GYAN NI GRAO BUTHU 27 - DARA GADAIN N.T. with PSA and PRO (BSI)

¹ Dakhna ni khlai hi jar khe da sangga lah Bede thikhade, snadi basain sophai nang thi hi ning tharmaiya.

² Nini khuh jang niya hi, malai ning khe bakhan khlai thing Jar ni khujer ni phrang niya hi malai ni khujer jang ja thing.

³ Longthai ar hajeng risi bi Thikhabo subung gibir ni thamsi de bo magin thabo risi dao.

⁴ Thamsi khe khahlaoba dubi Thikhabo, libima khe sere mathao phu ma?

⁵ Phirik phirik hamjaoba thane Khrip ni sagang ha joba hamdao.

⁶ Jing khe khasao hi lugurao su lakhabo hambi Sotrurao khudim khade girik lama nang du.

⁷ Hoh gablaiyaba de beredih khebo regejao du Thikhabo, hukhri jaoyaba nede gakha khebo thaojao du.

⁸ Subung jar ni noh khe dangkhlaiyaba de Dao bithip ni phrang khaiyaba lai se.

⁹ Thao ode bahai midimyaba de khah khe khajama ri riba lai Lugu ni sibringthai hamba de hambi.

¹⁰ Nini lugu khe da haiger, nini bupha ni lugu khebo da haiger Nini basao ha dukhu sophai khade nini daphlung ni noh ha da thang Gajain dongyaba daphlung thane, gabasi dongyaba nohari hamdao.

¹¹ Ani basa, girik lah, ani khah khe khaja ri lah. Odese, ang khe nangjaoyayaba khe ang thi phin phu ma.

¹² Subung girikyaba de khinthao thaoyaba khe nu hi thim re Thikhabo, subung gibir de thangpha lang hi dukhu mai re.

¹³ Basao mithiyayaba subung ni khlai hi bondok ne boni rih khe la lah, Masainjik hamya ne khlai hi thikhade smai dang ri hi deng lah.

¹⁴ Phorongma baija hi jar ni nohari ni khlai hi jirikkhao da da hamthai sainkha de, Bode hamthai niyahi sot ri ba se.

¹⁵ Nam raoyaba bihih de noh bising ha hadi serba lai se.

¹⁶ Bo bihih khe mathaoma thikhade bar khe mathaoba lai se. Ode thao khe yao jang remba lai se.

¹⁷ Ser khe ser jang ning bu riba se Olei ning subung saosi jang saosi khe bu ri re.

¹⁸ Sere thaikhrao phang khe naiso du, bo boni bathai khe mai jima se. Sere jar ni bubra khe naiso re, bo mai jima ni hamthai mai ma se.

¹⁹ Dih ha jar ni saogari khe nu la ba lai Subung ni khah khe subung niha ning nujao la du.

²⁰ Seol ar Abaddon, asaba khali habo gablai thaoya Ode subung ni muthaibo asaba khali habo naithao jora giri.

²¹ Hahgap ha gajao guphu nai nai mane malang ba lai Subung ni bumu hamba khebo nainai ma nang du.

²² Subung gibir khe samtho ha sukhli khabo Rimin la hi hamsisi sukhli khabo Boni gibir jathai khe bo ni phrang disai phu nang niya.

²³ Nini melma buthu khe hamsisi tharmai lah Nini musu ni dol khe hamsisi naiso lah.

²⁴ Bede thikhade, gnang de nalai dong songya Raja ni krothu bo sarik-surik sosi ne de niya.

²⁵ Jekhali ha sainjao khe lang hi, gadain sam baigo du Jekhali ha haphlao ni phrang sam khe bojom khlai du.

²⁶ Bo bubli ha melma ning khe rih ri ma Burunbo ninthane rang ri ri ma.

²⁷ Ning ar nisini nokhor khe khrangma ni khlai hi ar nini dangyajikrao khe sao hamma ni khlai hi Burun ni abudih gabang ning mai ma se.