DANGYASARAO 12 - DARA GADAIN N.T. with PSA and PRO (BSI)

Peter phatho ni phrang go ba

¹ Bo bubli ha, Raja Herod longjom ni subung gejesi ni basao ha dukhu rima baohi bo bonsi ni basao ha yao sugu ba.

² Jakob, Johan ni daphlung khe, seng jang bo dainthai kha.

³ Boha Judarao de khah hamba khe bo nuhi, Peter khebo rem ma baophin ba (Bo basain jakha de humao giriyaba hon ni mel sohi phaiba basain se).

⁴ Peter khe rem bani yaohon ha phatho ha bokhe jeb ba, ode siphaiya bri bri khlai hi dol bri, bonsi slai slo khlai hi raokhi ri ba. Bede thikhade, baiglai mel jam bani yaohon ha khrip subung ni sagang ha bokhe labuhi bisar khlai ba bao ba.

⁵ Odebani, Peter khe bonsi phatho ha phirik phirik deng ba; thikhabo, longjomrao bonthane khlai hi khah jang muh jang Madai niha bi ri ba.

Peter phatho ni phrang baigo ba

⁶ Herod subung buthu niha Peter khe labu mani sagang ha, okhali ni bohor ha de, Peter khe jingjri magin jang khahi siphaiya gini ni gejer ha thu ba, boha naiso hi raokhiyarao bo phatho khe bonsi naiso hi raokhi ba.

⁷ Srap khlai hi Gabra ni saosi degla boni rogong ha songphai hi, khutha bising ha jna phai hi, Peter ni sangkhreng ha yaosi jaopha hi bokhe masa ba, Sangga baija lah, ode bo thi ba. Ode, bokhe khayaba jingjri buthu galai lang la kha.

⁸ Sorgo ni degla ning boni ha, Jengkhong khahi nini jutha khe ga lah, ode thi ba. Bobo bo saniba lai dang la kha. Ode, sorgo ni degla boni ha, Nini rih khe hamsisi phin hi, ani yaohon ha phai lah, bo ode thi ba.

⁹ Peter de baigo hi, boni yaohon rikpha lang kha. Sorgo ni degla dongthai khe gibi ning thihi bo tharmaiya, bo saomi nuba lai se jajao ba.

¹⁰ Bonsi sagangthao ni naisoyaba jang boni gibin naisoyaba khe lailang bani yaohon ha de, baigo ginyaba ser ni derga ha sohi, bo bonsi ne khlai hi khuru lang la kha; ode, bonsi baigo hi, daoglap masi bonsi lailang kha. Bonsi thangsai ba ha ning, sorgo ni degla de srap dangkhlai hi thang la kha.

¹¹ Peter smao ba jang, Gabra ning jarni degla khe haiha hi, Herod ni yao ni phrang, Juda subung buthu ni asama khrip ni phrang, bo angkhe sogo kha thihi duha gibi jang ang tharmai kha, bo ode thi ba.

¹² Ode, tharmai hi Mari ni noh hah hap ba, bo Johan, Marka thiyaba ni buma se. Oraha ning gabang subung Madai bi dada bojom jahi dong ba.

¹³ Hakhli ni daoglap khe bo doba jang, mathla saosi, Rodi thiyaba lengjik, sing mane khlai hi bo phai ba.

¹⁴ Bo Peter ni khurang khe khna ba jang, khaja hi derga khe khruya hi khaising phin hi, Peter de derga kholei ha song hi dong, thihi sainthi ba.

¹⁵ Thikhabo, bonsi bokhe thi ba, Ning gibir ja kha. Thikhabo, Gibi jang ning thiba se, thihi bo thi ba. Boha bonsi thiphin ba, Boni sorgo degla janai du.

¹⁶ Peter de derga dohi ning dong ba; ode, bonsi derga khuru ba de, bokhe nuhi, hamsi ning gmang lai ba.

¹⁷ Bo bonsi khe phirik phirik dong mane khlai hi yao jang magna ba, Madai ning phatho ni phrang bo labu bani grao khe sainthi kha. Ode, Ebo grao khe Jakob jang boni daphlungrao nihabo sainthi lah, thi ba, ode, bo baigo hi raji gibin ha thangla kha.

¹⁸ Phorong japhai hi, siphaiyarao de, Peter bede ja ba? thihi bonsi hamsi ning waimu nang ba.

¹⁹ Herod de bokhe smai ba, thikhabo, maiya hi raokhi hi naisoyarao khebo johi, sthai mane khlai hi hukhum ri kha. Odehe, Herod Judai raji ni phrang Kaisari nogor ha thang hi, oraha ning bo dongsong kha.

Herod thih bani grao

²⁰ Herod de Tura jang Sidon nogor ni subung buthu ni basao ha bo hamsi ning jajaoya ja ba. Bonsi ning Blasta, rajani noh khe naisoyaba khe, bonsi jang baosi slam hi, graosi jahi, boni ha bonsi phai ba, ode bonsi ni nogor gede ni Raja ni nogor gede ni jimu barai lai bani mili mane bonsi khainsu ba.

²¹ Bo basain khali de, Herod ning Raja ni gainsari khe phin hi, Raja ni khamthan ha kham dada, bonsi niha bo grao thi ba.

²² Khrip subung thi ba, Ebo de Madai ni khurang se, subung ni khurang niya, thihi bonsi jirik khao ba.

²³ Bo de Madai niha bakhan riya bani Gabra ni sorgo degla srap bokhe rem hi husrangma jang jijao hi bo thih lang la kha.

²⁴ Thikhabo, Madai ni grao de gublung thar hi, bangdao phalang ba.

²⁵ Barnaba jang Saul khusi khe dang blai hi, Jerusalem ni phrang bonsi phaiphin hi, Johan, Marka thiyaba khe labu pha kha.