GYAN NI GRAO BUTHU 24 - DARA GADAIN N.T. with PSA and PRO (BSI)

-19-

¹ Subung phaphirao khe da libi Bonsi jang da gaba.

² Bonsi ni khah hade namkhormu se ning bao ba Bonsi ni khuh hade hamya se ning thi ba.

-20-

³ Girikma de noh dang re Bujima gnang de noh slam re.

⁴ Noh bising ni kutha ha bujima gablai du Muilo-gnang hamba jinis buthu gablai du.

-21-

⁵ Subung buddi-gnang niha raothai dong Subung bujima-gnang niha bolbo rao ri re.

⁶ Jbah nanglai mani khlai hi malai ni grao khe khnama nang du. De mani khlai hide gabang grao khna ma nang du.

-22-

⁷ Gibir ni khlai hide girikma gabang ju bi Khorong daoglap ha musibo grao thi ma giri.

-23-

⁸ Sere hamya bao du bokhe se Hamya khusi khe bao hi dongyaba thi ba.

⁹ Hamya baothai buthu de phap se Malai khe naisleyaba de subung ne khlai hi regeyaba se.

-24-

¹⁰ Khophal hamya basain ha ning raoya khade Ning raoyayaba se.

-25-

¹¹ Gajai giri hi sthai mane langyarao khe sogo lah Duha sthai mane langyaba khe remthao lah.

¹² Jing boni balam ha musibo tharmaiya thi khade Khah khe suyaba la bokhe tharmaiya?

-26-

¹³ Ani basa, beredih ling lah, bode hambi Bere barang khe ji lah, bode nini khlai hi di bi.

¹⁴ Ebo khebo tharmai lah, girikma nini bese ni khlai hi gidi se Ning mai khade nini khlai hi danang ni khlai hi asa dong

-27-

¹⁵ Hamba subung ni noh khe khaomane da jon lah Boni dongthan khebo hamya da khlai.

¹⁶ Bede thikhade, subung hamba phin sni galai khabo, bo baija phinma se Thikhabo, phaphirao de, hamya khusi jang galai hi dong lama se.

-28-

¹⁷ Nini sotru galaiba ha, gabang da khaja Bo khuda hi galaiba ha, nini khah ha da khaja.

¹⁸ Niyakha de Gabra bokhe nuhi jajaoyama se. Bo boni thamsi khe bo ni phrang phin phin ma se.

-29-

¹⁹ Subung phaphi ni khlai hi khah waimu da nang Bonsi ni phap khebo da libi.

²⁰ Bede thikhade, subung phaphi niha de sagang gedebo asa giri. Subung phaphi ni thaophari de sthai jaoma se.

-30-

²¹ Ani basa, ning de Gabra ar Raja khe khin lah Raja khe nangjaoyayarao jang da thang pha.

²² Bonsi ni basao ha srap hamya sophai ma se Bonsi ni basao ha bislei dukhu sophai nang sere mithi du?

Gibin gibin gyan ni grao.

²³ Ebo buthu bo subung gyanirao grao thiyaba buthu se. Bisar ha gibin naidaoba hamya.

²⁴ Sere phaphi niha thi re, Ning subung hamba se Bokhe subung buthu siji hi dangkhlai ma se.

²⁵ Thikhabo, phaphi khe phap ni saja riyaba de boni khlai hi hambi. Gabang hamthai bonsi ni basao ha phai ma.

²⁶ Grao gibi thi phinyaba de Ani khlai hi hamba lugu se.

²⁷ Baji ni khusi khe phura dang lah, Nini hadi khe salai lah Boni yaohon ha jar ni noh khe dang lah.

²⁸ Haglai-biglai nini noharirao ni balam ha sakhi da ja Nini khujer khebo mosol thimane da yaowai.

²⁹ Ani basao ha dangba lai boni basao habo dang ma se, Ani basao habo bedehe khlai ba, angbo suphin ma, thi hi da thi.

³⁰ Subung sele ni hadi rogong ha ang thang ba Subung buddi giriyaba ni grep bari rogong ha thang ba.

³¹ Khrip hathan habo busuh gablai du, Hah basao ha jabai jang gablai du. Longthai ni khorong bo gubu kha.

³² Snadi khe ang nu kha boha ang bisar khlai kha Ang nuyaba ha slingthai mai kha.

³³ Gijisa lenggo ma, gijisa mudri, Gijisa yao lenggo ma.

³⁴ Dukhi jathai makhao lai srap phai du Suliyayaba subung jbah ni yaodi lai phai du.