GYAN NI GRAO BUTHU 3 - DARA GADAIN N.T. with PSA and PRO (BSI)

Grikthai ni basao habo lab

¹ Ani basa, ang sling riyaba khe da blao Ang grao riyaba buthu khe nini khah ha deng song lah

² Bede thikhade, maithai gabang nini hayu khe lao rima se. Ar nini khlai hi gnang labu ri ma se.

³ Hamjaoma ar lonma gnang asaba khali ning khe da haiger thing, Nini gorna ha kha lah, nini khah bakhlap ha reb lah.

⁴ Odese, Madai jang subung ni muh ha Hamba bumu ar malai ni nangjaoma mai ma.

⁵ Nini khah jang muh jang Gabra khe lon lah Ning mithiyaba jang se ning asa da deng.

⁶ Nini khrip lama buthu ha bokhe wainso lah Odese nini lama buthu khe bo beleng ri ma.

⁷ Nini muh ha se ning da girik lah Gabra khe khin lah, ode phap khe haiger lah.

⁸ Bo se nini sao ni khlai hi hamba ja nang ar, nini begreng buthune khlai hi hamba ja nang.

⁹ Nini don maiyaba buthu jang Gabra khe bakhan khlai lah Nini samlai-bonlai jang bokhe bakhan khlai lah.

¹⁰ Odese nini maikho ha mai gablai ma. Nini grep sebyaba hakhor ha grep bidi lim khlai ma.

¹¹ Ani basa, Gabrani sibringyaba khe da blao ar bo joba khe jajaoya da ja.

¹² Bede thikhade, Gabra sere khe hamjao du bokhe sibring re Bupha jar ni basa ni basao ha khaja ba lai.

¹³ Sere girikthai khe mai hi boha jajao ma mai du Boni jathai hambi.

¹⁴ Bede thikhade, girikma guphu thanebo hamdao ar, gajao thanebo muilo ja dao.

¹⁵ Gajao ni longthai thanebo dam-gnang Subung nangjaoyaba khrip thanebo dam jadaoyaba se.

¹⁶ Boni yaoda ha hayu galao dong Boni yaosi ha somphoti ar manbo dong.

¹⁷ Boni lama buthubo suk ni lama se Ar, boni lama hade khajama dong.

¹⁸ Bo khe maniyarao ni khlai hi de hayu ni buphang se. Bokhe remsong hi dengyarao ni khlai hi de hamthai mai ma se.

¹⁹ Girikthai jang phirthi khe Gabra slam ba Bujithai jang nokhasao khe bo deng ba.

²⁰ Boni girikthai jang sagor khe degao ri ba Ar, jimi ni phrang rabamdih galai ri ba.

²¹ Ani basa, nini muh ha hamba-hamya khe hamsisi deng lah, Nini muh ni phrang bonsi khe da khai lang ri.

²² Nini khlai hi bo buthu hayu ja nang Nini gorna ni khlai hi lik lai ja nang.

²³ Odese, nini lama ha hamsisi go hi hem phu ma Ar, nini igahbo khuda nang niya kha.

²⁴ Thuba habo, ning khin nang niya kha Ning thuba de, mudri sab nang.

²⁵ Nini basao ha srap biphod phai nang thi hi da khin Ode subung hamyayarao ni basao ha biphod phai khabo, ning da khin.

²⁶ Bede thikhade, Gabra nini juruma ja nang Ar, nini igah khebo dukhon ni phrang naiso ma se.

²⁷ Nini raoma dong du thikhade malai ni basao ha Hamba khlai mani dang mathao.

²⁸ Nini ha dong khade, nini noharirao khe elei da thi, Dakhna phai, ang ri nang thi hi.

²⁹ Nini noharirao sere ning khe lonhi dong re, Bonsini basao ha hamya da bao.

³⁰ Asaba subung ning khe hamya khlaiya khade Bonsi khe da thi sing.

³¹ Subung namkhormu jayaba khe da libi Ar, boni lama habo da hem.

³² Bede thikhade, thokhi bayaba khe Gabra rege jao du Thikhabo, gibi subung buthu khede bo jar niha deng la ma se.

³³ Subung hamyayarao ni noh ha Gabra ni sarithai dong Thikhabo, subung hamba ni noh Gabra hamthai ri re.

³⁴ Sanggama jang sijiyaba khe siji du Ar basasayarao khede khasao du.

³⁵ Subung girikyarao man mai re Thikhabo, gibirrao de laji nu re.