HEBRAIRAO 10 - DARA GADAIN N.T. with PSA and PRO (BSI)

Krista phin si ha bandai ri la kha

¹ Judarao ni dara de hamba jinis dongphai ginyaba buthu ni daogari se ning gibi gibiyaba niya. Odebani se maithai phorong nalai bonsi bandai yaophayarao, bandai yaopha mane khlai hi boni rogong ha phaiyarao asaba khalibo phura ja phuya.

² Phura khlaiphu khade, Madai khe maniyarao se eboni balam ha phin si ha khrip gathar khlaithar hi, phap tharmaiyaba bonsi dong nang niya kha, ode, bandai yaophayaba khe bonsi gar nang niya na somo?

³ Thikhabo, bo bandai riyaba buthu maithai phorong phap tharmaiyaba khe wainso ri phinyaba se jadao ba.

⁴ Bede thikhade, musu jla buthu ode burun buthu ni thijao jang phap buthu khe sjam phuma niya.

⁵ Odebani, habsao ha Krista phai bani bubli ha bo thi ba: Bandai riyaba buthu jang jinis yaophayaba buthu khe ning nangjaoya, Anthane khlai hi saomang se ning a ne salai ri ba.

⁶ Saomang saokhrip hi bandai riyaba buthu ode, phap bandai riyaba buthu hade gijisa bo ning khajaya.

⁷ Boha se ang thima, O Madai, Nai lah, nini nangthai khe dang mani khlai hi ang phai du. Laisi bajab thonyaba ha ani balam ni grao khe bo reb du, ang thi du

⁸ Sagang ha, Bandai buthu, jinis yaophayaba buthu, saomang saokhripyaba buthu ode phap bandai yaophayaba buthu khe ning nangjaoya, khajababo ning khajaya, thi hi bo sainthi khali bo buthu dara ni grao ha lai bonsi yaophayaba se.

⁹ Ode, ebo grao khebo bo thi du, Nai lah, ning nangjaoba lai dang mani khlai hi ang phai du. Ang phai du thiyaba de, bo yaohon ni khe raodao rima ni khlai hi bo sagang ni khebo sjam kha.

¹⁰ Madai nangjaoba lai, Jisu Krista ni saomang khe thaoglao ne khlai hi phin si ha srap yaopha kha bani jing gathar ja kha.

¹¹ Khrip jonthai sain baigoba khe sain hi, khusi dang hi bonsi song dada, nalai lai ning bonsi bandai yaopha re; thikhabo, bo bandai buthu ni phap buthu khe musi dara jangbo bonsi sjam phuya.

¹² Thikhabo, Krista de thaoglao ni khlai hi phap buthu ni bandai phin si se ning yaopha bani yaohon ha, Madai ni yaoda gede bo kham hi kha.

¹³ Boni phrang se, boni sotrurao khe jar ni yapha bakhla ha dengyasi de bo jon hi ning dong ba.

¹⁴ Jinis yaophayaba masi jang se ning, gathar khlai jaoyarao de thaoglao ni khlai hi phura ja kha.

¹⁵ Odehe, Bese Gathar bo elei ning jinthane tharmai ri hi thi du,

¹⁶ Gabra thi du, Bo basain buthu ni yaohon ha, bonsi niha grao ang khaginyaba de ebo buthu se, Bonsi ni khasu ha ani dara buthu khe ang dang nang, bonsi ni baothai buthu habo ang reb ma se.

¹⁷ Bokhe garhibo, Bonsi ni phap buthu ode bonsi ni gajai buthu khe wainso nang niya kha, ode bo thi ba.

¹⁸ Odebani, ebo buthu khe gibi jang map jakha de, phin phap ni bandai khe yaopha ma nangya kha.

Madai ni gabasi ha jing thanglai nang

¹⁹ Odebani daphlungrao, Jisu ni thijao ni balam jang hathan gathar hade,

²⁰ khitha rao hi hap phuyaba khe jing mai hi, rihjeng phungyaba, boni saomang khe lailang hi, lama gadain ode hayu khe bo jinthane khru ri kha.

²¹ Madai ni noh khor basao ha jonthai dedao thaoyaba khe jing mai kha bani.

²² Odebani, phap andar jayayaba, khah susayaba ha dong hi, saomang khebo dih thar jang susa hi, lonma ha ragao sisi tharmaiyaba gyan khe la hi, rogong gabasi ha jing thang la nang.

²³ Jing asa khlaiyaba grao gathang maniyaba khe, raothe the jing remsong lai nang, bo grao hanggaiyaba de lonma gnang se.

²⁴ Hamjaoma phnu mane ode hamba khusi dang mani jing saosi khe saosi sugu lai mane jing bao lai nang.

²⁵ Gejesi dongba lai, bojom jaba khe dang khlaiya hi, nangyaba khe dang mani khlai hi sibring lai lah. Basain sampha dao samphadao japhaiba khe nai hi ar sibringdao lai la kho.

²⁶ Gibi grao bujima khe jing mai bani yaohon habo, jing phap khusi dang khade, phaphirao ni khlai hi bandai musibo giri.

²⁷ Bo thanebo khinthao saja ni bisar, ode badaiyarao kham khripyaba thamsi ni wai de duha soya kho.

²⁸ Moses ni Dara khe maniyayaba de, gini gatham ni sakhi jang, maya doya khlaiya hi sthai re.

²⁹ Madai ni basa khe gasep hi, grao khayaba ni thijao, bo gathar khlaiyaba khe ning siji hi, khasaoma ni bese khe haglai baoyaba de, bislei saja mai nang thi hi nisi bao du?

³⁰ Baslai laba de ani khusi se, ang baslai su nang, thi du, ode, Gabra de jar ni subung buthu ni khlai hi bao ma se, thiyaba khe jing tharmai du.

³¹ Madai gathang ni yao ha galaiyaba de khinthao sisiyaba grao se!

³² Sagang ha nisi bede dong ba wainso lah. Gabra ni jnama ha nisi dong bani yaohon ha dukhu hadi nisi goron khali blaiya si blaiya si nisi dukhu ajaoba khe wainso phin lah.

³³ Sainsi khali hade, nisi sijijao ba ode dukhu rijaoyaba ni nisi mlao thalao khlaijao ba, bakhali ba ha olei dukhu khlaiyarao sakhi jahi dukhu khlaipha ba.

³⁴ Ning sikhol jang khajao hi phatho ha dongyarao ni dukhu habo dukhu khlai ba, ode jar ni don somphothibo khusi jang lang mani ri ba, ebo khe tharmai hi nini ha ar masi dedao thaoyababo dong kho thi hi mithi du.

³⁵ Odebani, jar lonsingyaba khe da dangkhlai lah; boni yaosandi de bi.

³⁶ Madai nangjao ba lai nisi dang blai hi, jinis hanggaiyaba khe nisi maiphu mani khlai hi nisi khah laoma nang du.

³⁷ Bede thikhade, sastro thi du, Khaisa bubli ni yaohon ha phaiginyaba srap phai ma ning, budu lao nang niya.

³⁸ Thikhabo, ani dormo ni subung buthu lonma ha ning thang hi dong ma se, Sere subung yaohon druphin du ani khah ha bokhe gijisabo khaja nang niya.

³⁹ Thikhabo, jing de jam mani yaohon druphinyaba dol ni subung niya, jing de lonma mai hi goyarao ni bising ni subung se.