KOLOSSA 1 - DARA GADAIN N.T. with PSA and PRO (BSI)

Khlim ba

¹ Paul, Madai ni nangjaothai lai Krista Jisu ni Apostol ode jini buphlung Timothe ni phrang,

² Kolossa ha Krista ni subung gatharrao ode daphlung lonma gnangrao niha: Jini bupha Madai ni phrang khasaoma jang shanti nisi jang baosi dongpha thing.

Khajama ni grao jang biyaba

³ Nisi ni khlai hi jing Madai biyaba buthu ha, jini Gabra Jisu Krista ni bupha, Madai niha khajama ni grao khe jing gabang ning thi du.

⁴ Krista Jisu ha nisi ni lonma ode subung gatharrao khrip ni khlai hi hamjaoma nisi maiyaba khe jing khna bani ode,

⁵ sorgo ha nisi ne asa dengyaba dong bani se nisi ja ba. Ebo grao khe, sagang ha ning hamba graojma grao gibiyaba khe nisi khna kha.

⁶ Bo hamba graojma khe habsao khonglang ha hamthai sophai hi bo gublung phalang hi, olei jasosi ning nisi niha bo sophai kha. Gibi jang Madai ni khasaoma khe gainsong hi nisi hamsisi mithi bani basain ni phrang se nisi niha bo bathai thai hi bara phalang ma.

⁷ Epaphra, jini leng khusi dangpha laiyaba gibi ni phrang nisi slingba ring lakha lai ning. Bo de jini baslai ha Krista ni khusi dangyasa lonma gnang se.

⁸ Ode, bese ni hamjaoma nisi niha dongyaba grao khe bo ning jinthane khna rithar kha.

⁹ Odebani, bese gede ni gyan ode bujima gnang khrip ha Madai ni nangjaothai bujima ha nisi gablai phu mani khlai hi, jing khna khali ni phrang, nisi ne khlai hi, nisi ne sain rihi, bi riba khe jing haigerya.

¹⁰ Khrip jadi hamba khusi dangyaba ha bathai thai hi, Madai khe basao mithi bani balam ha dedao phalang hi, khrip ha bokhe khah khusi khlai mane Gabra ni yaohon rikphaya hi nisi dongphu mane ode,

¹¹ khaja hi khah laoma jang dukhu suiyaba khrip jadi nisi maiphu mani khlai hi, boni muima raothai lai ning, khrip jadi ni raothai ha nisi bol rao lahi dongphu mani khlai hi nisi khe jing khainsu ha du,

¹² ode, bupha ni, jnama ha subung gatharrao ni don phantha maipha jahi jing khe slamyaba niha khajama ni grao thihi ning dong lah.

¹³ Bo ning andar ni hukhum ni phrang jing khe sogo hi, boni basa hamdaothao ni raji ha jing khebo gakhu ri kha,

¹⁴ boni ha ning jing goma mai kha, jini phap buthu ni map khe.

Krista ni dongthai jang boni khusi

¹⁵ Krista de nuphuyayaba Madai jang baosi se, khrip jinis slamyaba ni basa sagra se.

¹⁶ Bo ning khrip jadi khe sangsaiba se. Sorgo ha dongyaba buthu khe, phirthi ha dongyaba buthu khe ode, nuphuyaba ode nuphuyayaba buthu khe, Raja jayaba buthu bo, raothai buthubo, khrip khe boni dara jang bonthane khlai hi ning bo slam ba se.

¹⁷ Khrip dongma ni sagang ha ning bo dong, ode boni ha ning khrip jadi jinis khah jomthar hi dong ba.

¹⁸ Bo longjom ni bokhro se, longjom boni saomang se; bo ning khrip jadi khe jenba se. Khrip ha bo judaothao japhu mani khlai hi, subung githi ni gejer ni phrang baija phinyaba ni hoja se.

¹⁹ Bede thikhade, bupha ni nangjaoma ebo ning ja kha, Madai ni sothar si khrip jadi boni ha dong ba.

²⁰ Boni kross ni bithi jang ning milima slam hi, boni dara jang khrip jadi phirthi ha dongyaba buthubo, sorgo ha dongyaba buthubo, jar jang baosi mili ri la kha.

²¹ Asaba bubli ha nisi bo hamya khusi dangba ni Madai ni phrang dangkhlai jao hi dong ba, nisi ni khah habo sotru jahi nisi dong ba.

²² Thikhabo, duha de boni basa, saomang ha thiphai bani khlai hi, jarni sagang ha ning gathar ode, mukhang gibin jaya ar musi gajai giri hi, bonsi ne nisi khe phnu ri mane bo jang baosi miliphin ri kha.

²³ Odebani, lonma ha ning asa deng hi rao dada nisi dong ma nang du. Bo hamba graojma khe nisi mithi ma nangjaoyaba ni phrang degaoya hi dong lah. Bo hamba graojma de nokhasao bakhla ha khrip jinis sangsaiyaba ni gejer ha baipha langyaba ning ja kha, bo khusi dang mani slamjaoyaba de ang Paul ning ja kha.

Longjom ne khlai hi Paul khusi dangyaba

²⁴ Duha nisi ni khlai hi dukhu rijaoyaba ha ang khaja du, bede thikhade Krista ni dukhu lagai thaoyaba khe, boni saomang ni khlai hi ang phura khlai du, boni saomang de longjom se.

²⁵ Ode, Madai ni grao khe phura mithi phu mani khlai hi nisi khe naiso mani khusi anthane Madai riba lai ning longjom ni khusi dangyasa ang khe slam kha.

²⁶ Bo Madai ni grao khe gda ni phrang gabang greng sosi grao makhao hui hi deng ba, thikhabo duha de boni subung gathar rao niha phnu kha.

²⁷ Bo subung buthu niha de Jentailrao ni bising ha grao makhao ni muima ni muilo khe Madai ning tharmai rima nangjaoba se; bo grao makhao de Krista nisi niha dongyaba ni muima asa jayaba se.

²⁸ Odebani, jing baipha langyaba de bo ning ja kha, khrip subung Krista ha phura jing phnu riphu mani khlai hi, khrip jadi gyan yaowai hi, khrip subung khe bujai hi jing sling ri du.

²⁹ Ebo ni khlai hi, bo ning ani ha boni raothai jang khusi dangba ni khrip bol khe sing hi blaiba lai lai jing dukhu khlai ba se.