GALATIA 3 - DARA GADAIN N.T. with PSA and PRO (BSI)

Dara jang lonma

¹ Hoi, Galatia raji ni subung gibir buthu, sere jang nisi sibirjao ba? Nisi ni muh ha ning Jisu Krista khe kross ha dikpha hi ragaosi nisi ne phnu kha da.

² Ebo khe se ning, nisi ni phrang ang mithi ma nangjao ba: Dara ni khusi dangyaba buthu jang Bese khe maiba na, nisi khna dada lon bani khlai hi? Elei sosi nisi gibir se na?

³ Bese ha jen hi saomang jang nisi jam ri ma na?

⁴ Olei sosi ning dukhu khlaiyaba haglai jama na? Bo haglai ja nang niya dou!

⁵ Nisi niha Bese riyaba nisi ne ode nisi ni bising ha gmang thaosi dangyaba la Dara jang khusi dang bani bo dangba na, nisi khna dada lon bani khlai hi?

⁶ Abraham Madai khe lon ba, bo lonma jang se boni khlai hi bo dormo subung ja ba.

⁷ Odebani, ebo khe tharmai lah, sere lonma ha dong, bonsi ning Abraham ni basa thu se.

⁸ Madai ni laisi ha ede grao thi du, Madai khe lon bani khlai hi Jentailrao bonsi dormo ja ma thihi tharmai da hi, Nini phrang khrip jadi hamthai maima se, thihi Abraham niha hamba graojma khe sainthi da kha.

⁹ Odebani, lonma ha dongyarao de bonsi lonma ha Abraham jang baosi hamthai rijao ma se.

¹⁰ Dara jang khusi dang hi dongyarao si de bonsi sot ni bakhla ha se dong ba, Dara ni laisi ha khrip grao rebyaba lai dang mane khlai hi dongya kha de, bonsi sot rijao ma se, thi hi reb du.

¹¹ Madai ni muh ha saosi bo Dara jang dormo jaya thihi nujao hi ning dong, bede thikhala, sastro thi du, Lonma jang se dormo subung de thang hi dong ma.

¹² Dara de lonma ni phrang niya, bede thikhade, sastro ha reb du, sere khrip Dara jang nangyaba khusi dangphu re, bo thang hi dongma se thihi.

¹³ Thikhabo, Krista jini khlai hi sot ja mai kha, ode Dara ni sot ni phrang bo jing khe sogo lang kha; bede thikhade sastro thi du, sere bondaobra ha khasi jaoyaba si de sot maiyaba se thi hi reb du.

¹⁴ Abraham ni basao ha hamthai jayaba de Krista Jisu ha se Jentailrao ni basao ha dongphai phu ma; odehe, lonma ni khlai hi Bese hanggaiyaba khe jing mai phu ma.

Dara jang grao hanggaiyaba

¹⁵ Daphlungrao, marsi lai jahi ang thi du, marsi ni grao bakhathai bo joban khebo ja thing, rao ribani yaohon ha bonsi khru phin thaoya kha, bara riba bo bonsi bara riya kha.

¹⁶ Odehe, Abraham niha se grao hanggaiyaba dong ba, boni greng buthu niha bo. Gabang subung ni balam ha grao thiba lai, Greng buthu niha bo bo thiya hi, subung saosi ni balam ha grao thiba lai, Nini greng niha bo bo thiba se, bo de Krista se.

¹⁷ Edehe ang thi du: Madai ning joban khayaba khe, bo rao riyaba khe Dara nokha maithai jang rjabri maithai thimjhi ni yaohon ha dongphai khabo, grao hanggaiyaba de musibo niyahi bo gmaya.

¹⁸ Bedethikhala, don somphoti khe Dara ni khlai hi se thikhade, grao hanggaiyaba ni khlai hi niya, thikhabo, Madai grao hanggai bani se Abraham niha ri ba.

¹⁹ Ode thikhala, bo Dara riyaba la bede ja ma? Dang gajai la bede thihi phnu mane khlai hi Abraham niha boni greng grao hanggaiyaba sophaiya si nekhlai hi deglarao khe graodiyah yaowai hi bisar ri ba.

²⁰ Graodiyah asaba subung saosi ni gejer ha graodiyah japhuya; thikhabo Madai de saosi se ning.

Dara ni baothai

²¹ Dara ha Madai grao hanggaiyaba buthu khe hamya khlai du? Braha ode ja ma! Subung mathang phuyaba Dara khe se riba thikhade, dormobo Dara ni khlai hi dong ma ning nang ma se.

²² Thikhabo, Jisu Krista khe lon bani dara jang hanggaiyaba khe lonyarao niha riphu mani khlai hi Madai ni laisi ni grao ha ning khrip ni phap khe sadhin khlai kha.

²³ Thikhabo, lonma ni grao sophai mani sagang ha de, Dara ni bakhla ha jing dong ba; lonma ni grao baigo mani sagang ha de bo jing khe phraojep re.

²⁴ Odebani, Dara khe Krista sosi so ri mane khlai hi jini slingriyah bo ja ba, bede thikhade lonma jang jing dormo ja mane khlai hi.

²⁵ Thikhabo, duha lonma sophai bani yaohon ha jing slingyani bakhla ha dongya kha.

²⁶ Jisu Krista khe lon bani nisi khrip bo Madai ni basa jathar kha.

²⁷ Nisi ni bising ha Krista ha baptisma layarao si de, bonsi Krista ha salai ri kha.

²⁸ Duha de bonsi Juda jadi thihi gibin giri kha. Greek jadi bo bonsi giri kha; bonsi leng bo giri kha, bonsi leng niyayaba bo giri kha; miyah masainjik thihi bo bonsi giri kha; bede thikhade Krista Jisu ha nisi jamthar si bo saomang masi ja kha.

²⁹ Krista ni nisi jakha de, Abraham ni greng grao hanggaiyaba lai don somphoti phantha maiginyaba nisi ja kha.