2 TIMOTHE 2 - DARA GADAIN N.T. with PSA and PRO (BSI)

Krista Jisu ni siphaiya lonma gnang

¹ Ning ani basa, Krista Jisu ni khasaoma jang ning khe rao ri la thing.

² Gabang subung ni sagang ha sakhi ri hi slingriyaba khe khnayarao de subung gibin buthu khe slingri phin phuyaba subung lonma gnangrao niha nisi deng ri lah.

³ Krista Jisu ni hamba siphaiya lai ang jang baosi dukhu khlai lah.

⁴ Siphaiya ha dong mani saikhoyaba khe khaja ri mane khlai hi, asaba siphaiya jbah thangba bubli ha jar khe jar habsao ni khusi buthu ha thaoya.

⁵ Solei baha gabayarao bo dara ha lai nanglaiya thikhade bo yaosandi mai phuya.

⁶ Phadain gedebo dukhu khlaiyaba de bathai thaidayaba khe mai jima nang du.

⁷ Ang grao thiyaba khe khah ri hi bao lah, Gabra ning ningkhe khrip ha bujima ri nang.

⁸ Hamba graojma ang thi du, Jisu Krista, David ni greng ni subung, subung githi ni phrang baija phinyaba khe wainso lah.

⁹ Bo hamba graojma ni khlai hi se, ang dukhu khlai ba, ode subung hamyayarao lai sikol jang ang khajao ba, thikhabo Madai ni grao khe de khaya.

¹⁰ Odebani, Jisu niha dongyaba sogoma khe, thaoglao muima jang masi bonsi mai mani khlai hi, saikho jaoyarao ni khlai hi ang blaiyasi blaiyasi dukhu khlai ba se.

¹¹ Ebo grao thiyaba khe lonsing mani dong; Bo jang baosi jing thih khade, bo jang baosi jing thang ma se.

¹² Jing dukhu khalao khade, raji khebo bo jang baosi yaowai ma se; Jodi bokhe jing dangkhlai khade, bobo jing khe dangkhlai ma se;

¹³ Jing lon laya khabo, bode lonma gnang slam du, Jar khe jar dangkhlai la phuya, thi du.

Hamba dangyasa

¹⁴ Ebo grao khe tharmai ri lah, grao selai hi grao banglaiya mani khlai hi Madai ni muh ha khah jang muh jang sainthi lah. Ode niyakha de musi lab ja nang niya, khnayarao ne khlai hi hamya se khlaidao ba.

¹⁵ Ning de jar ni khusi dangba lajiya, grao gibi khe gibi gibi slingriyaba Madai jang bujao mani khusi dangyaba lai Madai niha jar khe yaopha mani khlai hi blaiba lai lai phnu lah.

¹⁶ Madai khe man khlaiyayaba gede haglai grao thiba khe dangkhlai lah, bede thikhade bonsi de subung buthu khebo Madai khe khiyal khlaiyadao khlaiyadao khlai nang.

¹⁷ Bonsi grao thiyaba bo gasa hamya lai sip phalang ma se. Bo buthu ni bising ha Humenai ar Philetasbo bonsi jang dongpha du.

¹⁸ Bonsi ning, Baija phinyaba de sophai blai kha thi hi grao gibi khe dangkhlai kha; odebani gabang subung buthu ni lonma khe bonsi dibin sibin khlai re.

¹⁹ Thikhabo, Madai longthai gaiyaba de raothe the song du, boni basao ha sip pha du, Gabra de jar ni buthu khe mithi du thi hi ode, Gabra ni bumu khe layarao side hamya khe dangkhlai ma nang du thi hi reb du.

²⁰ Noh gedeba ha bokhoh jang mudik buthubo gajao jang guphu jang se ning slamyaba ja blai ba, bondo jang hah ni mudikbo dongba se; sereba khe maya doya khlai mani dong, thikhabo sereba khe maya doya khlaima nangya ginyababo dong.

²¹ Sere hamya jinis ang thiyaba buthu ni phrang degao du, bode muilo gnang yaodi, mudik gathar, hamba khusi dang mane salai hi ning dongma se, ode noh bubra ne khlai hi lab jadaothao ja ma se.

²² Thikhabo, naga ni mijingma khe dangkhlai hi, khah gathar ja hi Gabra ni bumu khe layarao jang baosi, dormo ha ja thing, lonma ha ja thing, hamjaoma ha ja thing, milima ha ja thing, bo yaohon rikpha lah.

²³ Ebo nam khormu lab giriyaba ode gibir jathai ni phrang gibin dong lah, bede thikhade ebo buthu ni phrang se nam khormu baigo ba thi hi ning tharmai lah.

²⁴ Gabra ni dangyasa de nam jabaiyaba subung jama niya, bokhe gar hi khrip subung ni basao ha maigru gru ode slingriba ringyaba ode khah laoma,

²⁵ gasaindik dik ja hi bokhe badaiyarao khe gibi khlaiyaba se ja ma nang ba. Madai ning bonsi khe grao gibi khe mithi mani gede ha lang smai hi khah phin mani hajorabo riphu du.

²⁶ Ode, sgo sgain nangjaoyaba boni nangjaothai dang mane leng ha sgaiyarao khe tharmai hi bonsi sogo ri phu du.