DANGYASARAO 9 - DARA GADAIN N.T. with PSA and PRO (BSI)

Saul gadain hajai ba

¹ Thikhabo Saul, Gabra ni yaohon rikphayarao khe hophra mani grao ode sthaima baoyaba grao khe smai hi ning dong re.

² Jonthai dedao thaoyaba niha bo thang hi, Damaska ha bojom jayaba khrip noh ha, subung buthu niha ri mani khlai hi bo laisi sain ba, bo lama ni subung asaba khebo, bo goron kha de, masainjik ja thing, miyah ja thing, kha hi labu phu mane khlai hi,

³ odehe, bo thangba ha, Damaska rogong gabasi sohiba jang boha ning nokhasao ni phrang jnama boni sersi giding jnaphai ba.

⁴ Bo hah ha galai hi, boni ha, Saul, Saul, ning la snadi jabani ang khe dukhu ri ba? thihi khurang khna ba.

⁵ Bo sing ba, O Gabra, ning sere? Bo thiphin ba, Ang de ning dukhu riyaba Jisu se.

⁶ Thikhabo, baija hi, nogor ha hapsing lah, odehe, snadi dangma nang du, bonsi ning khe thi nang.

⁷ Saul jang baosi thangyarao thimane tharmaiya hi bonsi song hi gmang ba; bede thikhala, khurang bonsi khna du, thikhabo bonsi saosi khebo nuya.

⁸ Saul de hah ni phrang baija kha, ode bo muthai naiha ba, thikhabo bo musi khebo nuphuya kha. Odebani, bokhe yao remhi, Damaska ha bonsi langhi hapsing kha.

⁹ Nokha sain tham nuya hi, musi khebo bo jiya lingya hi dong ba.

¹⁰ Damaska ha ning, lonyaba saosi, boni bumu Anania thiyaba dong ba. Gabra bokhe saomi lai thi ba, Anania! Boha bo thiphin ba, Gabra, ang eraha dong.

¹¹ Gabra boni ha thi ba, Baija lah, ode Noleiyung Belengyaba thiyaba ha thang hi, Juda ni noh ha, Tarsa nolei ni subung, Saul thiyaba khe sing tha; khna lah! Madai bi hi ning dong,

¹² odehe, boni bumu Anania thiyaba, subung saosi boni muthai khe nu ri mane khlai hi, boni basao ha bo yao deng ba jang muthai nu kha.

¹³ Boha, Anania thiphin ba, Gabra, ebo subung Jerusalem ha nini subung gatharrao ni basao ha gabang hamya khlai du thihi gabang subung ni khuh ni phrang boni balam ha ang khna ba;

¹⁴ eraha bo nini bumu khe layarao si khe rem mane khlai hi Jonthaimarao ni phrang grao ni hukhum mai hi ning dong thi.

¹⁵ Thikhabo, Gabra boni ha thi ba, Thang la ga, Jentailrao ni Rajarao, Israel greng buthu niha ani bumu khe labu mane khlai hi bo ang saikhoyaba mudik se.

¹⁶ Ani bumu ni khlai hi bo bislei dukhu khlai ma nang nang bonthane ang sainthi rima se.

¹⁷ Odebani, Anania thang hi, noh ha bo hapsing kha, ode boni basao ha yao denghi thi ba, Daphlung Saul, nini muthai nu mane ode Bese Gathar jang gablai hi ning dongphu mane khlai hi, Gabra, ning phaiba ha, ning jang nujaoyaba Jisu ning ang khe haiha ba se.

¹⁸ Boha ning boni muthai ni phrang smaba muphin lai galai hi, boni muthai nuphin kha; ode, bo baptisma la kha.

¹⁹ Makham jihi bo thar japhin kha, ode, Damaska ha lonyaba dongyarao ni bising ha khaisa basain bo dong ba.

Damaska ha Saul grao sainthi ba

²⁰ Saul de sunagog buthu ha thang hi, Jisu de Madai ni Basa ning thihi bol jang sainthi ba.

²¹ Boha, bo grao khe khnayarao khrip bo hamsi ning gmang lai ba, Ebo subung la, Jerusalem ha boni bumu layarao khe dukhu riyaba niya kho? Ebo subung buthu de Jonthaimarao niha khahi lang mani balam jang se bo era phaiba niya? bonsi ode thi ba.

²² Thikhabo Saul, bol raodao phin hi, bo gibi gibi Krista ning thihi Damaska ha Juda dongyarao khe bo niyathai ba.

Judarao ni phrang Saul degao ba

²³ Basain galao ni yaohon ha Saul khe sthai mane khlai hi, Judarao masi jahi bonsi sainlai ba;

²⁴ thikhabo, bonsi bisar khlaiyaba grao khe saosi subung tharmai kha. Bonsi bokhe sthai mane khlai hi nogor ni khorong daoglap ha sain hor jonhi dong re.

²⁵ Thikhabo, boni yaohon rikphayarao bokhe lang hi, hor ha, khorong baji gede bonsi dikhlai kha.

Jerusalem ha Saul

²⁶ Saul de Jerusalem gede thanghi sohi ba ha, yaohon rikphayarao jang goron laihi dongma bao ba. Thikhabo, bonsi khripbo bokhe khin ba; bede thikhade, yaohon rikphayaba se thihi bonsi lonya.

²⁷ Odehe, Barnaba bokhe bo haijaoyarao niha langpha hi, lama ha Gabra khe goron bani balam ha, Jisu ni bumu jang Damaska ha khitha raoma jang boni grao khe bonsi niha bo sainthi ba.

²⁸ Odebani, Saul de Jerusalem ha bonsi niha thang re, phai re, Gabra ni bumu jang khitha raohi graobo thi re.

²⁹ Boha, Judaa, Greek grao yaowaiyarao ni bising ha, grao thihi, bo niyalaiba, thikhabo, bonsi de bokhe sthaima bao du.

³⁰ Daphlungrao bo grao khe khnaba jang, Kaisari ha bonsi lang hi, Tarsa nolei ha haiha kha.

³¹ Odehe, longjomrao Juda raji ni haphai buthu ha, Galili raji ni haphai buthu ha, ode, Samari raji ni haphai buthu ha bonsi raodao raodao jahi, bonsi santi jang dong ba; ode, Gabra khe khin hi, Bese Gathar ni santi jang bonsi dong ba, ode, bonsi bangdao bangdao ja kha.

Peter Ainia khe ham riba

³² Peter khrip hathan ha thang ba, lamai jang Ludda nogor ha subung gathar dongyarao niha bo thang ba.

³³ Oraha ning subung saosi, boni bumu Ainia thiyaba, adur jahi nokha maithai jai, thuyam ha thuhi dongyaba khe nu ba.

³⁴ Peter bokhe thi ba, Ainia, Jisu Krista ning khe ham ri kha, baija hi nini yenyaba khe thon lah. Boha ning bo srap baija kha.

³⁵ Odehe, Ludda nolei jang Saron haphai ha dongyarao khrip bo Ainia khe nuhi, Gabra ni gede bonsi phai ba.

³⁶ Joppa nolei ha, lonyaba subung saosi, boni bumu Tabitha thiyaba, dong ba. (Greek grao jang de boni bumu Dorka se, boni ortho de mihsai se). Bo gabang hamba khusi dang hi riphain khe ri re.

³⁷ Bo bubli ha ning limhi, bo thih lang la kha, ode, bokhe bonsi dugur rihi noh ni khutha basaothao ha thu rihi deng ba.

³⁸ Ludda nolei de Joppa nolei ni rogong ha se bani, ode yaohon rikphayarao Peter khe oraha dong thihi bonsi khna hi, Phongsi phai thihi khainsu mane khlai hi boniha subung gini haiha ba.

³⁹ Odehe, Peter baija hi, bonsi jang thangpha kha; ode, bo sohiba jang bokhe noh ni khutha basao ha bonsi lang ba, bo ha khrip masainjikrao boni rogong ha songhi, Dorka bonsi ni bising ha dongba ha bo sola slamyaba buthu, rih daoyaba buthu phnu hi bonsi gra lai ba.

⁴⁰ Peter de bonsi khrip khe bo baigothar rihi, yasgu thuhi, bo Madai biba. Ode, manggathi khe bo nehi, Tabitha, baija lah, ode bo thi ba. Boha ning bo baija hi muthai nai kha, ode Peter khe bo nuba jang bo kham kha.

⁴¹ Peter yao phlao hi bokhe sik khu ba, ode subung gatharrao jang banjikrao khe longhi, bokhe gathang phnu kha.

⁴² Ebo grao khe Joppa nolei ni khrip bo khna thar hi, gabang subung bo bonsi Gabra khe lon kha.

⁴³ Peter de gabang basain Joppa nolei ha Simon, migur slamyaba ni noh ha dong ba.