JAKOB 4 - DARA GADAIN N.T. with PSA and PRO (BSI)

Habsao jang lugu khathik khayaba

¹ Nisi ni bising ha jbah ar nam jalaiyaba buthu la braha ni phrang baigo phai ba? Nisi ni mijingma buthu, nisi ni bising ha nam jalaiyaba buthu ni phrang baigoyaba niya na somo?

² Nisi jinis nangjao du, thikhabo nisi mai phuya; odebani subung khe nisi sthai re. Nisi jinis libi du, thikhabo nisi mai phuya; nisi johi nisi nam jalai du. Nisi sainya bani maiya.

³ Nisi sain lakhabo, sainba jaya bani nisi maiyaba se, bede thikhade nisi suk khlai mani yaowaima bao ba.

⁴ Hoi nisi gaorirao! Habsao jang lugu khayaba de Madai ni sotru jaba se thi hi nisi mithiya? Sere habsao jang lugu jama nang du, Madai ni sotru ha jar khe slam laba se.

⁵ Niyakha la, Jini bising ha bese kham riyaba esilei sosi bo ang khe nangjao du, thihi Madai ni laisi ha thiyaba grao musibo niya thihi nisi baoba na somo?

⁶ Thikhabo, bode khasaoma bangdao hi bo ri du. Odebani, Madai ni laisi ha, Madai ning subung sanggayarao khe nangjaoya, thikhabo jar basasa jayarao khede bo khasaoma ri re, bo ode thi du.

⁷ Odebani, Madai ni bakhla ha hapsing lah. Thikhabo, Diabol khede nanglai lah, odese nisi khe bo dangkhlai hi khailang ma.

⁸ Madai niha sampha lah, odese bobo nisi niha sampha ma. Subung phaphirao, nisi ni yao buthu khe susa lah, nisi giriklaiyarao, nisi ni khah buthu khe gathar khlai lah.

⁹ Khah waimu nang lah, khah bai lah, ode gra lah. Nisini miniyaba de khah baima ha salai thing, nisi ni khajayaba de maoma ha galai thing.

¹⁰ Gabra ni sagang ha nisi basasa ja lah, odese, nisi khe guju sugu ma.

Daphlungrao da siji lah

¹¹ Daphlungrao, nisi saosi jang saosi hamya da thi lai. Sere jar ni daphlung khe hamya thi du, bo jar ni daphlung khe siji du, ar bo Dara khe se hamya thihi siji ba. Dara khe ning siji khade, ning Dara khe maniyaba niya, ning bisar khlaiyaba se ja ba.

¹² Dara riyaba ar bisar khlaiyaba saosi se ning dong ba, bode sogo phuyaba ar sjam phuyaba se. Ning jar ni noharirao buthu khe sijiyaba la ning sere?

Sanggaya mani thida ba

¹³ Duha khna sang, Dini ja thing, dakhna ja thing, asaba nogor ha jing thang nang, odehe oraha nokha maithai si jing dong hi, jing bephar khlai nang, ode gabang rang bojai nang, thiyarao,

¹⁴ dakhna de sum bedehe ja nang nisi tharmaiya. Nisi ni hayu la snadi? Gowal de khaisa bubli ne nujao phai du, ode srap jamphin lang laba lai jasosi se.

¹⁵ Gabra nangjao khade, jing thang hi dong nang, eraha oraha jing khusi dang nang, olei nisi thima nang du.

¹⁶ Duha de sanggama jang meser hi se jar khe asa khlai du, olei khrip asa khlaiyaba de phap se.

¹⁷ Odebani, sere hamba khusi khe tharmai hi bo dangya khade, bo phap khusi dangba se.