3 JOHN 1 - DARA GADAIN N.T. with PSA and PRO (BSI)

Khlimyaba

¹ Khrao de- Hamdaothaoyaba Gaia, grao gibi ha ang khasaoyaba niha,

² Hamdaothaoyaba lugu, bese ha ning hamthai maipha langba lai ning, khrip jadi ha ning hamthai maiyaba ode ning sao hamphu mani khlai hi ang ninthane Madai bi ri du.

³ Daphlung gejesi phai hi nini gibi khe sakhi riba ode grao gibi ha ning dongyaba khe bonsi phai hi sainthi bani, hamsi ning ang khaja du.

⁴ Ani basathu grao gibi ha bonsi dong thihi khnaba thane bangdao hi khajama ani ha musibo giri.

Gaia khe bakhan khlai ba

⁵ Hamdao thaoyaba, ebo daphlungrao khe, basao mithiyayaba ja la khabo, bonsi ne ning dangyaba siha, lonma jang ning dang re;

⁶ nini hamjaoma khe longjom ni sagang ha bonsi sakhi ri ri kha. Madai ni khusi dang mani mophosol thangba ha, Madai ni subung lai ning bonsi khe juru khade hamsi ning ham nang.

⁷ Bede thikhade, bonsi de Krista ni bumu ni khlai hi baigo dada, Jentailrao ni phrang juruma musi khebo bonsi laya.

⁸ Odebani, grao gibi ha gaba laiyaba jing ja phu mani khlai hi, oleiyaba subung buthu khe jing juruma ning nang du.

Diotrepha jang Demetri

⁹ Longjom niha de grao gejesi ang reb kha; thikhabo bonsi ni bising ha dedaothao hoja jama nangjaoyaba de jing khe lamjaoya.

¹⁰ Odebani, ang phai khade, bo khusi dangyaba buthu khe ang wainso ri phin nang, jini gajai ni balam khe thi dada grao bangthai khe bo khebo bo jajaoya, khajama nangjaoyarao khebo bo magna hi, longjom ni phrang bonsi rikhon re.

¹¹ Hamdao thaoyarao, phap khusi khe daogari da nai lah, hamba khusi khe daogari nai lai. Hamba khusi dangyaba de Madai ni phrang se, hamya khusi dangyaba de Madai khe bo nuya.

¹² Demetri ni balam ha khrip subung bokhe bakhan khlai ba, grao gibi habo bo bakhan mai ba. Jingbo bokhe bakhan khlai pha ba, jing bakhan khlaiyaba khe gibi se thihi ning tharmai du.

Khoba ni khlimthai

¹³ Nini ha grao gabang reb mani aniha dong, thikhabo khali jang rebma ang nangjaoya;

¹⁴ nisi jang srap goron laihi sagang phrang song naipha hi jing sainlai nang.

¹⁵ Nisi niha shanti dong pha thing. Jini lugurao nisi khe khlim ha du. Jini lugurao khe bonsi ni bumu khe lahi ani baslai ha khlim lah.