JOHN 21 - DARA GADAIN N.T. with PSA and PRO (BSI)

Rikphayarao sni niha nujaophin ba

¹ Odehe, Jisu boni rikphayarao niha Tiberia sagor gede nujaophin ba. Ede he nujao ba.

² Simon Peter, Thomas (Didumas thiyaba), Nathanael, Galili ni Kana nolei ni Zebedai ni basathu ode gibin rikphayasa jang jomsi jahi dong ba.

³ Simon Peter thi ba, Ang nah rem mane thang du, Bonsi bokhe thi ba, Jingbo ning jang thangpha ma. Odebani bonsi thangba, ode rung ha ga ba, thikhabo bo horha bonsi musibo nah remba maiya.

⁴ Phorongma ha Jisu dergong ha songhi dong ba, thikhabo rikphayarao ebode Jisu se thihi bonsi mithiya.

⁵ Jisu bonsi khe thi ba, Lugurao, nisi niha nah dong? Bonsi thiphin ba, Girih

⁶ Jisu bonsi khe thi ba, Rung ni yaoda gede jeh khe sai lah, ode nisi mai nang. Bo thiba lai bonsi dang ba, ode bonsi jeh sik khuphung ja ba, bede thikhala jeh ha nah gabang nang ba.

⁷ Odebani, bo rikphayasa sere khe Jisu hamjao ba, Peter niha thi ba, Ebo Gabra se! Simon Peter boni khurang khe khnaba jang, Ebo de Gabra se! thihi rihsa khe khon hi gain ba (bo sao ha rih giri hi dong ba) ode dih ha birsing ba.

⁸ Gibin rikphayasa rung khe naidao hi jeh ha nah gablaisi nangyaba khe sik ba, bede thikhala bonsi dergong ni phrang jainya yaphri jang rjasi lai ja la phu re.

⁹ Bonsi dih dergong ha sophai hi hanggar ni wai suyaba ode boni basao ha nah ode gijisa hon dengba khe nu ba.

¹⁰ Jisu bonsi khe thi ba, Nisi duha nah remyaba khe gijisa labu.

¹¹ Simon Peter rung basao ha gahi rjasi madoh matham nah gedeba jeh gablai si nang bani jeh khe dergong gede sik khu ba.

¹² Jisu bonsi khe thi ba, Phai ode phorong ni jilai nang. Rikphayarao ni bising ha saosi bo bokhe sing raoya, Ning sere? ebo Gabra se thihi bonsi tharmai du.

¹³ Jisu bonsi niha phai hi hon khe lahi bonsi ne ri ba, ode nah khebo olei ning ri ba.

¹⁴ Thih hi baijaphin bani yaohon ha duha jang ebo phintham Jisu jarni rikphayarao niha nujao ba.

Jisu ode Peter

¹⁵ Jekhali bonsi jiblai tharlai kha, Jisu Simon Peter niha thi ba, John ni basa Simon, malai hamjaoba tha bara ning ang khe gibi jang hamjao du? Bo thiphin ba, Om Gabra, ang ning khe hamjao du thihi ning tharmai la du. Jisu thi ba, Ani melma buthu khe khrang lah.

¹⁶ Phin Jisu bokhe thiphin ba, John ni basa Simon, gibi gibi ning ang khe hamjao du? Simon thiphin ba, Om Gabra, ang ning khe hamjao du thihi ning mithi la du. Jisu thiphin ba, Ani melma buthu khe naiso lah.

¹⁷ Jisu phintham bokhe sing ba, John ni basa Simon, ning ang khe hamjao du? Peter dukhu nang ba, bede thikhala Jisu bokhe phintham sing ba, Ning ang khe hamjao du? ode bo thi ba, Gabra ning khrip khe tharmai thar la du, ang ning khe hamjao la du thihi ning mithi la du. Jisu thi ba, Ani melma buthu khe raokhi lah.

¹⁸ Gibi gibi jang ang nisi khe thi du, ansa ha de ning jengkhong kha hi jar bara ha nangjao du, oraha thang la re; thikhabo, ning raphai bani sain khali malai nini yao khe sugu nang, ode ning nangjaoyayaba gede ning khe sik lang ma se.

¹⁹ Jisu ebo khe thi rihi tharmai riba Peter bede thih thai jang Madai ni muima khlai ma. Ode Jisu bokhe thi ba, Ani yaohon rik lah.

Jisu ar gibin rikphayasa

²⁰ Peter naiphin ba ha, horni jibli ni bubli ha Jisuni khahbao gede naikhlai hi O Gabra, ning khe rem riginyaba sere? thihi singyaba, boni hamjaoyaba khe nuba

²¹ Bo khe nuhi Peter Jisu khe sing ba, Boni balam ha bede ja ma?

²² Jisu thiphin ba, Ang phaiphinya si bokhe thang rihi deng bani, nini la snadi? Ning ani yaohon rikpha lah.

²³ Bo rikphayasa thih nang niya thihi daphlungrao ni bising ha grao gublung ba. Bo de thih nang niya thihi ebo grao khe Jisu thiya, thikhabo ang phaiphinya si dongsong mani khlai hi nangjao kha de, bokhe snadi ha yaowai ma kho thihi thi kha.

²⁴ Ebo ning bo rikphayasa, sere bo grao buthu khe thi ri du, ode sere ebo grao buthu khe reb ba, ode jing tharmai du, bo thiyaba grao buthu gibi se.

Jamthaoba ni grao

²⁵ Jisu khusi dang langyaba gabang ning bang bi. Jodi bo buthu khe khrip reb thar ma thikhade, habsao habo jao nang thihi ang lonya.