GALATIA 4 - DARA GADAIN N.T. with PSA and PRO (BSI)

¹ Thikhabo, ang ede thi du: somphoti maiginyaba khrip ni basao ha hoja jala kha bo, ansa jahi dongdu side bo leng jang gibin jaya kho.

² Boni bupha riba basain sophaiya side raokhiyaba jang naisoyarao ni bakhla ha dongma nang du.

³ Olei jasosi ning, jingbo ansa jahi dongba ha, habsao ni bese ni bakhla ha leng jahi jing dong ba se.

⁴ Thikhabo, bo bubli phura sokha ning Madai ning jarni basa khe, Dara ni bakhla ha masainjik hajai riyaba khe haiha kha,

⁵ basa jaba khe jing nuphu mani khlai hi ode Dara ni bakhla ha dongyarao khe kho mane khlai hi ja ba.

⁶ Nisi basa se bani Madai ning jarni Basa ni Bese khe haiha ba, bo Bese ni khlai hi jing Abba! Abai! thi dada jini khasu ha jirik khao ba.

⁷ Odebani, nisi leng niya hi, boni basa se ja ba; ning boni basa jakha de Madai ni dara jang somphoti maiginyaba se.

Galatiarao khe Paul wainso ba

⁸ Sagang ha de Madai khe mithiya hi, madai niyayaba buthu ni leng jahi dong ba,

⁹ Thikhabo, duha nisi Madai khe mithi bani yaohon ha se habsao ni bese haglai, musibo niyayaba, bonsi ni leng jahi dongphin mani nisi snadi jabani naiphin ba?

¹⁰ Nisi basain buthu, badain buthu, bubli buthu, maithai buthu khe mani du.

¹¹ Nisi ni khlai hi ang waimu nang du! Nisi ni khlai hi ang khusi dangyaba khripbo haglai ja nang thihi bo ang khin du.

¹² Daphlungrao, nisi khe ang khainsu du. Ang dongba lai nisi dong lah, angbo nisi dongba lai ning dong ba se. Nisi ani musi khebo hamya khlaiya.

¹³ Hamba graojma nisi niha ang thijenba ha, ani saomang raoya bani se thihi nisi tharmai du.

¹⁴ Ani saomang raoya khabo, nisi ang khe naisleya, regejaobo regejaoya; sorgo ni phrang Madai ni degla phaiyaba lai ang khe lamjao ba, Jisu Krista lai jasosi ning nisi ang khe mani kha.

¹⁵ Blai khade nisi ni muthai buthu khe khaikho hi a ne nisi ri mane sosi bao phu du thihi ang mithi du. Olei sosi nisi ang khe khajayaba la, duha nisi snadi ja ba?

¹⁶ Grao gibi khe ang nisi niha thi bani, ang nisi ni sotru ja kha na?

¹⁷ Malairao nisi khe lugu slam ma bao du, thikhabo, hamba balam ha niya; bede thikhade, nisi khe gibin khlai ma bao hi se nisi khe lugu slam ba.

¹⁸ Hamba grao ni balam ha se thikhade, hambi; ebo khe nisi jang baosi ang dongba ha se ning niya hi, nalai bo nisi dang mane khlai hi nisi khe ang nangjao du.

¹⁹ Hoi, ani basarao! Krista lai jayaba khe nisi maiyasi de saogo jenba ha sayaba jang jing nisi khe sari phin ma se.

²⁰ Nisi ni bising ha ang dongma bislei nangjao du, odese ang nisi ni balam ha gibin baoma mai la phu re. Nisi ni balam ha bislei ang khah waimu nang du!

Sara jang Hagar ni daogari

²¹ Dara ni bakhla ha dongma nangjaoyarao, ang khe thi lah, Dara ni grao snadi khe thiba nisi khnaya na?

²² Abraham ni basa gini dong ba, saosi jakha de lengjik jang maiyaba, saosi jakha de lengjik niyayaba jang maiya ba,

²³ thikhabo lengjik jang maiyaba basa saomang ni dara halai hajai ba, thikhabo lengjik niyayaba jang maiyaba basa de hanggaiyaba ni khlai hi se hajai ba, thihi reb du.

²⁴ Ebo grao buthu de daogari lai se. Bo masainjikrao khe hanggaiyaba grao magin phnu du. Saosi de hading ni subung ne leng ja mani khlai hi ning bo hajai ba se, ebo de Hagar se.

²⁵ Hagar jakha de Arabia raji ni Sinai hading se, duha Jerusalem ha dongyaba jang baosi se; bo jarni basathu jang baosi leng jahi dong ba se.

²⁶ Thikhabo, sorgo ni Jerusalem de sadhin se, bo ning jini buma se.

²⁷ Bede thikhade, sastro thi du, Ning sagrima, nana maiyayaba, khaja lah Ning saogo jenba ha sa ba lai saba giriyaba, jirik khao lah; Basai dongyaba subung thane bo khah bainyajik de boni basathu bangdaoyaba se, thihi reb du.

²⁸ Odebani daphlungrao, Isak lai ning grao hanggaiyaba ni basathu jing ning ja kha.

²⁹ Bo bubli ha saomang ni dara ha hajai phaiyaba, Bese ni dara ha hajai phaiyaba khe bo dukhu ri ba, olei ning duha sosi bo ja du.

³⁰ Thikhabo, Madai ni laisi ni grao ha bede thi ba? Lengjik khe boni basa jang baosi rikhon khla lah; bede thikhade, lengjik ni basa de lengjik niyayaba ni basa jang baosi don ni phantha maipha phuya, thi hi reb ba.

³¹ Odebani daphlungrao, jing lengjik ni basathu niya, jing lengjik niyayaba ni basathu se.