JOHN 9 - DARA GADAIN N.T. with PSA and PRO (BSI)

Hajaiba ni phrang gana khe ham riba

¹ Jisu thangba lamai ha, hajaiba ni phrang gana jayaba subung saosi khe bo nu ba.

² Boni yaohon rikphayarao boni ha sing ba, Rabbi, hajaiba ni phrang gana jayaba la, sere phap khlai ba, bo ning khlai ba na boni bupha-buma khlai ba?

³ Jisu thiphin ba, Ebo subung phap khlaiya, boni buma-bupha nebo phap khusi dangya. Boniha Madai ni khusi dangyaba khe nujao mani khlai hi se ja ba.

⁴ Sain dongdu si, ang khe haihayaba ni khusi buthu khe jing dangma nang ma; hor phaisai du, bo bubli ha saosibo khusi dangphu nang niya.

⁵ Ang habsao ha dongdu si, ang habsao ni jdanma se.

⁶ Ebo grao buthu thibani yaohon ha, hah ha khudi thuphra hi, khudi jang didap slam hi, muthi ha didap khe hu hi thi ba,

⁷ Thang lah, Siloam dihkharnai ha susa tha. (Siloam ni ortho de haiha jaoyaba se). Odehe, bo thanghi boni mukhang suba, ar muthai nu dada phaiphin ba.

⁸ Boni noharirao ar bokhe yao ajao jihi dongba khe nudayarao thi ba, Ebo subung la yao ajao jiyaba niya?

⁹ Sereba saosi subung thi ba, Bo bo ning; gibin subung thi ba, Niya, bo jang baosi nuyaba se. Bo thi ba, Ang ning bo se.

¹⁰ Bonsi bokhe sing ba, Bede khlai hi duha ning nuphin phu kha?

¹¹ Bo thiphin ba, Jisu thiyaba subung didap slam hi, ani muthai ha huhi, Siloam dihkharnai ha su tha thi ba, odehe ang suba jang ang muthai nu lang la kha.

¹² Bonsi boni ha sing ba, Bo braha dong ba? Bo thiphin ba, Ang mithiya.

Pharisairao nai nai ba

¹³ Bonsi sagang ni gana subung khe Pharisairao niha lang ba.

¹⁴ Jisu didap slamhi boni muthai nu ribani basain de Lenggo Basain se.

¹⁵ Pharisairao bo bede jahi boni muthai nu riba bokhe sing ba. Bo bonsi khe thiphin ba, Ani muthai ha didap huba, ang su kha, ang nu lang la kha.

¹⁶ Pharisairao khrip bo thi ba, Bo subung Lenggo Basain khe maniya bani Madai ni phrang baigoyaba niya. Gibin subung thi ba, Subung hamyayaba elei gmang thaosisiyaba khusi buthu khe bede dangphu ma? Odehe, bonsi ni bising ha degao hi thang la kha.

¹⁷ Bonsi gana khe singphin ba, Ning bede bao du, nini muthai ham riyaba khe? Bo thiphin ba, Bo gorasali se.

¹⁸ Muthai nu riyaba khe gana se, bo muthai nuriya kha thihi, boni buma-bupha khe longhaya si de Judarao boni balam khe lonya.

¹⁹ Odehe, boni buma-bupha khe sing ba, Ebo subung nisi ni basa, hajaiba ni phrang gana jahi hajaiyaba na? Duha bede khlai hi nu phu kha?

²⁰ Boni buma-bupha thiphin ba, Ebo jini basa se thihi jing mithi du, bo gana jahi hajai ba thihibo mithi du.

²¹ Thikhabo, bede jahi duha nuphu kha thihi jing mithiya; bokhe sere nu riba bo jing tharmaiya. Bokhe sing lah, bo khrao jakha, jarni grao jar thi thing.

²² Judarao khe khinbani khlai hi boni buma ar bupha olei thi ba; Bo de Krista se thihi maniyaba khe bonsini sunagog ni phrang rik khlaima thihi Judarao thilai ba.

²³ Odebani khlaihi se, boni buma-bupha Bo khrao ja kha, bo khe sing lah thihi grao thilai ba.

²⁴ Odehe, alang gin khlai hi gana jahi hajaiyaba khe longphin hi, bokhe thi ba, Ning Madai khe bakhan ri lah. Ebo subung phaphi se thihi jing mithi du.

²⁵ Bo thi ba, Subung phaphi na niya ang mithiya. Grao masi khe de ang mithi du: gana jahi ang dong ba, thikhabo, duha ang nuphu kha.

²⁶ Bonsi boni ha thi ba, Bo bedehe nini khlai hi dang ba? Bede khlai hi nini muthai buthu nuphu kha?

²⁷ Bo thi ba, Ang nisi khe thi kha, nisi la khnama nangjaoya. Sumjabani duha nisi khna ma nangjao phinba? Nisibo boni slingriyarao jama nangjao du?

²⁸ Bonsi bokhe johi thi ba, Boni slingriyahsa de ning se ning, jing de Moses ni slingriyarao se.

²⁹ Madai Moses khe grao thidu thihi jing tharmai du, thikhabo, ebo subung la braha ni phrang phai ba jing mithiya.

³⁰ Bo subung bonsi khe thiphin ba, Eboni khlai hi se ebo gmang thaosisi grao ja ba! Braha ni phrang bo phaiba thihi nisi mithiya, thikhabo ani muthai khe nu riba!

³¹ Madai phaphirao ni grao khe gainsongya thihi jing mithi du; ar bokhe man khlaiyarao ar bo nangjaoyaba khusi khe dangyarao khe bo gainsong du thihi tharmai du.

³² Phirthi phalang sangsaiba ni phrang saosi bo hajaiba ni phrang muthai gana khe nu riba thihi khna ba giri.

³³ Ebo subung Madai ni phrang phaiya thikha la, bo musi khlai phu nang niya.

³⁴ Bonsi thiphin ba, Ning phap jahi se ning hajai ba, ar ning jing khe slingri ma kho? Odehe, bonsi bokhe sunagog ni phrang rikhon khla ba.

Bese ha gana

³⁵ Bokhe bonsi rikhonba thihi Jisu khna khali ha, bokhe smai hi boni ha thi ba, Madai ni Basa khe ning lon du?

³⁶ Bo thiba, Gedema, bo la sere? Bokhe ang lonphu mani khlai hi ang khe thi lah.

³⁷ Jisu bokhe thi ba, Bokhe ning nu la kha, ning jang duha grao sainlaiyaba ning ja kha.

³⁸ Bo thiba, Gabra, ang lon du, thihi bokhe khlim ba.

³⁹ Jisu thiba, Ebo basao ha bisar khlai mane ang phai ba, ganarao muh nujao mane ar muh nuyarao gana jamane.

⁴⁰ Boni rogong ha Pharisai khrip dongyarao bo grao khe khna hi, boni ha thi ba, Jingbo muthai gana na?

⁴¹ Jisu boniha thi ba, Nisi gana jare thikhade, nisi niha phap dong nang niya, thikhabo, duha nisi jing nu phu kha thihi thibani khlai hi nisi niha phap dong kho!