KOLOSSA 4 - DARA GADAIN N.T. with PSA and PRO (BSI)

¹ Bubrarao, nisi bo sorgo ha saosi bubra dong thihi wainso hi, nisi ni lengrao ni basao ha gibi jang majang sisi yaowai lah.

Sibringyaba ni grao

² Thaoya hi Madai bi dada, khajama ni grao thi hi khiyal khlai lah.

³ Ode, jing khe bo Madai bi ri ha; Madai ni grao khe sainthi mani khlai hi anthane derga khuru ri mani, ang phatho ha dong bani balam ha, Krista ni grao makhao khe thaoya hi bai phalang mani,

⁴ ang sainthi ma baoba lai ang sainthi phu mani anthane Madai bi ri hah.

⁵ Hajora khe baraipha lang hi lonyayarao ni bising ha girik hi dong lah.

⁶ Khrip subung niha bedehe grao thiphin blai ma thihi nisi tharmai phu mani khlai hi, nisi ni khuh ni phrang grao baigoyaba de sem sengyaba, khasaoma gnang ja thing.

Khlimthaoyaba

⁷ Tukik ning ani balam ha khrip khe nisi niha phai hi bo thi nang. Bo de, jini daphlung hamba dangyasa, lonma gnang ode Gabra ha ang jang baosi dangpha laiyaba lugu se.

⁸ Odebani khlai hi se, bokhe nisi niha ang haiha ba; jini balam ha nisi tharmai phu mane ode nisi ni khasu ha khah santi riphu mane khlai hi,

⁹ bo jang baosi, nisi ni bising ni subung khe ning Onesima, jini daphlung, lonma gnang hamba khe jing haiha du, bonsi ning ejang gede ni grao ni balam ha nisi niha sainthi thar nang.

¹⁰ Ang jang baosi phatho ha dongyaba Aristarka thiyaba, nisi khe khlim ha du; Barnaba ni busuthai Markabo nisi khe khlim ha du, (sere ni balam ha nisi ne khna riba bo nisi niha phai du, bokhe nisi hamsisi lamjao lah).

¹¹ Joshua, Jasta thiyaba bo nisi khe khlim ha du. Bonsi se ning Madai ni raji ha ang jang khusi dangpha laiyarao ni bising ha bujuh rasoyaba subung de, bonsi se ang khe shanti riyaba ja re.

¹² Nisi ni bising ni subung, Krista ni dangyasa, Epaphrabo nisi khe khlim ha du. Madai ni hamjaoma ha khrao jahi ode lonma khe kha thik thik lahi nisi songphu mani khlai hi nisi ne blai ba lai thaoyasi bo Madai bi riyaba se.

¹³ Nisi ne khlai hi ode Laodikei ha dongyarao ne khlai hi ode, Hierapolis ha dongyarao ni khlai hi bo hamsi ning khusi dangyaba khe ang sakhi ri du.

¹⁴ Daktor hamdao thaoyaba Lukabo, nisi khe khlim ha du, Dema thiyaba bo nisi khe khlim ha du.

¹⁵ Laodikei ha daphlung dongyarao khe anthane khlai hi khlim riha lah; Numpha ode boni noh ni longjom bojom jayarao khebo anthane khlai hi khlim riha lah.

¹⁶ Ebo laijma khe nisi ni bising ha nisi phuri blai bani yaohon ha, Laodikei ni longjom khebo nisi phuri ri lah; ode Laodikei ni phrang laijma phaiyaba khe nisi bo phuri lah.

¹⁷ Ode Arkippa niha ning, Gabra ni phrang khusi dang mane ning maiyaba khe phura khlai mane girik lah, thihi sainthi lah.

¹⁸ Ang Paul ning ebo khlimyaba khe ani yao jang ning ang reb ba se. Ani sikol buthu khe wainso ha lah. Khasaoma nisi jang baosi dongpha thing.