GYAN NI GRAO BUTHU 10 - DARA GADAIN N.T. with PSA and PRO (BSI)

Solomon ni gyan ni grao buthu

¹ Basa ni girikma jang bupha ne khaja ri du, Thikhabo basa gibir se thikhade buma ne dukhu ri du.

² Hamyayaba don khe deng ba musibo lab giri Thikhabo gibi jang khusi dangyaba de thihyaba ni phrang sogo du.

³ Gabra gibi subung khe hukhum ri nang niya. Thikhabo, phaphi subung ni baothai khe jaso ri phuya.

⁴ Sele subung de dukhisa ja re, Thikhabo khusi dangyaba de gnang ja re.

⁵ Jalangma ha mai bojom khlaiyaba basa de girikyaba se, Thikhabo, mai rathor ha thuyaba basa de laji phnuyaba se.

⁶ Gibi subung ni khrosao ha hamthai gabang dong re Thikhabo phaphi ni khuh ni phrang hingsa baigo re.

⁷ Gibi subung ni wainsoma jang hamthai sophai re Thikhabo, hamya subung ni bumu de khma la re.

⁸ Sere ni khah ha girikma dong, bo hukhum buthu khe mani re, Thikhabo, mosol thibaiyaba de galai hi jam la ma se.

⁹ Beleng hi hemyaba de ham hi ning thang phu nang thikhabo, lama gerem hi hemya bani jathai mithi phu la nang.

¹⁰ Gibi khe thi raoyayaba subung dukhu sophai ri re, Thikhabo, mosol thibaiyaba de galai hi jam la ma se.

¹¹ Gibi subung ni khuh de hayu ni dikhor se, Thikhabo, phaphi subung ni khuh ni phrang de hingsa se baigo re.

¹² Jajaoyayaba de nam khormu baigo ri re Thikhabo hamjaoma jang khrip gajai khe phung khlip re.

¹³ Bujiya bani khujer ha girikthai dong Thikhabo, goda de gibir ni bisima ni khlai hi se.

¹⁴ Buddi ringyaba subung buthu de gyan bojom khlai re Thikhabo gibir subung ni khuh hade jamyaba so ri re.

¹⁵ Gnang ni don bonsi ni khlai hi nogor ni khorongma lai se Thikhabo suliyayaba bonsi ni suliyathai jang dukhu mai re.

¹⁶ Gibi subung lengyaba de bonsi ni khlai hi hayu labu re Thikhabo, phaphirao ni lab bonsi ni khlai hi saja se.

¹⁷ Sere slingriba khe mani du bo hayu ni lama ha se dong ba, Thikhabo sere sibringba khe nangjaoya, bo malai khe hamya ha langsmai du.

¹⁸ Naislema khe huiyaba ni khujer mosol se. Ar sere mosol khe baiphlung re bo gibir se.

¹⁹ Braha grao bang re, oraha gajai bo bang re Thikhabo girikyaba subung jar ni slai khe khah thao re.

²⁰ Gibi subung ni slai de hamba guphu se, Thikhabo, phaphi ni khah ni dam giri.

²¹ Gibi subung ni khujer jang gabang subung khe hamba khlai re Gibir subung de buddi asari jang thi la re.

²² Gabra ni hamthai jang don la bu re ar bo dukhu mai nang niya.

²³ Gibir de hamya jathai ha thang hi khaja re, Thikhabo subung bujiyarao girikma ha khaja re.

²⁴ Phaphi subung seng khe khin du, bo ning bonsi khe rem ma se. Gibi subung nangjaoyaba khe maiso ri ma.

²⁵ Baryung phaiba ha, phaphi khe sipkhao khla re Thikhabo subung gibi thaoglao jang rao hi song ma se.

²⁶ Gabrab jang hathai migrim ba lai ar waikhudi jang muthai riao ba lai. Subung sele jar ni haiha jaoyaba ni khlai hi se.

²⁷ Gabra khe khinba de hayu lao ri ba se Thikhabo, phaphi ni hayu songthe ri ba se.

²⁸ Gibirao, khajama mai ma se Thikhabo, phaphirao ni asa phura ja nang niya.

²⁹ Gibirao ni khlai hi Gabra ni lama de khaising than se. Thikhabo, hamya khusi dangyarao ni khlai hi jam than se.

³⁰ Gibi subung de asa khalibo phijao nang niya Thikhabo, phaphi subung raji ha dong nang niya.

³¹ Gibi subung ni khuh ni phrang girikma ni grao baigo re, Thikhabo, mosol thiyaba slai khe raso ma se.

³² Gibirao ni khujer snadi hamdu bokhe tharmai re Thikhabo, phaphi ni khuh hamya grao khe se ning tharmai ba.