GYAN NI GRAO BUTHU 28 - DARA GADAIN N.T. with PSA and PRO (BSI)

¹ Subung hamya de riksaiya khabo khai re Thikhabo, subung gibi de misi raigonma lai khitha rao du.

² Raji ha gajai bang khade, bisardarrao bang re Thikhabo, bujima ar buddi gnang subung dara khe mani re.

³ Raja sere dukhisa khe nekhlik du, Bode hadi hayung samlai-bonlai khe hamya khlai ba lai se.

⁴ Dara-disa khe maniyayarao de subung hamya khe bakhan khlai re. Thikhabo dara-disa khe maniyarao de bokhe siji re.

⁵ Subung hamya de bisar khe buji phuya Thikhabo, Gabra khe smaiyarao de jamthar si mithi phu du.

⁶ Gnang subung lama hamya ha hemba thane Subung dukhisa lama hamba ha hemba hamdao.

⁷ Sere dara-disa khe mani du bo basa bujima-gnang se. Thikhabo basa hasla de jar ni bupha khe laji phnu re.

⁸ Rang-rih lab ni khlai hi bojom khlaiyaba de Malai sere dukhisa khe juruma bao re, boni khlai hi bojom khlai ba se.

⁹ Sere dara-disa ha khmao nathong khalai re, Boni bithai bo rege bi.

¹⁰ Malai khe lama gajai ha langyaba de Jar ni dukhon ha nang lama se Thikhabo, gajai giriyaba subung de hamba don mai ma se.

¹¹ Subung gnang de jar ni muthai ha girik re Thikhabo, subung dukhisa de buji hi bokhe khrip tharmai re.

¹² Subung gibi dema maikha de, subung buthu khaja re. Thikhabo, subung hamya de deba bubli ha subung buthu thim re.

¹³ Jar ni phap khe huiyaba de gibi jaso phuya Thikhabo, sere phap khe mani hi dangkhlai phu re, bo khasaoma mai re.

¹⁴ Sere nalaibo Gabra khe khin re, bo subung ni jathai hambi Thikhabo, sere jar ne khah khe rao ri re, dukhu ha galai re.

¹⁵ Phaphi raja dukhisa ni basao ha hukhum yaowaiyaba de Hoyaba misiraigonma ar khinthao thaoyaba musu burma riksai ba lai se.

¹⁶ Thamsi raoyaba raja niha hamba bisar giri Thikhabo, gajai jang lab nangjaoyayaba ni hayu lao ma se.

¹⁷ Subung sthai hi santi maiyayaba de, thihba sosi bo khaima se. Saosibo bokhe da juru thing.

¹⁸ Sere ni dongthai-jithai ham du, bo go ma se, Thikhabo, sere ni dongthai-jithai hamya bo srap galai ma se.

¹⁹ Sere jar ni hadi ha hamsisi khusi dang re, bo maibo gabang mai ma se, Thikhabo, sere khah ha se ning baobai ba, bo dukhisa jama se.

²⁰ Subung lonma-gnang de hamthai gabang mai ma se Thikhabo, sere sangga gnang ja ma baoba, bo saja maiyaba thao nang niya.

²¹ Gibin naiba hamya Olei jakhabo, subung gajai dang ma bao re.

²² Subung khai thiyaba srap ning gnang ja ma bao re dukhi bokhe jon du thi hi bo tharmaiya.

²³ Mosol slai jang subung khe riba thane Subung khe joyaba de yaohonthao ha subung hamjao dao re.

²⁴ Sere buma-bupha ni rang khe khao hi Ang gajai khlaiya thi du thikhade Bo subung de hamya khlaiyaba ni lugu se.

²⁵ Subung harbaoma namkhormu phnang re Thikhabo, sere Gabra ni basao ha lonma deng re, bo sogo jaoma se.

²⁶ Sere jar ni basao ha lonma deng re bo gibir se Thikhabo, sere girikma jang hem re, bo sogo jaoma se.

²⁷ Sere dukhisa ne ri du, bo baojo nang niya Thikhabo, bonsi khe naima mijingyayarao de gabang siji jao ma se.

²⁸ Jekhali phapi subung raoma mai re, subung buthu thim hi dong re Thikhabo phapi subung hamya khade gibi subung baija ma se.