JAKOB 2 - DARA GADAIN N.T. with PSA and PRO (BSI)

Gibin naiya mani sibring ba

¹ Ani daphlungrao, muima ni Gabra, jini Gabra Jisu Krista ha lonma nisi asa dengyaba ha subung khe naidao naiyadao da ja lah.

² Nisi githim laiyaba ha subung saosi gajao ni yaosi dam gain hi, gainsari majangyaba khe thu dada bo hapsing phai kha la, ode dukhisa subung saosi gainsari gomor khe gain hi hapsing phai kha la,

³ Gainsari majangyaba thuyaba nisi khiyal khlai hi, bokhe, Ning de hathan hamba ha kham la, nisi thi du. Ode subung dukhisa khede, Hogora song lah, thi hi nisi thikhade,

⁴ nisi ni bising ha naidao naiyadao jayaba phap baothai layaba ni bisar khlaiyarao ja nang niya na?

⁵ Ani khasaoma ni daphlungrao, khna lah! Madai ning habsao ha suliyayarao khe lonma ha gnang jama ni ode bo jar khasaoyarao niha bo hanggaiyaba raji khe hok ni khlai hi bo saikhoyaba niya?

⁶ Thikhabo, nisi de suliyayarao khe laji se phnu du. Subung gnangrao de nisi khe suhi dohi, bisar khoh ha nisi khe sik singyaba la bonsi niya?

⁷ Bumu man jadaothao ha rihi dongyaba la bokhe sijiyarao bonsi niya na?

⁸ Madai ni laisi ha ede thi du, Ning jar khe hamjao la ba lai ning nisi ni nohharirao khe hamjao lah, thihi raja ni dara khe nisi gibi jang mani kha de, nisi hamba khusi dang kha.

⁹ Thikhabo, nisi naidao naiyadao jakha de, nisi phap khusi dangba se. Ode, nisi dara khe baiglaiyarao jahi, dara nisi khe gajai ja rima se.

¹⁰ Asaba dara khe jamthar si mani lakhabo, masi grao ha hamya khlai kha de, bo khrip ni basao ha gajai ja ma se.

¹¹ Bede thikhade, gaori da ja thiyaba de Da sthai bai, olei bo thi du. Gaori jaya la khabo, ning sthaibai kha de, ning dara khe hamya khlaiyaba ning ja kha.

¹² Odebani, sadhin ni dara bakhla ha bisar khlai hi dong ginyarao lai jasosi, grao thihi khusibo dang lah.

¹³ Khasaoma giri hi khusi dangyaba, khasaoma giri hi ning bisar khlaijao ma se. Khasaoma dongyaba subung ni khlai hi bisar ni basao ha musi khinmani giri.

Lonma jang khusi dangyaba

¹⁴ Ani daphlungrao, sereba, Ani ha lonma dong, thihi bo khusi dangya khala snadi lab ja ma? Olei lonma jang bo jar khe sogo la phu nang?

¹⁵ Daphlung ja thing, bahandao ja thing, musibo giri hi nalaibo makham ji mani baojo kha la,

¹⁶ nisi ni bising ha subung saosi boni ha, Shanti jang thang lah, ode suk jang hoh gablai hi dong lah, ode thi kha la, boni saomang ni khlai hi nangyaba buthu khe ning riya kha la, snadi lab ja ma?

¹⁷ Olei jasosi ning, lonmabo khusi dangya thikhade bo githi se.

¹⁸ Thikhabo, sereba subung, Nini ha lonma dong, aniha khusi dangyaba buthu dong, thihi thi nang thikha la, ang thi nang, Nini lonma khe gibin a ne phnu ri lah, ang de khusi danghi ani lonma khe nisi ne ang phnu ri nang.

¹⁹ Madai de saosi se ning thihi ning lon du; ning hamba khlai kha, sgain sgo buthubo lonhi lele mao du.

²⁰ Hoi gibir subung! Khusi dangya hi lonma se ning de musibo niya thihi ning mithima nangjao du?

²¹ Jini phagra Abraham jar ni basa Isak khe khapra basao ha yaopha khali, khusi dang bani khlai hi bokhe dormo ni subung se thihi baoya na?

²² Boni lonma jang bo khusi dangyaba de masi jahi boni lonma phura jaba thihi ning tharmai du.

²³ Madai ni grao jang, Abraham de Madai khe lon ba, bo lonma de bokhe dormo ha sainpha kha, thihi bo thiyaba phura sophai kha. Odebani, bokhe Madai ni lugu mani kha.

²⁴ Subung khusi dang bani khlai hi lonma se ning de jaya thi hi nisi tharmai du.

²⁵ Olei jasosi ning, sao khe phain jiyaba Rahabbo, naikhaoyarao khe jar ni noh ha lamjao hi, lama gibin gede bonsi khe haiha ba, thikhala bo khusi dang bani bo dormo subung jaya?

²⁶ Bese dong phaya khade saomang bo githi ja ba lai, khusi dangya khade lonma bo githi se.