GYAN NI GRAO BUTHU 1 - DARA GADAIN N.T. with PSA and PRO (BSI)

Gyan ni grao ni muilo

¹ Israel ni Raja David-ni basa Solomon-ni gyan ni grao buthu:

² Girikthai-slingrithai bising ni grao khe tharmai mane,

³ Gibi ar jayaba bisar khlai phu mane, Hamba hayu ar hamba slingrithai mai mane,

⁴ Subung khe girik ri mane Dekhu saiyarao ni khasu ha baoma phai phu mane,

⁵ Buddi-halai gnangrao khna hi bonsi ni ringthai bang dao thing, mithi phuyarao bonsi girikthai mai thing.

⁶ Graokhandi ar thi phnuyaba grao khe buji mane Gyanirao ni grao khe ar bising ni ortho khe buji mane.

Naigrik ni balam ha sigring ba

⁷ Gabra khe khinba de gyan jajen ba se. Thikhabo gibirrao de girikthai ni slingrithai khe nangjaoya,

⁸ Ani basa, khna lah, nini bupha ni slingrithai Ar nini buma ni slingrithai khe da blao

⁹ Bo buthu nini khro ni khim mala ja ma ar, Nini godo ni masi lik ja ma.

¹⁰ Ani basa, phaphirao ning khe naigrik khabo Bonsi ni grao khe da khna lah.

¹¹ Bonsi ede thi la khabo, Jing jang phai pha lah, Asaba saosi ni bithi ni khlai hi thim hi jon nang, Gajai giriyaba khe do nang,

¹² Mangkhlong lai jasosi bonsi khe gathang ha ning molo nang, Hakhor ha phip ba lai jasosi bonsi khe molo so nang,

¹³ Hamba hamba jinis khe jing khrip mai thar nang, Ar jini noh ha bo buthu jang gablai nang

¹⁴ Jing jang baosi dong pha lah ode, jing baosi ronlai nang.

¹⁵ Ani basa, bonsi jang da thang pha Bonsi ni yaphri ha da hem pha.

¹⁶ Bede thikhade bonsi ni igah phap gede se thang ba, Bonsi srap ning sthai mane bao re.

¹⁷ Khrip dao nuba ha jeh yenba de haglai se.

¹⁸ Je sere khe sthai mane kham hi jon re, Bo jar ning bo jeh ha nang la ma se.

¹⁹ Hamya khusi jang don bojaiyarao ni don jamba lai ning Bonsi khripbo olei ning jam ma se.

Girikthai nangjaoyayaba ni mirik ba

²⁰ Hakhli ha girikthai ni khurang sring sring jirikkhao bai du,

²¹ Girikthai de lamayung ar hakhli ha bak jang grao sainthi du.

²² Ning gibir sruh buthu, bislei sosi gibir sruh ja hi dongma kho? Malai jang bislei sosi thokhi jao ma kho?

²³ Ang joyaba khe nisi khna kha de Ani khah khe nisine ang khna ri kha mu! Ani baothai khe nisine khna ri ma mu!

²⁴ Thikhabo ang longba bubli ha nisi khnaya, Ang yao phlaoba ha nisi saosi bo khah riya.

²⁵ Ani slingrithai khe nisi maniya ar Ang joyaba khebo nisi khah ha dengya bani,

²⁶ Nisini dukhu-hadi ha ang mini ma; Nisini khophal hamya basain ha ang naisle ma.

²⁷ Dukhu-waimu nisi ni basao ha baryung lai sophai khali ha, Limthai-sathai, thiglik-thangglik sophai khali ha ang mini ma.

²⁸ Ode bonsi ang khe long nang, thikhabo ang thiphin nang niya, Bonsi ang khe smai nang, thikhabo mai nang niya,

²⁹ Bonsi girikthai khe dangkhlai bani ar Gabrani khinthai khe ajaoya bani,

³⁰ Ani slingrithai khe nangjaoya bani Ang joyaba khe bonsi dangkhlai bani

³¹ Bonsi ni dongthai-jithai ni bathai khe bonsi mai ji ma. Bonsi ni baothai ni bathai jang bonsi galai ma.

³² Gibir sruh buthu de jar ni lama hamya jang ning thih la nang, Bonsi ni sanggama jang ning bonsi jam ma se.

³³ Thikhabo, sere ani grao khe khna re, bonsi sogo jao nang, Bonsi suk jang dong hi khinma dong nang niya.