GYAN NI GRAO BUTHU 5 - DARA GADAIN N.T. with PSA and PRO (BSI)

Gaora jaya mane grao

¹ Ani basa, ani girikthai khe khah ha deng lah Ang sibringyaba grao khe hamsisi khna lah.

² Ning hamba hayu mai mane khlai hi Ode khuh ha hamba grao thi phu mane khlai hi ebo grao khe khna lah

³ Gaori ni khuh ni phrang beredih ser du, Boni grao bo thao thane milin dao.

⁴ Thikhabo boni grao jamthaoyaba gede gabang kha du Seng ni baha baigin buba lai bu du.

⁵ Boni yaphri buthubo thima ni gede thang du Boni yaphri mangkhlong gede thang du.

⁶ Bo hayuni lama khe baoya Boni lama buthu bo gui bi, thikhabo bo tharmai laya.

⁷ Odebani, ani basarao, ani grao khna lah Ang thiyaba graothai ni phrang da thang lah.

⁸ Gaori ni lama ni phrang gajain dong lah Boni noh ni derga rogong habo da thang.

⁹ Niya khade nini ijut khe malai lang la ma se, Thamsi raoyaba ni yao ha thih ma se.

¹⁰ Niya khade malai nini somphoti khe la lama se, Ning dukhu khlai hi maiyaba khe malai ni nokhor gnang ja la ma se.

¹¹ Ning raba ni sain khali ha ode Nini saomang raoyaba ni bubli ha ning hoima se.

¹² Ning thi nang, Sibringyaba khe ang nangjaoya, Slingriyaba khe ang bislei nangjaoya kha,

¹³ Ang khe slingriyaba khebo ang maniya Ang khe sibringyaba khebo ang khna ma nangjaoya

¹⁴ Khrip subung ni bising ha Duha de ang hamyadao hamyadao ja phai kha.

¹⁵ Jar ni dihdig ni phrang ning dih ling lah Jar ni dikhor ni phrang dih khao lah.

¹⁶ Nini dikhor ni dih snadi jabani gibin hathan ha thang ma? Nini dih snadi jabani lamayung ha riyen lang ma?

¹⁷ Nini se ning ja thing Subung tharmaiyayarao jang dih da khaopha lai thing

¹⁸ Nini dikhor hamthai ja thing Jalai ni bihi ni basao haning ning khaja hi dong song lah.

¹⁹ Bo mosoma se, majang daothaoyaba mosoma se, Boni abudih jang ning khajama mai thing Boni hamjaoma nalaibo ning khe khah la thing.

²⁰ Ani basa, snadi jabani ning khe gaori rem ma? Malai ni bihi khe snadi jabani gabao ma?

²¹ Bede thikhade, subung ni lama Gabra ni muthai ni sagang ha dong song du, Bo subung ni khrip lama buthu khe mithi du.

²² Hamya khusi ni dukhon ha phaphi subung nang re Boni phap ni wadu jang bo khah jao re.

²³ Boni yaowai phuyayaba ha bo thih ma se, Boni gibir ha ning bo jam la ma se.