2 PETER 3 - DARA GADAIN N.T. with PSA and PRO (BSI)

Gabra phaiphin mani grao

¹ Hamjao daothaoyarao, duha ang ebo laijma nisi ne haihayaba de phin gin ja kha. Nisi tharmai blaiyaba khe tharmai riphin hi, nisi ni baothai gathar japhu mani khlai hi ang reb pha lai ba se.

² Boni sagang ha gorasali gatharrao grao sainthi dayaba buthu ode nisi ni dangyasa jini Gabra jang sogoyahba ni grao riyaba nisi ne sainthiyaba khe nisi wainso song lah.

³ Ebo khe ragao sisi tharmai da lah: basain jamthaoba buthu hade, minithaiyarao de minithai hi ning ode jar ni nangjaoma ha ning dongyaba baigo phai nang.

⁴ Bo phaiphin mani grao hanggaiyaba la braha dong? Jini greng buthu thih tharba ni phrang ning khrip jinis de, jinis sangsai jenba ni phrang bonsi ni dongthai nalai lai ning dong, thi hi bonsi minithai ma se.

⁵ Thikhabo, bonsi ebo khe blao maisi re, gda ha ning Madai ni grao jang nokhasao buthu khe bo slam ba, phirthi khe dih ni phrang se bo slam ba, dih jang dih ni gejer ha bokhe deng ba.

⁶ Ode dih khublib khali, bo bubli ha, habsao de, bo dih jang lim hi, bokhe hamya khlai tharya bani grao buthu se.

⁷ Thikhabo, Madai khe khiyal khlaiyayarao ni balam khe bisar ni bubli ha ode sjam jao mani basain ha wai jang saokhrip mani khlai hi, duha ni nokhasao buthu khe ode phirthi khebo, bo grao jang ning mathao ba se.

⁸ Hamjao daothaoyarao, ebo jinis masi khe da blao. Gabra ni baothai hade basain sain si de nokha maithai jang rjing si lai se, nokha maithai jang rjing si bo basain sain si lai se.

⁹ Subung ni baothai de Gabra ni baothai lai niya, olei ning Gabra ni hanggaiyaba ni balam hade bo lengya. Saosi bo gma ma nangjaoya hi, khrip subung bonsi ni phap ni phrang khah phin hi, boni gede thangphin ma nangjao bani nisi ni khlai hi se ning bo khah lao ba.

¹⁰ Thikhabo, Gabra ni basain de makhao lai srap phai ma se. Okhali ni basain hade, nokhasao buthu ha hamsi ning biring hi jam nang, ode nokhasao ha khrip jinis dongyaba wai jang khamthar nang, ar phirthi jang boni bising ha khrip jadi dang hi dongyaba buthu khe bo saokhrip thar ma se.

¹¹ Ebo khrip jinis buthu khe olei sjam thar ma thikhala, nisi buthu la bede ja ma?

¹² Madai basain sainyaba bubli khe nai hi ning jon hi dong lah, Madai khe khiyal khlai hi dongthai gathar khe la hi nisi bao ma nang du. Okhali ni basain ha de nokhasao buthu khe wai jang sjam jao nang, jinis khitha buthu khebo wai ha hangthai jao ma se.

¹³ Thikhabo, jing de Madai grao hanggaiyaba, nokhasao gadain buthu ode phirthi gadain, boni bising ha dongyaba dormo khe jing jon du.

¹⁴ Odebani, hamjao daothaoyarao, ebo jinis buthu khe nisi jon bani Madai ni sagang ha gathar jang gajai giri hi dong mani khlai hi blaiba lai lai nisi ranpha lai hi, bo jang mili hi dong lah.

¹⁵ Odehe, jini Gabra ni khah laoma jang sogo jaoyaba nisi japhu mani khlai hi bubli ne hajora khe saikho lah. Madai ning boni gyan khe riba lai ning jini daphlung Paul-bo ebo grao riyaba khe bo reb ba se.

¹⁶ Boni laijma buthu ha bo rebyaba grao gejesi khe bujiba hamsi ning du bi, musi khebo slingya ode subung raoyayarao de laisi gibin khe bonsi baothai belengyayaba lai bonsi ni baothai belengya hi, jar khe hamya khlai la re.

¹⁷ Odebani, hamjao daothaoyarao, nisi de tharmai kha bani girik lah, ode niyakha de, dara khe bera khlaiyayarao ni phap jang nisi khe lang la hi, nisi rao hi dongba ha nisi galai ma se.

¹⁸ Thikhabo, jini Gabra jang sogoyahba Jisu Krista khe mithiyaba ha nisi dedao phalang lah. Boni ha ning duha ni phrang thaoglao jang muima dong thing. Amen.