodaoyaba phai hi de dada, boni yaodi salai hi dengyaba buthu khe se lang hi ron phlung re.

²³ Sere ani gede gabaya, bo de ang khe badaiba se. Ar sere anthane bojom khlaiya, bo de saiphlungba se”.

Bese gusu phaiphin bani grao

²⁴ Bese gusu de, subung ni bising ni phrang baigo hi lenggothan smai hi, dih giriyaba khrip hathan ha daobai hi, lenggo mani hathan maiya bani, bo baigo buyaba noh ha ning thangphin la nang thihi thi re.

²⁵ Sohi ba de ragao sisi sajai hi dongba khe bo nu ba.

²⁶ Odehe, bo thangba ha, gibin hamya daoyaba bese masni langpha hi bonsi oraha dong ba. Ar bo subung ni jathai, sagang thane yaohon ha hamyadao kha.

Hamthai gibi

²⁷ Jisu bo grao khe thisai baha, subung githim laiyarao ni bising ha masainjik saosi, jirik khao hi boni ha thi ba, Ning khe sathip ha dengyaba ar abudih ji riyaba ni khophal hambi.

²⁸ Thikhabo, Jisu thiphin ba, Sere Madai ni grao khe khna hi mani re, bonsi ni khophal ar hamdao kho!

Jona ni sin

²⁹ Subung buthu bojom japhaiyarao niha Jisu thi ba, Duha ni jug gadain ni subung buthu bislei hamya, bonsi gmang thaosisi sin nu mani khusi khe smai du. Thikhabo, Jona ni sin khe garhi de gibin ri nang niya.

³⁰ Bede thikhade Jona Ninevi raji rao mithi mane sin jabalai ning, Marsini Basa bo ebo jug ni subung buthu ni sin ja nang.

³¹ Sain yaosi ni Rani bisarni basain ha de ebo jug ni subung buthu jang baosi phai dada, bonsi khe gajai ja ri ma. Bede thikhade, bo hah gajain ni phrang phai hi, Solomon ni girikthai ni grao khe khna mane phai ba. Nai lah! eraha Solomon tha dedaoyaba dong.

³² Bisar ni basain ha de Ninevi ni subung buthu songhi, bonsi nisi khe gajai ri nang; bonsi de Jona ni grao khe khnahi, phap ni phrang khah phin kha. Khna lah! ang nisi khe thi du, Jona tha dedaoyaba eraha dong.

Saomang ni thaophari

³³ “Saosi bo thaophari phnang hi hah mithim ha dengya. Ode khamphlu jang bo phung khlipya; dengthan ha se deng ba. Ar hapsing phayarao boni jdanma khe nuphu ba.

³⁴ Nisi ni muthai ning nisi ni saomang ni thaophari se. Nisi ni muthai ham re thikhade, saomang khrip jdan thar nang; thikhabo, hamya re thikhala, nisi ni saomang bo andar jama se.

³⁵ Odebani, nisi ni bising ni jdanma andar jaya mane girik lah.

³⁶ Andar jaya hi nisi ni saomang jdan re thikhade, thaophari jdan ba lai, nisi ni saomang bo gibim jang jdan hi ning dongma se.”

Pharisairao ar Dara khe slingriyarao khe jo ba

³⁷ Bo grao thisaiba ha Pharisai saosi makham jimane bo khe long ba. Bo thang hi makham khalai kham ba.

³⁸ Yao suya hi jiba khe nuhi Pharisai gmang ba.

³⁹ Odebani, Gabra bo khe thi ba, Duha, nisi Pharisairao, bela ar khopra baji khe susa du; thikhabo, nisi ni bising ha de, harbaoma jang regethai gablai du.

⁴⁰ Subung gibir buthu! baji gede khe slamyaba, bising gede bo slam ba niya?

⁴¹ Thikhabo, nisi ni bising ha dongyaba khe dukhi sarao khe juru mane ri lah. Odehe, nai lah, nisi ni khlai hi khrip gathar ja nang.

⁴² Nisi Pharisairao, nisini khlaihi bakho bubain risi bi; nisi pudina, bahanda ar bari ni samlai bonlai khe majhi ha masi Madai ne ri du. Thikhabo gibi ar Madaini maya khe nangjaoya hi bo khusi buthu khe dang ba; gibin khe de nisi dangya.

⁴³ Nisi Pharisairao, nisi ni khlai hi bakho bubain risi bi; sunagog ha hamdaoyaba khamthan buthu ha kham ma, ar hathai ha nisi khlimjao ma nangjao re.

⁴⁴ Nisi ni khlaihi bakho bubain risi bi, nisi de sin riyayaba mangkhlong ni hakhor basaoha subung khe hem riba lai se.

⁴⁵ Dara khe slingriyarao ni bising ha, saosi bo khe thi ba, Slingriyah, ebo grao thiyaba de ning jing khe sijiba se.

⁴⁶ Jisu thiphin ba, “Nisi Dara khe slingriyarao, nisi ni bakho bubain risi bi; nisi malai ni basao ha, bakho risi khe bari hi, jarni yao ni yaosi jang dophama nangjaoya.

⁴⁷ Nisi ni khlai hi bakho bubain risi bi, nisi ni phagararao gorasali rao khe sthai ba. Nisi bonsi ni mangkhlong khe majang sisi slam du.

⁴⁸ Sthaijaoyarao ne nisi mangkhlong slam hi, nisi ni phagrarao khusi dangyaba khe nisi jajao ba.

⁴⁹ Odebani, Madai ni girikthai ni laisi ha thi du, ang nisi ni gorasali ar haiyasa khe haiha ma, ar bonsi khe nisi sthai nang, ar gibin khe de nisi dukhu ri nang,

⁵⁰ ode habsao sangsai jenba ni phrang sthaiyarao ni baslai ebo jug ni subung buthu ni basao ha la ma.

⁵¹ Ang nisi khe thi du, Abel khe sthaiba ni phrang, khapra jang hathan gathar ni gejer ha, Jakaria khe sthai ba sosi, bonsini thih ni baslai khe ebo jug ni subung buthu ni basao ha la ma.”

⁵² “Dara khe slingyarao, nisi ni bubain risi bi. Girikthai ni chabi de nisi niha dong, thikhabo nisi jar la hapma nangjaoya, ode oraha hapma baoyarao khebo nisi mathao re”.

⁵³ Jisu oraha ni phrang thangbani yaohonha Pharisairao ar Dara khe slingriyarao, boni basao ha hamsi ning thamsi baigo ba, ar gibin gibin grao khe sing hi,

⁵⁴ boni grao jang bo khe gajai rihi rem mane phasa naihi ning dong ba.