GYAN NI GRAO BUTHU 26 - DARA GADAIN N.T. with PSA and PRO (BSI)

¹ Jalangma ha borop ar mai rathor ha hadi haba gayaba lai Subung gibir ode muima bo gaya.

² Daophersi bagrang smaoba lai ar daohadi birbaiba lai Balam giriyaba khe sari ribabo olei se.

³ Gorai ne khlai hi suyaba wadu, mileng ne khlai hi de lagam, Olei jasosi gibir ni bisima ni khlai hi de goda se.

⁴ Subung gibir jang gibir lai grao da thi phin Niyakhade bo lai jasosi ningbo ja ma se.

⁵ Gibir khe gibir lai ning grao thi phin lah Niyakhade, bo jar khe jar girik jaola ma se.

⁶ Subung gibir niha graojma haihayaba de Jar ni igah khe dain laba lai ar namkhormu khe lingba lai se.

⁷ Gibir ni khuh ni phrang gyan ni grao baigoba de Igah-khora ni igah ling dang dang dongba lai se.

⁸ Subung gibir khe man riyaba de Baithuli ni hathaikhoh ha hathai dengba lai se.

⁹ Gibir ni khuh ha gyan ni grao dongyaba de Ju baola ni yao jang busu remba lai se.

¹⁰ Subung haglai daobaiyaba ar gibir khe khusi hade phungyaba Bla gao ba ha khrip subung khe khoja khlaiba lai se.

¹¹ Bedehe sisa jar ni gabadih ha thangphin la ba lai Subung gibir jar ni gibir jathai khe dang phin re.

¹² Sere jar khe girikbi baola re Bode gibir thabo hamyadao.

¹³ Subung sele thi du, Misi raigonma lama ha dong, Thamsi raoyaba raigonma lamayung ha dong, thi du.

¹⁴ Derga maoba lai jasosi Subung selebo jar ni thuthan ha mao re.

¹⁵ Subung sele de jar ni yao khe khopra ha jem hi Jar ni khu ha seng mane bo waimu nang re.

¹⁶ Subung gini grao thiphinyarao thane Sele subung jar ni muthai ha girikbi thi hi bao la re.

¹⁷ Sere malai ni namkhormu ha gaba pha re Bode asaba sisa ni khmao ramba lai se.

¹⁸ Subung gibir de wai ni bla ar thiginyaba bla khe ejang-ojang gaophlung ba lai se.

¹⁹ Saosi subung, jar ni noharirao thokhi hi. Ang haglai mlaoba se dou thiyaba lai se.

²⁰ Bon giri kha de wai bo thilang re Odelei ning braha jaokhuyaba giri oraha nam bo giri.

²¹ Waithai ha hangger ri khade wai rao du Wai ha bon seng khade wai raodao du, Olei jasosi ning subung jaokhuba ringyaba de namkhormu bangdao ri re.

²² Jaokhuyaba ni grao buthu de makham jiba thaoba lai se; Bo subung ni bohoh bising ha galai re.

²³ Khuh gidi jahi khah hamyayaba de Hah ni mudik, baji ha guphu lai jna riyaba lai se.

²⁴ Subung giriklaiyaba de khuh jang phung la re Thikhabo boni khah ha hamya bao re.

²⁵ Boni grao di lakhabo, boni grao khe da lon lah. Bede thikhade boni khah ha phap masni dong.

²⁶ Thokhi hi jar ni hamya buddi khe hui la du Thikhabo, subung ni gejer ha boni phap de nujao ma se.

²⁷ Sere hakhor jao du, bo ning oraha galaising ma se. Sere longthai mokhon re, boni basao habo bo galai ma se.

²⁸ Sere khe slai jang thokhi kha, bo khebo nai ma mijingya. Mosol bakhan khlaiyaba hamya ja lang lama se.