GYAN NI GRAO BUTHU 25 - DARA GADAIN N.T. with PSA and PRO (BSI)

Solomon ni gibin gyan ni grao

¹ Ebo buthubo Solomon ni gyan ni grao buthu se, Juda ni Raja Hezekiah-ni subungrao reb khuyaba.

² Jinis huiba de madai ni muima se Jinis nu honyaba de Raja ni muima se.

³ Nokhasao juba lai ar sagor thuba lai Olei jaso se ning Rajarao ni khah khe mithi phuya.

⁴ Guphu jang haro remyaba khe khaikho lah Odese guphu slamyaba hamsisi slam phu ma.

⁵ Raja ni rogong ni phrang subung hamya khe khai ri lah Odese Raja ni khamthan gibi ja phu ma.

⁶ Raja ni rogong ha jar khe jar da sugu lah Subung gedebarao ni bising habo khamthan da smai.

⁷ Subung gedebarao ni sagang ha laji phnu ba thane, Bo Eraha kham la phai thi khade nini khlai hi hamdao.

⁸ Snadi khe ning nini muthai jang nu ba Bokhe bisar ha srap da labu, Jamthao baha ningkhe noharirao laji phnu kha la Ning snadi khlai ma?

⁹ Noharirao jang ning jar ni grao sain laiba ha Malai ni lonma khe hamya da khlai.

¹⁰ Niyakha de, khnayarao ning khe laji phnu ma ar nini bumu hamyayaba jam nang niya.

¹¹ Bubli ha grao thiyaba de Guphu ha gajao daophayaba lai se.

¹² Subung buddi-gnang ni grao de khnayaba khmao ni khlai hi Gajao ni khmaothai lai se.

¹³ Lonma-gnang graodiyah de jalangma ni dih gasainyaba lai se, Boni bubra ni khlai hi khah smao riyaba se.

¹⁴ Yaosandi riya hi riba thiyaba subung de Dih labuyayaba bar jang jimi lai se.

¹⁵ Khah lao hi jon khade Raja khebo khah mani ri phu du, Ode slai gasain dik dik grao thikha de begrengbo bai ri phu du.

¹⁶ Beredih khe maikha de, bislei nang du olei se ning ling lah Niyakha de hoh gablai bang hi gaba ma se.

¹⁷ Noharirao ni noh ha gabang da thang Niyakha de ning khe nangjaoya ja ma se.

¹⁸ Sere jar ni nohari ni balam ha mosol sakhi ri re, Bo subung de daobu, seng, ode bla lai se.

¹⁹ Dukhu ni bubli ha subung lonyaya khe asa deng khade. Hathai hamya ode igah khora lai se.

²⁰ Subung khah waimu niha rajabyaba de Maising ha ri seba lai ar Khari jang bumai susaba lai se.

²¹ Nini sotru hukhri jaokha de, makham ri lah, Dih gang khade, dih ling ri lah.

²² Olei khlai khade, boni khro ha waithai deng balai ja ma se. Ode, Gabra, ninthane yaosandi ri ma.

²³ Sain yaosi ni bar hadi labuba lai Mosol thiyaba slai thamsi labu du.

²⁴ Bihih berba raoyaba jang dongba thane Khimju ni gablab ha dongba hamdao.

²⁵ Gajain hathan ni hamba graojma de Subung dih gang jaoyaba ni khlai hi dih magainyaba lai se.

²⁶ Subung gibi phaphirao jang dong pha khade Dikhor ni dih khe gublung khlai ba lai jasosi se.

²⁷ Beredih gabang lingba hamya Olei ning jar ni muimane smaiyaba de hamya.

²⁸ Subung jar khe naiso laphuyayaba de Nogor khorongma gubuyaba lai se.