GYAN NI GRAO BUTHU 31 - DARA GADAIN N.T. with PSA and PRO (BSI)

Raja ni khlaihi sibringthai

¹ Raja Lemuel ni grao buthu- Boni buma ni slingrithai buthu.

² O, ani basa, O ani sathip ni basa, O, ani smai dangyaba ni basa.

³ Masainjikrao ni basa ha nini bol khe da dang khlai Rajarao khe hamya khlaiyarao ni basao ha nini saomang ni raothai khe da yaowai.

⁴ O Lemuel-Rajarao de ju lingma niya Sason khlaiyaba ni khlai hi de ju lingba hamya.

⁵ Bo ju ling khade dara khe blao ma se Dara khe blao khade subung buthu ni basao ha sason khlai phu nang niya.

⁶ Thih didihyarao khe ju ling ri lah, Khah ha bubain risiyarao ni ha ju ri lah

⁷ Bonsi ling la thing ar bonsi ni dukhi jathai khe blao thing, Bonsini dukhu-waimu da wainso thing.

⁸ Sere grao jar ni khlai hi thila phuya, bonsi ni khlai hi thi juru rih. Suliyayarao ni basao ha gibi sason khe so ri lah.

⁹ Grao thi lah, gibi jang sason khlai lah. Dukhisa ar suliyasa ni hok khe raokhi lah.

Hamba bihih

¹⁰ Hamba bihih khe sere mai phu nang? Muilo-gnang longthai thabo gabang muilo bangdao.

¹¹ Boni basai boni basao ha gabang lon du, khrip gedebo boni bihih jar ni basai ni khlai hi lab khlai re.

¹² Thanghi dongdu si bo jar ni basai ni khlai hi hamba khusi dang du. Hamba khusi khe garhi de bo gibin khusi khe dangya.

¹³ Bo bihih rehendi ni khun khe smai hi bojom khlai du Boni yao jang khaja hi khusi dang re.

¹⁴ Bo bihih de bepharirao ni rung Gajain ni phrang jimu-lingmu labuyaba lai se.

¹⁵ Naiju ha bo baija du, Jar ni nokhorsi ni khlai hi jimu-lingmu ri re Boni dangyajikrao ne khlai hibo phantha ri re.

¹⁶ Bo hah hamba khe nai hi barai re, Boni yao ni khamai jang grep biding gai re.

¹⁷ Bo khaja hi jar ni khusi khe dang re Jar ni khusi ni khlai hi boni yao ha bol rao bi.

¹⁸ Boni dangyaba si ha lab mai du Hor habo boni thaophari thihya.

¹⁹ Boni yao jang khun lu re Boni yaosi jang ri dao re.

²⁰ Dukhisarao ni gede boni yao khuru re Suliyayarao ne bo rang ri du.

²¹ Maising habo jar ni nokhor ne waimu giri Bede thikhade bonsi khrip rih gudung phin du.

²² Boni thuthan ni khlai hi rih dao du Boni rigu-rajamphaibo gabang ning majang bi.

²³ Boni basaibo braha subung githim du oraha bo man mai du Boni basaibo khraorao ni bising ha khamthan mai du.

²⁴ Bo gabang bangdao hi phain re Bepharirao nebo phainma ri re.

²⁵ Boni gainsari de bol jang man-gnang se. Phaiginyaba ni basain ni khlai hibo waimu giri.

²⁶ Girikma jang grao jo du Boni slai ha nalaibo hamba slingrithai dong.

²⁷ Jar ni nokhorsi ni khusi khe hamsisi naiso du. Nalaibo sele ni makham khe jiya.

²⁸ Boni basathu baija hi bokhe hamthai ri du Boni basaibo bokhe bakhan ri hi hamthai ri du.

²⁹ ‘Gabang masainjikrao hamba hamba khusi dang du Thikhabo ning de bonsi khrip khe de du’.

³⁰ Masainjik khe nangjaoba de musibo niya, masainjik majang lakhabo musibo niya. Thikhabo, Gabra khe khinyaba masainjik khe bakhan rima nangma se.

³¹ Boni khusi ni khlai hi bokhe bakhan ri lah Bo dang seleyaba niya bani khrip subung bokhe bakhan ri thing.