HEBRAIRAO 7 - DARA GADAIN N.T. with PSA and PRO (BSI)

Jonthai Melkisedek

¹ Ebo Melkisedek, Salem ni Raja, Madai ni dedao thaoyaba Jonthai de, Abraham jekhali rajarao khe sthai hi phaiphinba ha, bo jang goron hi bo hamthai ri ba.

² Abraham de bokhe boni khrip jinis ni phrang majhi ha masi phantha ri ba, boni bumu ni ortho jakha de, sagangthao ha Dormo ni Raja thi du, ode Salem ni Raja thi du, ode bokhe Shanti ni Raja bo thi du.

³ Bode buma giri, bupha giri, boni grengbo giri, dong jenyaba basain bo giri, boni hayubo jamba basain giriyaba se; bede thikhade bo Madai ni basa lai se, thaoglao ni Jonthai jahi bo dongba se.

⁴ Greng Abraham jbah ni khrip yaodi hamba ni phrang majhi ha masi bo phantha riyaba khe bao lai lah.

⁵ Jonthai khusi dangyasa, Levi jadi buthu de, Dara ni grao lai, bonsi ni daphlung Israel subung buthu, Abraham ni greng ni phrang majhi ha masi ri mani grao riyaba khe bonsi mai ba.

⁶ Thikhabo, ebo subung, Levi jadi bising ni subung niyayaba, grao hanggaiyaba khe maiyaba Abraham ni phrang majhi ha masi lahi, bokhe bo hamthai ri ba.

⁷ Khasidaoyaba khe dedaoyaba se hamthai ri re thiyaba khe niyalai hi de phuya.

⁸ Eraha, Jonthai ni dara hade, thiphuyaba subung buthu se majhi ha masi mai re; thikhabo subung saosi Melkisedek ni balam hade, bo thang hi dongyaba ning majhi ha masi mai du.

⁹ Ode, majhi ha masi layaba Levi ning Abraham ni yao ni phrang Melkisedek niha majhi ha masi riba thi hi thiphu du.

¹⁰ Bede thikhade, Melkisedek Abraham khe lamjao khali, Levi jar ni bupha ni sao ha se dong ba.

¹¹ Odebani, Levi ni dara ha Jonthai jayaba khe yaowai hi phura mai phudu thi kha la, (boni bakhla ni subung buthu dara ni grao khe bonsi mai kha thi) Aron Jonthai jaba lai niya hi, Melkisedek jonthai lai jonthai gibin baigoba la, snadi nang ma kho?

¹² Jonthai ni khusi yaowaithai gibin jakha de, dara bo gibin khlai ma nang du.

¹³ Boni balam ha thihi dongyaba de gibin jadi ni subung se, bo jadi ni bising ha subung saosibo khaphra ha khusi dang mane yaowaiya.

¹⁴ Jini Gabra de, Moses Jonthai ni grao thiba ha thiphayaba Juda jadi ni subung ning thi hi ragao sisi jing mithi du.

Melkisedek lai Jonthai gibin

¹⁵ Melkisedek lai jonthai gibin baigo phai hi, ebo grao khe ar ragaodao ri du.

¹⁶ Bode saomang ni dara ha grao slamyaba grao lai niya hi, sjam phuyayaba hayu ni raothai jang se bo jonthai japhai ba.

¹⁷ Bede thikhade, boni balam hade sastro thi du, Ning de Melkisedek lai ning, thaoglao ni jonthai se, thihi bo sakhi ri du.

¹⁸ Sagang ha grao riyaba raoya bani, ode bokhe yaowaiba jaya bani bo dangkhlai kha.

¹⁹ Moses ni Dara de khrip sothar si gibi khlai thar phuya. Asa khe hamdao hi bo ri phaiyaba se, bo ning Madai jang jing khe sampha ri ba se.

²⁰ Ebo jinis de smai dangyaba niya bani, (bonsi de smai dangya hi ning jonthai slam ba se)

²¹ Thikhabo, Jisu khe hanggaiyaba ni raothai jang smai dang hi se bo Jonthai slam ba, ar Madai bokhe thi ba, Ning de thaoglao ni Jonthai se, Gabra smai dangyaba de ang slai nang niya kha. thi hi boni balam ha sainthi ba.

²² Odebani, ebo smai dangyaba ha Jisu de grao khaya ba hamdao hi gejebdao riyaba japhai kha.

²³ Bonsi bo githi ni bising ha dongsong phuma niya bani, jonthai ha gabang slam ba se;

²⁴ thikhabo, Jisu thaoglao ha ning bo dong bani bo Jonthai jayaba de thaoglao ni ja kha.

²⁵ Odebani, boni gede jahi Madai niha phaiyarao khe bo phura sogo phu du, bede thikhade bonsi ne bi ri mani khlai hi bo thaoglao ni hayu ha thang hi ning dong.

²⁶ Olei Jonthai dedaothao, gathar, musibo gajai giriyaba, ragaoyaba, ode phaphirao ni phrang gibin dongyaba, ode sorgo thabo judao hi suguyaba khe jing mai kha.

²⁷ Jonthaimarao nalaibo jar ni phap buthu khe bonsi bandai ha yaopha da hi, boni yaohon ha se subung buthu ni khlai hi bonsi yaopha phin re; thikhabo, duha de olei dangya hi, jar khe bonsi yaopha hi, khrip subung ni bandai ha thaoglao ni khlai hi bo jar khe yaopha kha.

²⁸ Dara ha subung raoyayaba khe jonthai gedeba ha saikho re, smai grao ni dara dongphai bani sothar si dongyaba khe, jonthai dedaothao ha bokhe saikho kha.