GYAN NI GRAO BUTHU 9 - DARA GADAIN N.T. with PSA and PRO (BSI)

Girikma jang gibir ni jathai

¹ Girikma de jar ni noh khe dang re Thong gong sni bo songkhu kha.

² Mih slai hi, anggur bidi bela ha lusing kha Ji manebo basang ha salai kha.

³ Boni dangyajikrao khebo haiha hi Nogor hathan judao thaoyaba ha jirikkhao kha.

⁴ Gibirrao dongba si era ha hapla phai thi hi gibirrao khe long du.

⁵ “Phai, ani makham khe ji la phai, Ani grep bidi slamyaba khe ling la phai,

⁶ Nisi ni gibir jathai khe haiger lah, ode nisi thangma mai nang Bujima ni lama ha hem lah,” thi du.

⁷ Naijiyaba khe slingriba de laji nu re Subung hamyayarao khe joyaba de yao suguyaba goron re.

⁸ Naijiyayaba khe da jo, niya khade ning khe jajaoya ma se. Subung girikyaba khe jo lah, bo ning khe hamjao ma se.

⁹ Subung girikyaba khe sling ri khade ar girikdao ma se, Subung gibi khe sling ri lah, boni ringma bang dao ma se.

¹⁰ Gabra khe khinyaba de girik mani jen ba se. Subung gathar bujima de buji mani jen ba se.

¹¹ Bo jang ning nini hayu khe laodao ri ma se. Ning thang hi dongyaba maithai khe bangdao ri ma se.

¹² Ning girikyaba ja khade, nini girikma jang ning khe yaosandi ri ma se. Ning malai khe naisle khade, ning dukhu jang galai ma se.

¹³ Masainjik gibir ni khurang de rao bi, Bo musi baothai baoya ar boni ringma bo giri.

¹⁴ Boni noh ni derga ha kham du, Nogor ni hathan gujuyaba khamthan ha bo kham du.

¹⁵ Lamayung ha phaiyarao si khe bo long du Jar jar ni lama ha thangyarao khe long du.

¹⁶ Gibirrao dongba si eraha hap la phai. thi hi gibirrao khe long du.

¹⁷ Khaoyaba dih de gabang thao bi Phirik phirik hon jiyaba de thao bi.

¹⁸ Thikhabo, bonsi oraha thih nang thi hi bonsi tharmai laya. Longba ha phaiyarao si de mangkhlong ha thang du thi hi tharmai laya.