2 PETER 1 - DARA GADAIN N.T. with PSA and PRO (BSI)

Khlimba

¹ Jisu Krista ni leng jang dangyasa Simon Peter de, jini Madai ni dormo ni khlai hi ode jing khe sogoyahba Jisu Krista ni khlai hi ode jini Madai ni dormo ni khlai hi muilo jadao thaoyaba lonma jing maiba lai maiyarao niha:

² Jini Madai ni gyan ha ode Jisu, jini Gabra Jisu ni gyan ha ning, khasaoma jang shanti bara phalang thing.

Long hi saikho jaoyarao

³ Bo jar ni muima ode boni hamma ha jing khe longyaba khe jing mithi bani khlai hi, bo Madai ni raothai jang Madai khe khiyal khlai bani balam ha, ode hayu ha jing nangyaba khrip jadi khe bo jinthane yaopha kha.

⁴ Odebani, jinis ri mane bo hanggaiyaba dedao thaoyaba ode muilo jadao thaoyaba khe bo jinthane ri kha. Odebani, habsao ni phap libima jing khe hamya khlai phuyaba ni phrang nisi baigo hi, Madai ni gede nisi masi japhu kha.

⁵ Odebani se hamsi ning ranpha hi, nisi ni lonma ha ning hamma ha dong dada, nisi ni hamma ha ning bujima,

⁶ nisi ni bujima ha ning jar khe sibring lahi, jar ni sibringma ha ning khah lao lah, khah laoma ha ning Madai khe khiyal khlai hi,

⁷ nisi Madai khe khiyal khlaiyaba ha ning khasao lai hi, jar ni daphlung khe hamjaoma ha bangdao phalang thing.

⁸ Bo jinis buthu khe nisi la hi, nisi ni bising ha bara phalang khade, jini Gabra Jisu Krista khe mithi bani balam ha, bathai thai daothao ode lab jadaothao bo nisi khe slam ma se.

⁹ Thikhabo, sere bo jinis buthu khe maiyayaba de, muthai gana, musi nuyaba lai se. Sagang hade boni phap buthu khe susa rihi bo blao phinyaba khe se thi ba.

¹⁰ Odebani, daphlungrao, nisi long jaoyaba jang nisi saikho jaoyaba rao ri mani khlai hi ranpha dao lah, bo khusi buthu khe nisi dang kha ning asaba khalibo nisi galai nang niya.

¹¹ Odese, jini Gabra ode sogoyahba Jisu Krista ni thaoglao raji ha hap mani nisi ne muima jang salai ri ma se.

¹² Odebani, ebo jinis buthu khe nisi ning tharmai la kha; odehe nisi niha sophaiyaba grao gibi khe nisi rao rihi dongyaba, ebo jinis buthu khe nalaibo wainso riphin mani ang nisi khe nangjao du.

¹³ Ebo rih ni noh bising ha ang dongdu si de, bo grao gibi nisi khnayaba khe nalai masayaba de nang du thi hi ang bao du.

¹⁴ Jini Gabra Jisu Krista ning jinthane bo ragao sisi sainthiba lai, ebo ani saomang ni noh ni phrang sangga baigo ma nang ma thi hi ang tharmai du.

¹⁵ Ang baigo bani yaohon habo ebo grao buthu khe asaba bubli habo nisi wainso songphu mani khlai hi blaiba lai ang ranpha ma se.

Krista ni muima khe nuyarao

¹⁶ Jini Gabra Jisu Krista muima jang bo phaiphin mani grao khe nisi ne jing sainthiyaba de, gdani khah muh khe slamsing hi haglai bonsi niha jing sainthi ba niya, jing jar ni muthai jang boni muima khe nuyarao se thi hi tharmai lah.

¹⁷ Ebo ning ani basa, ang hamjao daothaoyaba, boni basao ha ang hamsi ning khaja du, thi hi hamsi ning muima ni phrang khurang baigo phai hi sainthiyaba, bo ning ja kha, bupha Madai ni phrang muima jang bakhan maiyaba.

¹⁸ Ode, hading gathar bo jang baosi jing dongba ha, bo khurang sorgo ni phrang baigoyaba khe, jing bo jar ning khna kha.

¹⁹ Odebani, sainthi dayaba grao nangdao thaoyaba jini ha dong. Nokha naiya si de nisi ni khasu buthu ha sathrai naiding baigo phaiya si de, hathan andar ha thaophari jnahi dongba lai ning, ebo grao khe hamsisi nisi naiso khade, nisi hamba khusi dangyaba ja nang.

²⁰ Madai ni laisi ni grao ha asaba thidayaba khe, jar ni baothai jang thi phla rima niya, thi hi sagangthao ha tharmai da lah,

²¹ asaba grao sainthi dayaba de subung ni phrang grao baigoyaba niya; subung buthu niha Bese Gathar haiha hi Madai ni phrang se bonsi sainthi ba thi hi bao lah.