GYAN NI GRAO BUTHU 22 - DARA GADAIN N.T. with PSA and PRO (BSI)

¹ Gnang gede jaba thane de hamba bumu khe saikho ba hamdao, Gajao-guphu thanebo bumu jaba hamdao.

² Subung gnang ode dukhisa baosi ja du, Bonsi khe slamyaba de Gabra se ning.

³ Subung buddi-gnang de khinthao thao khe nu hi bo thim re Thikhabo, subung gibir de thang pha lang re, ode dukhu bo goron re.

⁴ Jar khe khasi ri hi Gabra khe khinyaba de Gnang, man, ode hayu labu du.

⁵ Subung phaphirao ni lama hade busuh jang dukhon dong Thikhabo sere jar ni hayu khe raokhi du, bo ni phrang go ma se.

⁶ Ansa khe boni lama khe sling ri lah Jekhali bo de nang orah ni phrang bo degao nang niya.

⁷ Gnangrao dukhi sarao ni basao ha hukhum yaowai du, Ode lagai layaba de riyaba ni leng se.

⁸ Sere phap khe gai re, bo dukhu mai re Boni thamsi ni goda khe bo sbai ma se.

⁹ Subung khaithiyaba de hamthai mai ma se, Bede thikhade jar ni jiphain khe bo dukhi sarao ne bo ri du.

¹⁰ Mlao thalao jayaba khe rikhlai khade, Namkhormu ode naisleba bo jam du.

¹¹ Sere ni khah ha gathar jang khasaoma-mayama deng re Bode Raja ni lugu ja ma se.

¹² Gabra ni muthai de gyan khe naiso re Thikhabo, lonma giriyaba ni grao buthu de dangkhlai re.

¹³ Subung sele thi re, “baji ha raigonma dong!” Niya khade Lamayung ha ang khe sthaima se.

¹⁴ Masainjik gaori ni khuh de hakhor guthu lai se. Sere ni basao ha Gabra ni thamsi dong, oraha galaising ma se.

¹⁵ Ansarao ni khah gibir ja la khabo Sason ni goda jang sibring phu du.

¹⁶ Sere jar ni don bang dao ri mane dukhisa khe dukhu ri re, Ode sere gnangrao khe yaosandi ri re bo ginibo dukhisa ja ma se.

Gyanrao ni graothai

¹⁷ Gyanrao ni grao buthu khe khna hi gainsong lah Ang slingriyaba khebo nini khasu ha deng lah.

¹⁸ Bede thikhade, nini khah ha deng khade khaja mai nang Nini khah ha deng khade nangba ha ning thiphu nang.

¹⁹ Gabra khe hamsisi lon phu mani khlai hi Dini ha ebo grao khe ning khe sling ri du.

²⁰ Nini khlai hi mathimji gyan ni grao khe sainthi du, Ebo graothai ha ringmabo dong ar sibringthaibo dong.

²¹ Ning khe gibi grao snadi thi hi mithi mane slingri ma Singba ha hamsisi thiphin phu mane khlai hi tharmai nang.

-1-

²² Dukhisa dukhi jaba ni da se lah Bisar khamba ha sere ni Juruyahsa giri, bokhe da nekhlik.

²³ Bede thikhade Gabra bonsi ni gede gaba nang Nekhlikyarao khe bo nekhlik nang.

-2-

²⁴ Subung thamsi raoyaba jang lugu da kha, Srap thamsi baigoyaba jang baosi da ja.

²⁵ Niyakhade, ning bonsi lai ja ma se, Yaohonha ning dukhon ha nang ma se.

-3-

²⁶ Malai ni lagai ni khlai hi da hanggai Jar jang jar khe lagai ha da sagai.

²⁷ Nini ha ri mane giri kha la Nini thuyam khebo sela ma se.

-4-

²⁸ Nisini phagararao ni hari khe da disai lah.

-5-

²⁹ Yaoblai ringyaba khe Raja khusi ha phnang nang Gibin subungde bokhe khusi ha phnang phu nang niya.