GYAN NI GRAO BUTHU 16 - DARA GADAIN N.T. with PSA and PRO (BSI)

¹ Baoma de subung ni phantha se Thikhabo, slai jang grao thiphinyaba de Gabra ni phrang se.

² Subung jar ni dongthai-jathai khe jar jajao la re Thikhabo, Gabra de snadi bao du bo khe suhi nai re.

³ Jar ni khusi khe Gabra ne yaopha lah Odese nini baothaibo ja ma.

⁴ Gabra de khrip baothai khe jar ni khlai hi khaikho ba, Subung hamya khebo dukhu galai mani se slam ba.

⁵ Gabra de khah ha sanggayarao khe regejao du. Ebo khe bao lah: Bonsi saja maiya hi go nang niya.

⁶ Khasaoma jang lonma-gnang ni gajai khe susa re Gabra khe khin hi subung phap khusi dangya hi dong re.

⁷ Subung dongthai jang Gabra khe khaja ri khade Boni sutrurao khebo bo jang milima slam du.

⁸ Gajai jang lab gabang maiba thane Gibi jang gijisa lab maiba hamdao.

⁹ Subung de jar ni lama khe bisar khlai re Thikhabo Gabra se boni yaphri khe suri ba.

¹⁰ Raja de Madai ni grao jang se bo grao jo ba Bo jar ni khah jang gibi bisar khlai re.

¹¹ Gibi suyaba de Gabra ni phrang se Khrip beher longthaibo bo slamyaba se.

¹² Rajarao de hamya khusi khe regejao du Bede thikhade, Raja ni khamthan gibi jang khamriyaba se.

¹³ Rajarao de gibi grao joyarao ni basao ha khaja du Grao gibi joyaba subung khe bo khaja re

¹⁴ Raja ni thamsi de githi ha soriyaba se Girikyaba subung de boni thamsi khe majang ri du.

¹⁵ Raja ni mukhang jna khade, hayu mai du Boni nangjaothai de jimi jang hadi labuba lai se.

¹⁶ Girikma de gajao thanebo gabang hamdao Bujimabo guphu thane gabang hamdao.

¹⁷ Subung gibi ni lama de phap khe dangkhlai re Jar ni lama khe mirikyaba de jar ni hayu khe raokhi re.

¹⁸ Galaiya sani sagang ha subung sangga re Hamya jama ni sagang ha subung jar khe blaijao re

¹⁹ Sanggayarao jang baosi ja hi don mai hi dong ba thane Subung magainyarao jang nekhlik jao hi dongba hamdao.

²⁰ Sere slingrithai khe mani hi dong re, bo gnang ja re Ode sere Gabra ni basao ha asa deng re, boni jathai ham bi.

²¹ Sere ni khah ha girikma dong, bo subung buddi-gnang se Khuh gidi jang sling riyaba de subung buthu bujiba lai dao.

²² Sere niha bujima dong boni khlai hi de hayu ni dikhor se Thikhabo subung jabla de gibir ni jathai ni saja mai ma se.

²³ Buddi-gnang subung ni khah de jar ni khuh ni grao khe mathao re Boni khujer ni grao bo bujiba lai dao.

²⁴ Grao gidi de beredih lai se Bese ni khlai hibo di du, begreng ni khlai hibo hambi.

²⁵ Subung ni baothai ha lama hamba lai phnu du Thikhabo bo lama de githi ni lama se.

²⁶ Subung jar ni hoh khrangma ni khlai hi khusi bol jang dang re, Bo jar ni hukhrima jang khusi dang dao du.

²⁷ Subung hamya nalaibo hamya bao re Boni graothai bo wai lai se.

²⁸ Subung hamyayaba de nalaibo lailang si hamya bao re. Lugu khebo boni grao jang degao ri re.

²⁹ Subung khahsin-gnang de jar ni noharirao khe nam phnang re Ode bonsi khe lama hamya gede lang re.

³⁰ Sere mugur gao re, bo hamya bao re Sere khujer wai re, bo hamya dang re.

³¹ Khro phuba de raja ni khrothu lai se Subung gibi de olei ning ja ma se.

³² Subung khah laoyaba de jbah sgao thanebo thang dao Nogor khe deba thanebo jar ni thamsi khe mathaoyababo dedao.

³³ Sagang gede bede jama bokhe tharmai mane subung buthu sma nai ba Thikhabo, sagang gede bede jama Gabra ni phrang se mithi ba.