GYAN NI GRAO BUTHU 23 - DARA GADAIN N.T. with PSA and PRO (BSI)

-6-

¹ Gedeba jang makham jimane khamba ha Nini rogong ha sere dong bokhe hamsisi nai lah.

² Ning hamsi jima nangjao khabo Jar khe jar mathao lah.

³ Nini ragong ha hamba jimu-lingmu dong khabo Bo buthu de ning khe thokhiyaba ja la phu re.

-7-

⁴ Gnang jama ni khlai hi dukhu da khlai Jar ni baothai jang girik lah, ode girik hi mathao lah.

⁵ Gnang jaba lamai lamai jang lang la re Bede thikhade gnang de bagrang slam hi Daoling lai nokhasao gede birlang la re.

-8-

⁶ Khaithirao ni makham khe da ji lah Boni hamba hamba jimu-lingmu khebo da libi.

⁷ Oleiyaba subung de maiphain khe se ning bao re, Khuh jang de Ji-ling thi re, Thikhabo boni khah nini gede giri.

⁸ Ning khaisa jiyaba khebo gaba ma se Nini grao gidi buthubo haglai ja ma se.

-9-

⁹ Subung gibir jang da sain lai Niyakhade, nini girikthai ni grao khe musibo buji nang niya.

-10-

¹⁰ Sagang ha hari longthai gayaba khe da disai Ode, mathisarao ni hah khebo da ne sing.

¹¹ Bede thikhade, bonsi khe naisoyaba rao bi Bo bonsi jang gaba ma, ning de nang niya.

-11-

¹² Slingriyaba gede nini khah khe ri lah Ode, nini khmao jang gyan ni grao khe gainsong lah.

-12-

¹³ Ansa khe sling riya hi da deng Bokhe goda jang sason khlai khabo, bo thih nang niya.

¹⁴ Bokhe goda jang su hi sason khlai lah Ar boni bese khe githi ni phrang sogo lah.

-13-

¹⁵ Ani basa, nini khah girik khade Ani khah khaja nang.

¹⁶ Jekhali nini khujer gibi grao thi nang Okhali ani khasu ha khaja nang.

-14-

¹⁷ Nini khah khe phaphirao ne yaowai ma da ri Thikhabo, nalaibo Gabra khe khin hi ning dong lah

¹⁸ Nini khlai hi hamba ja nang Ning asa khlaiyababo phura ja nang.

-15-

¹⁹ Khna lah, ani basa, girikma gnang ja lah Nini khah khe belengyaba lama ha deng lah.

²⁰ Ju baolarao jang baosi ja hi da dong Mogong harbaoyarao jang lugu da ja.

²¹ Bede thikhade, mogong ar ju nangjaoyarao de dukhisa ja nang, Baolarao ni rih de ridin ja ma se.

-16-

²² Nini bupha ning khe hajai riyaba ni grao khe khna lah, Ode nini buma grajik jakhabo bokhe da naisle.

²³ Gibi khe barai hi da phain phin, Girikma, slingrithai, bujima khebo barai lah.

²⁴ Gibiyaba ni bupha de gabang khaja la du, Sere niha basa girikyaba dong re, boni khlai hi gabang khaja la du.

²⁵ Nini basao ha nini buma-bupha khaja la thing Ning khe hajai riyababo khaja la thing.

-17-

²⁶ Ani basa, ani grao khe mani lah Ani lama khe nini muthai jang nai hi dong lah.

²⁷ Bede thikhade, gaori masainjik de hakhor guthuyaba lai se, Hamya bihih de dikhor thuyayaba lai se.

²⁸ Makhaorao lai thim hi jon re Subung buthu ni bising ha hamya bara ri re.

-18-

²⁹ Sere niha bubain dong? Sere niha waimu dong? Sere niha nam dong? Sere niha berbayaba dong? Sere niha khusi giri hi bumai nang ba? Sere niha muthai gajao dong?

³⁰ Sere nalai ju ling re Gibin gibin ju gibringyaba khe lingyaba.

³¹ Ju gajao jahi dongba ha da nai, Bela ni ju guduyaba khe da nai Ling thaosisi nu khabo da nai.

³² Jamthaoba ha de jbu ni bislei Bonsi ni basao ha galai ma.

³³ Muthai jangbo gmangthao sisiyaba khe nu ma, Ar khah habo gmang-gijiyaba bao ma.

³⁴ Bonsi sagor basao ha thuyaba lai ja re, Dithon ni baola lai ja re.

³⁵ Ang de dojao la khabo dukhu nang nang niya Ang de dohi hokhlaijao khabo musi grao giri Ang bakhali smao ma, ang ling phin la ma se, thi ba.