GYAN NI GRAO BUTHU 12 - DARA GADAIN N.T. with PSA and PRO (BSI)

¹ Sere slingrathai khe hamjao du, bo gyan khe hamjao du Thikhabo, sibringyaba khe nangjaoyayaba de gibir se.

² Hamba subung de Gabra ni phrang hamthai mai du Thikhabo, Gabra de ringlaiyaba khe dangkhlai du.

³ Subung de phap khe dopha hi subung jaya Thikhabo, gibi subung khede phi phu nang niya.

⁴ Hamba bihih de jar ni basai ni khlai hi khrothu se Thikhabo, laji phnuyaba bihih de boni begreng ni khlai hi sao riginyaba se.

⁵ Gibi subung ni baothai de beleng bi Thikhabo, phaphi subung ni dang slingriyaba de mosol se,

⁶ Phaphi subung ni grao de thih khaikho re Thikhabo, hamba subung ni grao jang bonsi khe sogo ri re.

⁷ Phaphi subung khede hokhlai hi jam la kha Thikhabo, gibi subung ni noh de rao hi dong la re.

⁸ Subung jar ni girikthai jang ning bakhan mai ma se Thikhabo, sere niha girikthai giri, bo khede naisle jao ma se.

⁹ Jima-lingma giri hi malai gede bao bani basao ha Saosi dangyasa khe deng hi subung musi niya hi dongba bo hamdao kho.

¹⁰ Gibi subung de jar ni mih-dao khe hamsisi naiso re Thikhabo, phaphi subung ni khusi ha gabang maya phnu lakhabo maya giri.

¹¹ Sere jar ni phadain khe hamsisi khlai hi dang du, bo mai ji nang, Thikhabo sereba de baoba hi jima bao re, boni ha bisar giri.

¹² Phaphi subung de subung hamyayarao ni don khe libi re Thikhabo subung gibirao ni yader ham hi ning dong lama se.

¹³ Hamya subung de jar ni khuh ni grao jang sagai re Thikhabo, gibi subung dibin-sibin ni phrang go re.

¹⁴ Boni yao ni khusi jang yaosandi maiba lai Boni khujer ni grao jang hamba bathai mai re.

¹⁵ Gibir subung de boni muthai ha boni lama beleng du Thikhabo girikyaba subung malai ni grao khna re.

¹⁶ Gibir subung de jar ni thamsi khe srap phnu re Thikhabo subung gibi de malai siji khabo khnaya lai dong la re.

¹⁷ Sakhi gibiyaba de gibi sakhi ri du Thikhabo sakhi mosol de mosol thi re.

¹⁸ Maya giri hi joyaba grao de seng jang yephlaba lai se Thikhabo, girikyaba subung ni grao jang subung buthu khe ham ri re.

¹⁹ Gibi subung ni khujer de thaoglao sosi dong ma se Thikhabo, mosol slai de khaisa ni khlai hi se.

²⁰ Khah ha phap baoyaba niha thokhima dong Thikhabo santi khe nangjaoyaba de khajama mai nang.

²¹ Gibi subung ni basao ha hamya galai nang niya Thikhabo, hamya subung ni hayu ha de dibin-sibin gablai ma se.

²² Gabra mosol thiyaba khujer khe regejao du Thikhabo, gibi subung ni basao ha bo khaja du.

²³ Subung mirikyarao de jar ni gyan khe hamsisi deng re Thikhabo, gibir de thaglag-baglag grao baigo re.

²⁴ Yao thaoya hi khusi dangyaba de raji khe yaowai ma se, Thikhabo sele subung de malai ni leng ja ma se.

²⁵ Khah lengyaba subung khe galai ri re Thikhabo mayarao jang thi khade bo khaja re

²⁶ Gibi subung de lugu kha mane jar khe mirik da re Thikhabo, phaphi subung de jar ni jathai jang gajai ha thang la re

²⁷ Sele subung de jar ni nangjaoyaba khe phura maiya Thikhabo sele niyayaba de jar ni nangjaoyaba khe mai du.

²⁸ Gibi ni lama ha de hayu dong Bo lama ha de thih phuyayaba dong.