JOHN 1 - DARA GADAIN N.T. with PSA and PRO (BSI)

Hayu ni graothai

¹ Jenba ha ning graothai dong ba, graothai Madai niha dong ba, ar graothai Madai se.

² Bo graothai jenba ha ning Madai niha dong ba.

³ Khrip khe jamthar si bo ning sangsai ba se. Bo sangsaiyayaba musi jinis bo giri.

⁴ Boni ha hayu dong ba, ode bo hayu subung buthu ni khlai hi jnama riyaba se.

⁵ Jnama andar ha se jdan ba, thikhabo andar bokhe mathao phuya.

⁶ Madai ni phrang haihayaba subung saosi dong ba, boni bumu Johan se.

⁷ Bo jnama ni balam ha subungrao ne sainthi mane phai ba, odese boni gede jahi khrip subung jnama khe lon mane.

⁸ Bo jar de jnama niya, thikhabo jnama ni khlai hi se ning bo saosi sakhi lai jahi phai ba.

⁹ Gibi jnama, khrip subung khe jnama riginyaba, phirthi ha sophai kha.

¹⁰ Bo phirthi ha dong ba, ode phirthi boni gede jahi se sangsai ba, thikhabo, phirthi bokhe tharmaiya.

¹¹ Bo jarni subung buthu niha phai ba, thikhabo jarni subung buthu bokhe nangjaoya.

¹² Thikhabo, bislei bokhe ajao re, ar boni bumu ha lon re; bonsi niha Madai ni sasik japhu mani hok ri ri ba.

¹³ Bonsi thihjao ni phrang hajai ba niya, saomang ni nangjaoma jang bo niya, miyahrao ni nangjaoma jang bo niya, thikhabo Madai ni nangjao ba lai se hajai ba.

¹⁴ Graothai saomang ha sophai ba, ode jini gejer ha dong ba. Jing Abai ni saosi mang mang dongyaba Basa, boni muima khe nujao ri ba, ar bo gibi ode khasaoma jang gablaiyaba se.

¹⁵ Johan boni balam ha se sakhi ri ba, ode jirik khao hi thi ba, ‘Ebo ning bo se, sere ni balam ha ang sainthi ba. Sere ani yaohon ha phaiginyaba dong, bo ang tha gabang ning dedaoyaba se; bede thikhala, ang dong bani sagang ha ning bo dong.’

¹⁶ Boni khasaoma sothar bani jing khrip bo khasaoma ni basao ha khasaoma mai ba.

¹⁷ Moses ni gede jahi Dara khe ri ba, thikhabo, Jisu Krista ni gede jahi se gibi ar khasaoma sophai ba.

¹⁸ Madai khe saosi bo nuba giri; thikhabo, Madai ni saosi mang mang Basa, Bupha jang dongyaba, bokhe mithi ri ba.

Baptisma riyaba Johan ni grao

¹⁹ Jekhali Jerusalem ni Judarao, gejesi Jonthairao ar Levi jadirao khe, Ning la sere? thihi sing rimani khlai hi haiha ba ha, ebo khe ning Johan sainthi ba.

²⁰ Musibo huiya hi bo hamsisi khlai hi jarni balam ha grao thi la ba, Ang Krista niya.

²¹ Bonsi bokhe singphin ba, Niyakha la, ning sere kho? Ning Elija? Bo thiphin ba, Ang niya. Ning la gorasali? bonsi sing ba. Bo Niya thihi thiphin ba.

²² Odehe, bonsi thi ba, Ning la sere kho? Jinthane sainthi ri lah, odese sere jing khe haiha ba, bonsi niha jing sainthi phu ma. Ning jarni balam ha snadi bao du?

²³ Gorasali Isai thiyaba grao khe lahi bo thiphin ba: Ang ning Gabra ni lama khe beleng ri lah thihi Hajengling ha saosi jirik khaoyaba khurang.

²⁴ Pharisairao ni gede jahi subung haihayarao bokhe sing ba,

²⁵ Ning Krista bo niya, Elija bo niya, gorasali bo niya, thikhala, sumjabani ning baptisma riba kho?

²⁶ Johan bonsi khe thiphin ba, Ang de dih jang baptisma ri du; thikhabo nisi ni gejer ha saosi subung songhi dong, bokhe nisi tharmaiya.

²⁷ Bo ani yaohon ha phaiginyaba se, thikhabo boni yapha ni wadu khe khru manebo ang gathaya.

²⁸ Ebo khrip Jordan dihnar ni Bethani ha ja ba, braha Johan baptisma ri ba.

Madai ni Melmasa

²⁹ Dakhna ni basain ha Johan boni gede Jisu phaiba khe nu ba, ode thi ba, Nai lah, Madaini Melmasa khe, sere phirthi ni phap khe horkhu ginyaba!

³⁰ Ebo bo ning, sere ni balam ha ang, saosi miyahsa ani yaohon ha phai du, anthane raodaoyaba se; bede thikhala ang dong bani sagang ha ning bo dong thihi thiyaba.

³¹ Ang bokhe tharmaiya, thikhabo ang dih jang baptisma ripha buba, odese bo Israel ha nujao ma.

³² Odese, Johan ebo jathai khe sainthi ri ba, Bese Gathar masi daothu lai jasosi nokhasao ni phrang birkhlai ba, ode boni basao ha baphai ba khe ang nu ba.

³³ Ang bokhe tharmaiya, thikhabo sere dih jang baptisma ri mane angkhe haiha ba, bo anthane sainthi ri ba, sere ni basao ha Bese Gathar birkhlai ba khe ode baba khe ning nu ma, bo ning Bese Gathar jang baptisma riginyaba se.

³⁴ Ang nu ba, ode sainthi ri ba, Ebo ning Madai ni Basa thihi thi ba.

Jisu ni sagangthao yaohon rikphayarao

³⁵ Dakhna ni basain ha Johan ode boni rikphayasa gini oraha songhi dong ba.

³⁶ Jekhali Jisu lailangba khe nuhi Johan thi ba, Nai lah, Madaini Melmasa bo se!

³⁷ Gini rikphayasarao ebo grao khe khna hi bonsi Jisu ni yaohon rikpha ba.

³⁸ Jisu naiphin ba ha, bonsi rikphaba khe nu ba, ode sing ba, Nisi snadi khe nangjao ba? Bonsi thiphin ba, Rabbi, ning braha dong ba? (Rabbi ni ortho de Slingriyah)

³⁹ Bo thiphin ba, Phai, ode nisi nu nang. Bonsi phaipha hi boni dongthan khe nu ba, ode okhali ha sainblini gontha bri jabani bonsi bo jang dongpha ba.

⁴⁰ Bonsi gini ni bisingha Johan thiyaba grao khe khna hi Jisuni yaohon rikpha ba, saosi jakha de Simon Peter ni buphlung Andri se.

⁴¹ Bo sagangthao ha jarni daphlung Simon khe goron hi bokhe thi ba, Jing Messiah khe nu ba. (Messiah ni ortho de Krista).

⁴² Bo Simon khe Jisu niha labu ba. Jisu bo khe nuhi thi ba, Ning Johan ni basa Simon se, ning khe Kepha thijao ma. (Kepha ni ortho de Peter).

Philip jang Nathanael khe long ba

⁴³ Dakhna ni basain ha Jisu Galili gede thang ma bao ba. Philip khe goron hi bo thi ba, Ani yaohon rikpha lah.

⁴⁴ Peter ode Andri lai jasosi, Philip bo Bethsaida nogor ni subung se.

⁴⁵ Philip de Nathanael khe goron hi bokhe thi ba, Jing bokhe goron ba, sereni balam ha Moses ni Dara ha ode gorasalirao reblangya dong ba, Nazareth ni Jisu, Josep ni basa.

⁴⁶ Nathanael bokhe sing ba, Nazareth ni phrang hamba jinis baigo phu nang? Philip thiphin ba, Phai hi nai lah.

⁴⁷ Jisu Nathanael khe jarni gede phai ba khe nuhi boni balam ha thi ba, Ebo saosi gibiyaba Israel jadi, sere niha musibo gajai giriyaba se.

⁴⁸ Nathanael sing ba, bedehe ning ang khe tharmai ba? Jisu thiphin ba, Philip ning khe long mani sagang ha ning, thaikhrao phang ni bakhla ha khamhi dongba khe ang nu ba.

⁴⁹ Nathanael bo khe thiphin ba, Rabbi, ning Madaini Basa se! Ning Israel ni Raja dedao thaoyaba se.

⁵⁰ Jisu thi ba, Thaikhrao phang bakhla ha ning khamhi dongba khe ang nu ba thihi ang ning khe thiba khe ning lon ba. Bo tha dedaoyaba khe ning nu nang kho.

⁵¹ Ar Jisu boni ha thi ba, Ang nini ha gibi gibi grao khe thi ri du, sorgo khruba khe ode deglarao Marsi ni Basa ni basao ha birkhlai phaiba-birkhu phinba khe ning nu nang.