JOHN 8 - DARA GADAIN N.T. with PSA and PRO (BSI)

Gaori masainjik khe rem ba

¹ Jisu de Oliv hading ha thang la kha.

² Phorong ha sangga ning bikhoh ha phaiphin ba. Subung gabang boni sersi giding bojom ja ba, boha kham hi bonsi khe bo sling ri ba.

³ Dara khe slingriyarao ar Pharisairao masainjik saosi, gaori jahi dongba ha remhi labu hi, khrip ni sagang ha song ri ba.

⁴ Bonsi boni ha thi ba, Slingriyah, ebo masainjik gaori jahi dongba ha rem kha.

⁵ Dara ni laisi ha, elei dongyaba masainjik khe longthai jang lemthai mane Moses hukhum ri kha. Ning la, bedehe bao du? thihi sing ba.

⁶ Ebo khe bonsi bokhe nainai mane se dang ba, bo gajai se thihi thiphu mane khlai hi se dang ba. Jisu gonggalai hi yaosi jang hah ha reb ba.

⁷ Bokhe grao singhi bonsi oraha songhi dongba ha, bo songkhu hi bonsi khe thi ba, Nisi ni bising ha sere niha phap giri, sagangthao ha bo bokhe longthai lem thing.

⁸ Odehe, gonggalai phinhi hah ha reb phin ba.

⁹ Boni grao khe khna hi, raodao thaoyaba ni phrang jenhi, khrip bo thangthar la kha. Oraha songhi dongyaba masainjik jang Jisu se ning thao si ba.

¹⁰ Odehe, Jisu songkhu hi masainjik khe thi ba, Masainjik, bonsi braha thangthar kha? Saosibo ning khe dang gajai thihi maniya na?

¹¹ Bo thi ba, Gabra, saosi nebo ang khe dang gajai thiya. Jisu boniha, Angbo ning khe dang gajai thihi bisar khlaiya. Thang lah, duha ni phrang phap khusi da dang phin si, thihi thi ba.

Jisu habsao ni jdanma

¹² Jisu bonsi niha grao thiphin ba, Ang ning habsao khe jnama riyaba se. Sere ani yaohon rikpha du, bo andar ha dong nang niya, jnama ni hayu ha se bo dong ma.

¹³ Pharisairao boni ha, Ning jarni grao khe se ning thi riba, nini thiyaba grao de mosol se, bonsi ode thi ba.

¹⁴ Jisu bonsi khe thiphin ba, Ang jarni grao se ning thidu, ani grao sainthiyaba gibi se. Bede thikhade, braha ni phrang ang baigo ba, ar braha thangma ang mithi la du.

¹⁵ Marsi ni dara jang nisi bisar khlai du, ang de saosi khebo bisar khlaiya.

¹⁶ Ang bisar khlaima nang re thikhade, ani bisar gibi jama se; sumjabani thikhala, bisar khlaiyaba ang sao jang niya, ang jang ang khe haihayaba Bupha se.

¹⁷ Nisi ni dara habo, subung gini ni sakhi de gibi se thihi rebyaba dong.

¹⁸ Ang jarni grao khe sainthi du, ani sakhi de ang khe haihayaba Bupha se.

¹⁹ Odebani, bonsi boni ha, Nini Bupha la braha? thihi bokhe sing ba. Jisu bonsi niha, Nisi ang khe mithiya, ani Bupha khebo mithiya. Ang khe nisi mithi kha de, ani Bupha khebo nisi mithi nang mu, thihi thiphin ba.

²⁰ Bo grao buthu de Madaikhoh ni khrangphain dengthang ha slingriba ha bo thi ba. Thikhabo, boni bubli sophaiya bani bokhe saosi bo remya.

Braha ang thangma, ning thangphuya

²¹ Phinsi Jisu bonsi niha thiba, Ang thangla ma, ode nisi ang khe smai ma, thikhabo nisi nisini phap jang thih ma. Ang thangyaba ha nisi thang phuya.

²² Judarao thi ba, Bo ang thangyaba ha nisi thangphuya thihi thiyaba ni ortho snadi? Bo jar khe jar sthaima bao ba? thihi bonsi thi ba.

²³ Jisu bonsi niha thi ba, Nisi de phirthi gede ni phrang baigoyaba se, ang de basao gede ni phrang akhai buyaba se. Nisi de ebo habsao ni subung se, ang de ebo habsao ni subung niya.

²⁴ Odebani se, ang nisi khe, nisini phap jang thihma thihi thi kha, ang snadi khe thihba nisi lonya khade, nisini phap ha ning nisi thihma se.

²⁵ Bonsi boni ha, Ning la sere? thihi thi ba. Jisu thiphin ba, Jenba ni phrang ang nisi khe thi ba.

²⁶ Nisi ni balam ha grao gabang thimane ar bisar khlai mane dong ba. Thikhabo, ang khe haihayaba de gibi se, bo ni phrang ang khnayaba grao se ning ang habsao ne sainthi ba.

²⁷ Bupha ni grao khe se bonsi niha thiba thihi bonsi tharmaiya.

²⁸ Odebani, Jisu bonsi niha, Nisi Marsi ni Basa khe suguba ha bode ang ning thihi nisi tharmai nang, ode ang jarni baothai jang musi khlaiya, thikhabo Bupha ang khe sainthi ba lai ning ang grao sainthi ba se thihi nisi tharmai nang.

²⁹ Ode, ang khe haihayaba de aniha dongpha du; bo ang khe sao jang de dang khlaiya, sumjabani thikhala bo khe khaja riyaba khusi khe ning ang nalai dang du, thi ba.

³⁰ Ebo grao buthu khe bo thibaha gabang subung bokhe lon kha.

Grao gibi nisi khe golam rima

³¹ Bokhe lonyaba Judarao niha Jisu thiba, Ani grao ha nisi dongsong kha de, gibi jang ani slingriyarao ja ma.

³² Ode, gibi khe nisi tharmai nang, ar gibi nisi khe golam rima se.

³³ Bonsi thiphin ba, Jing Abraham ni sarik-surik se, saosi ni leng jahi jing dongya. Nisi khe go rima thihi ning thiyaba khe sum bedehe ning thi ba?

³⁴ Jisu bonsi khe thiphin ba, “Ang gibi jang nisi khe thi du, sere phap khusi dang re, bo phap ni leng se.

³⁵ Leng de noh ni subung jahi dongsongya, thikhabo basa de nalaibo noh ha dong du.

³⁶ Odebani, basa nisi khe golam rikha de, gibi jang nisi golam mai ma se.

³⁷ Nisi Abraham ni sarik-surik se thihi ang mithi du; thikhabo, nisi ang khe sthaima bao du, bede thikhade ang grao thiyaba khe nisini khah ha dongya.

³⁸ Ang de ani Bupha niha jinis nuyaba khe nisi niha ang sainthi re; nisibo nisini bupha ni phrang mithiyaba khe se nise dang re.”

³⁹ Bonsi thiphin ba, Jini bupha de Abraham se. Jisu thiba, Nisi Abraham ni sarik-surik thikha de, Abraham dangba lai khusi dangma nang re.

⁴⁰ Thikhabo, duha nisi ang khe sthaima bao du, sere Madai ni phrang khna hi gibi khe nisi niha sainthiyaba, Abraham la elei dangya.

⁴¹ Nini bupha dangba lai nisi nebo dang kha. Bonsi thi ba, Jing gaori ni basa niya, jini bupha masi se ning, bo de Madai se.

⁴² Jisu bonsi niha thiba, Madai nisi ni Bupha thikha de, nisi ang khe hamjaoma nang du, ang Madai ni phrang se phai hi ang eraha dongphai ba. Ang jarni hukhum jang phaiya, bo ning ang khe haiha ba se.

⁴³ Sum jabani ang grao thiyaba khe nisi bujiya? Ang grao thiyaba khe nisi khnaya bani se.

⁴⁴ Nisi de nisini bupha Diabol ni phrang baigoyaba sebani nisini bupha ni nangjaoma lai dang ma nangjao re. Bo de jenba ni phrang sthai baiyaba sebani bo gibi ha dongsongya, boha gibi giri bani khlai hi se. Bo de mosol grao ni bupha sebani hi, mosol grao joba ha boni bising ni phrang se mosol baigo ba; bo ning mosol se.

⁴⁵ Ang grao gibi thibani nisi ang khe lonya.

⁴⁶ Nisi ni bising ha phap ni khlai hi ang khe gajai riyaba dong? Ang grao gibi jokha bo, sumja bani nisi ang khe lonya ba?

⁴⁷ Madai ni subung de Madai ni grao buthu khe ning khna re. Nisi Madai ni phrang baigoyaba Madai ni grao buthu khe nisi khnaya hi dong re.

Jisu ar Abraham

⁴⁸ Judarao thiba, Ning Samari ni subung, sere ni bising ha sgain madai dongyaba thihi jing thiyaba de jing gibi thiba niya?

⁴⁹ Jisu thiphin ba, Ang de sgain madai dongphayaba niya; ang de ani Bupha khe bakhan riyaba se, nisi la ang khe bumu hamya khlai du.

⁵⁰ Ang jarni muima khe smaiya; thikhabo anthane man rihi ani khlai hi bisar khlaiyaba saosi dong.

⁵¹ Ang gibi jang nisi khe thi du, sere ani grao khe mani du, bo thaoglao sosibo thih nang niya.

⁵² Judarao boni ha thi ba, Duha de jing gibi jang tharmai kha, nini ha sgain madai ni bese dong. Abraham thih kha, olei ning gorasali raobo thih kha; ning la sere ani grao khe mani du, thaoglao sosi thih nang niya thihi thi du.

⁵³ Jini bupha Abraham tha dedao thihi ning jarkhe bao du? Bo thih kha, gorasalirao bo thih kha. Ning jarkhe sere thihi bao ba?

⁵⁴ Jisu thiphin ba, Ang jarne bakhan khlai re thikhade, bo majangma musibo niya. Nisi jini Madai thihi thiyaba, ani Bupha ning ang khe bakhan riyaba se.

⁵⁵ Thikhabo, nisi bokhe mithiya. Ang la bokhe mithi du. Angbo, bokhe mithiya thihi thi nang thikhade, nisi jang baosi jahi angbo mosol japha ma. Thikhabo, ang bokhe mithi du, boni grao khebo ang mani du.

⁵⁶ Nisi ni phagara Abraham ang phai mani basain khe numane khaja ba, ar bokhe nu kha ar khaja kha.

⁵⁷ Judarao bokhe thi ba, Ning nokha maithai dan bo jaya kho, ning Abraham khe nu kha na?

⁵⁸ Jisu bonsi niha thi ba, Gibi jang ang nisi khe thi du, Abraham hajaiyasa ni ha ang dong.

⁵⁹ Odehe, bo khe lem mane bonsi longthai khon ba, thikhabo Jisu thimkhao ba, ode Madai khoh ni phrang thangla kha.