GYAN NI GRAO BUTHU 17 - DARA GADAIN N.T. with PSA and PRO (BSI)

¹ Noh ha nam khormu ja hi jiba-lingba thane Mili hi mudru samlai jiba hamdao.

² Bubra ni basa gibir thane dangyasa ni girikma hamdao Bubra ni basathu jang baosi phantha maipha ma se.

³ Gajao-guphu khe wai ha malang hi ragao riba lai Gabra de subung ni khah khe nai nai du.

⁴ Hamya subung de hamya grao khe hamjao re. Mosol nangjaoyaba subung mosol khe gainsong re.

⁵ Sere dukhisa khe minithai re, bo jar khe slamyaba Madai khe naisle ba se, Malai ni dukhu ha khajayaba saja maiya hi thao nang niya.

⁶ Busuthai-basathai de khraorao ni krothu se. Basa-bisik ni khlai hi bupha-buma majang ma se.

⁷ Gibir ja hi majang sisi grao joba gaya, Subung gedeba mosol grao thiba ar gayadao.

⁸ Mosol yaosandi riyaba montro lai se Khrip gedebo khusi ja du thihi malai bao re.

⁹ Sere gajai khe map khlai re, bo hamjaoma khe saiphlung re Thikhabo sere grao khe alang alang thi re bo lugu khebo degao ri re.

¹⁰ Subung gibir khe phin jang rjasi suba thane Subung bujiyaba khe phin si joba hamdao.

¹¹ Hamya subung de phekhayaba khe se ning hamjao re Thamsi raoyaba subung khe boni ha haiha ma se.

¹² Subung gibir khusi dangba khe goronba thane Musu burma basa sejaoyaba khe goronba hamdao.

¹³ Hamba khe hamya jang phin phin khade Hamyayaba jang bo noh khe haiger nang niya.

¹⁴ Nam jenyaba de dibarai khe haigerba lai se Odebani nam jenma ni sagang ha bokhe haiger lah.

¹⁵ Subung hamya khe gajai ja riya hi Subung hamba khe gajai ja ri khade Bo magin khebo Gabra regejao du.

¹⁶ Subung gibir niha rang dong la khabo snadi lab ja ma? Khah ha girikma giri hi girikma khe barai phu nang?

¹⁷ Lugu de nalaibo khasao re, Jar ni daphlung de dibin-sibin ni khlai hi hajai re.

¹⁸ Sere jar ni yaopha do hi, jar ni noharirao ni khlai hi bubain ajao du, bo subung de bujima giriyaba se.

¹⁹ Sere nam khormu khe nangjao re, bo phap khe nangjao re Sere daoglap guju slam re, jar ni khlai hi hamya ja re.

²⁰ Khah hamyayaba subung de gnang ja phuya Sere ni slai jang mosol jo re, bo dibin-sibin ha galai re.

²¹ Basa gibir de dukhu ha hokhlai re Basa gibir ni bupha ni khlai hi khajama giri.

²² Khajama dong khade hamba muli se Thikhabo, khahbaiyaba de begreng rain ri re.

²³ Subung phaphi de phirik phirik mosol yaosandi khe ajao re Ode khlai hi gibi bisar khebo hamya khlai re

²⁴ Buddi-gnang subung de girikthai khe nuphu mani deng re, Thikhabo, gibir ni muthai phirthi ni jamthaoba sosi nu hadu.

²⁵ Basa gibir de bupha ni khlai hi dukhu labu re Buma ni khlai hibo gabang dukhu riyaba se.

²⁶ Gajai giriyaba khe saja riba hamya Bubain-gnang subung khe suba hamya.

²⁷ Buddi-gnang subung de mirik hi grao jo du Bujiyaba subung de jar ni thamsi khe magain hi deng re.

²⁸ Subung gibirbo phirik phirik dong khade subung girikyaba bao re, Boni slai khe mathao hi deng khade, malai bo khe subung girikyaba lai bao re.