GYAN NI GRAO BUTHU 8 - DARA GADAIN N.T. with PSA and PRO (BSI)

Girikthai ni longma

¹ Khna lah, Girikthai ni khurang baigo du Mithi mane jar ni khurang khe baigo du.

² Lama bijing ni haphlao ha, ar lambra ha song hi dong du.

³ Nolei ni khorong daoglap ha song hi Bol jang jirikkhao du.

⁴ O subung buthu, nisi buthu khe long du, Subung marsa-marsi khna mane ani khurang baigo du

⁵ Ning subung gibirrao, nisi gyan mai lah Ning mithiyayarao, nisi mirik lah.

⁶ Khna lah, nangginyaba graothai ang nisi niha sainthi ma bang bi Gibi grao khe ang sainthi mane ani khuh khuru du.

⁷ Ani khuh de grao gibi khe se ning sainthi ba Bede thikhade, ani khujer phap khe regejao du.

⁸ Ani khuh ni khrip bisar de beleng bi Saosibo gugoi slam phu nang niya.

⁹ Bujiyayarao ni khlai hide gibi se Gyan dongyarao ni khlai hi de gajai ja nang niya.

¹⁰ Guphu khe gar hibo ani slingrithai khe saikhu lah gajao thanebo gyan khe saikhu lah.

¹¹ Bede thikhade, girikthai de dam gnang longthai thabo dam gnang jadao, subung buthu snadi khe smai du, bo jangbo suthai phuya.

¹² Ang, girikthai, gibi jang dong phu du Ani ha gyan dong, ang snadi khlai ma mithi phu du.

¹³ Gabra khe khinba de phap khe regejao ba lai se. Ang sanggayaba khe regejao du. jathai hamya ar khuh ni regethai khe regejao du.

¹⁴ Hamsisi bisar khlaima de ani khusi se Ani ha gyanbo dong, raothaibo dong.

¹⁵ Ang khe lapha hi Rajaraobo raj yaowai du Bisardarraobo hamba dara khe slam du.

¹⁶ Raja ni basathubo ang khe lapha hi raj yaowai du Habsao ni hojaraobo ang khe yaowai du

¹⁷ Ang khe hamjaoyarao khe ang hamjao du, Ang khe smaiyarao ang khe mai du.

¹⁸ Ani ha don ode man dong Jamthaoyayaba donbo ani ha dong.

¹⁹ Ani bathai-bikhim de gajao-guphu thabo ham dao Ang baigo riyaba bo guphu thane ham dao.

²⁰ Ang gibiyaba lama ha hem du Gibi jang bisar khlai du.

²¹ Ang khe hamjaoyarao ni basao ha ang don ri du Bonsi ni rang khoh gablai ri du.

²² Gabra de sagangthao ang khe slam ba Boni gda ni khusi slamba ni sagang ha.

²³ Thaoglao ni phrang ang khe sangsai ba, Jenba ni phrang, mulug sangsai bani sagang ha.

²⁴ Sagor dong mani sagang ha ning ang khe hajai ri kha Dih daolang mani sagang ha ning ang khe sangsai kha.

²⁵ Hadingma buthu slamya sani sagang ha Hadingsa buthu ni sagang ha ning ang khe hajai ri ba.

²⁶ Pirthi ni haphlai slamya sani sagang ha ning Habsao ni haduri slamya sani sagang ha ning

²⁷ Nokhasao sangsai bani sagang ha ning ang hajai ba Sagor ni hari slam bani sagang ha ning ang dong.

²⁸ Jimi basao ha deng mani bubli ha. Sagor ni dihmu slam bani sagang ha ning ang dong.

²⁹ Jekhali dih thangphuya mani khlai hi Sagor ni hari khe slam hi deng kha Ar jekhali phirthi jang dong pha mani dongthan khe slai ba.

³⁰ Bo bubli ha bo jang baosi khusi dangyaba ang se. Sain midi bokhe khaja riyaba ang ning ja kha Angbo boni sagang ha khaja la du.

³¹ Bo dong mane slamyaba ni basao ha ang khaja la du Bo subung slamyaba ni basao habo ang khaja la du

³² Odebani, ani basathu, ani grao khe khna lah. Ani lama ha hemyarao de khophal hamba se.

³³ Ani slingrithai khe khna hi girik lah Bo khe khnaya hi da dong

³⁴ Ani grao khe khnayarao de khophal hambi Ani daoglap ha nalaibo jon hi ani grao khe khnayarao ni khophal hambi.

³⁵ Ang khe maiyarao de hayu mai du GABRA ni phrang hamthai mai ma se.

³⁶ Thikhabo ang khe goron ma nangjaoyayarao jar ni basao ha hamya ja la ma se. Sere ang khe nangjaoyayarao de thiba khe se hamjao ba.