JAKOB 5 - DARA GADAIN N.T. with PSA and PRO (BSI)

Gnangrao khe joda ba

¹ Nisi subung gnangrao, duha khna lah. Nisi ni basao ha dukhu sophai ginyaba ni khlai hi bol jang jirikkhao hi gra lah.

² Nisi ni don buthu saothar kha, nisi ni rih buthu bo yung jithar kha.

³ Nisi ni gajao buthu ode nisi ni guphu buthubo haro remthar kha, bonsi ni haro remyaba de nisi gajaoyaba khe phnuyaba ja nang; odehe wai jang jinis khamba lai, nisi ni saomang jithar jao ma se. Yaohon basain ne khlai hi nisi don bojom khlai kha.

⁴ Khna lah, nisi ni phadain ha khusi dangyarao ni mainphain buthu khe nisi mathao bani, mathao jaoyarao jirik khao du, mai rayarao jirik khaoyaba khurang siphaiyarao ni Gabra ni khmao ha so hi kha.

⁵ Phirthi ha ning nisi suk jang jar khe yaowai hi haglai basain phlai kha; nisi ham hi dongba basain buthu ha jar ni nangjaoma ha khah buthu khe phong riba.

⁶ Dormo subung khe nisi gajai ja ri hi, nisi sthai ba, thikhabo bode nisi khe badaiya.

Khah lao hi biba

⁷ Odebani daphlungrao, Gabra phaiphinya si de khah lao hi dong lah. Phadain bubra jar ni phadain ni phrang bathai khaoji mane jon ba khe nai lah. Hadi hajenyaba ar hadi hathaoyaba khe maiya si de bo jon hi ning dong re.

⁸ Nisibo khah laoma jang dong dada, nisi ni khah buthu khe rao ri lah, Gabra phaiphin mani sampha kha.

⁹ Daphlungrao, nisi gajai jaya mani khlai hi saosi jang saosi da ber lai. Nai lah, bisardar derga kholei ha song hi ning dong.

¹⁰ Daphlungrao, dukhu ha ode khah laoma ni balam ha ning, Gabra ni bumu jang grao sainthiyaba gorasalirao khe daogari nai lah.

¹¹ Blaiya si khah lao hi dukhu khlaiyarao ni khophal hambi thi hi jing thi du. Job dukhu khah laoyaba khe nisi khna kha. Odehe, Gabra ni khusi dangma baoyaba khebo nisi tharmai kha. Gabra de khasaoma jang mayama ha gablaiyaba se.

¹² Khrip tha grao dedao thaoyaba ebo se. Ani daphlungrao, smai da dang lah. Sorgo ni bumu lahi ja thing, phirthi ni bumu khe lahi ja thing, niyakhala, gibin musi jinis ni bumu khe lahibo smai da dang lah; bede thikhala, Bo jadu nisi thi khade, Jadu ning ja thing, Bo jaya nisi thi khade, Jaya ning ja thing, ode niyakhade gajai ha nisi galai ma se.

¹³ Nisi ni bising ha sereba limyaba dong? Bi la thing. Bumai nangyaba dong? Bakhan ni rajabthai khe rajab la thing.

¹⁴ Nisi ni bising ha sereba hamya dukhu jahi dong? Bo longjom ni khraorao khe long hi, bonsi Gabra ni bumu jang thao do ri hi, boni basao ha bi la thing.

¹⁵ Lonma jang bi khade, limyaba khe ham ri nang, ode Gabra ning bokhe sugu hi song ri nang, ode bo phap khusi buthubo dang khade, map jama se.

¹⁶ Odebani, ham rijao hi nisi dongphu mani khlai hi nisi jar ni phap buthu khe lang hi, saosi jang saosi khe bi ri lai lah. Dormo subung biyaba khusi gede dangphu du.

¹⁷ Elijabo jing lai ning subung se, thikhabo hadi haya mani khlai hi khah ri dada bo biba, ar nokha maithai tham daindo ni bising ha phirthi basao ha hadi haya.

¹⁸ Odehe bo biphin hi, nokhasao ni phrang hadi ha riba, ode phirthi ha samlai bonlai japhin kha.

¹⁹ Ani daphlungrao, nisi ni bising ha asaba subungbo gibi grao ni phrang degao lang khade,

²⁰ subung phaphi lama gibi niyayaba ni phrang labu phinyaba de thihyaba ni phrang boni bese khe sogo hi gabang phap khebo khlip phung rijaoma se thihi tharmai lah.