2 KORINTH 9 - DARA GADAIN N.T. with PSA and PRO (BSI)

Subung gatharrao niha yaosandi riyaba

¹ Duha, subung gatharrao khusi dang riyaba grao khe nisi niha grao gabang reb ma nangya kha dou.

² Nisi salai blai hi ning dong thi hi ang tharmai du. Ebo grao ni balam ha se Makedonia ni subung buthu niha: Minisi ni phrang ning Akaia raji ni subung buthu de salai blai hi dong, thihi angbo nisi khe sangga ha du. Nisi sahos jang gabang subung khebo smao ri kha.

³ Bede thikhade, ebo jinis ha, jing nisi sanggayaba de bojom jaya mani odehe ang thiba lai ning nisi salai mani khlai hi daphlungrao khe ang haiha ba se.

⁴ Ode niyakha de, Makedonia raji ni subung gejesi ang jang rikphayaba, nisi salaiya hi dongba khe bonsi nuphai kha de, nisi laji nuginyaba khe thiya hi, nisi khe jing lonsing laba mu thijao ma, jinthane khlai hibo hamsi ning lasisi jama se.

⁵ Odebani, jinis riyaba khe ri mani nisi hanggaiyaba khe, hamsisi ragao mani khlai hi, daphlungrao sagang phai da ma nangma se thihi ang lon du; odese nisi blai kha de, nisi jinis riyaba khe jaoba riba lai niya hi, nisi jar ning khaithiya hi riba se thihi hamsisi mithi ma.

⁶ Ebo khe nisi tharmai lah: Eleiyaba balam ha de, sere gijisa gai du, bo gijisa ra ma, sere gabang gai du, bo gabang ra ji ma se.

⁷ Khrip subungbo khaithi dada riya hi, bol jang bo riya hi, bonsi ni khah ha rima baoba lai ning khrip bo ri la thing. Khaja hi riyaba khe de Madai ning bo khe hamjao ma se.

⁸ Odese, khrip hamba jinis nisi bangdao hi dangphu mani khlai hi, jinis jamthar si ha risi dik dik nisi dongphu mani khlai hi, Madai de, khrip jadi khasaoma jang dihmuh baigo ba lai nisine bo ri ma se.

⁹ Bo ron phlung hi, dukhisarao ne bo ri kha, Boni dormo de jug jugbo nalai lai ning dongsong ma se,” thihi reb ba lai.

¹⁰ Gai mani bumuh riyaba ode nisine ji mani hon riyaba ning, nisi gai mani bumuh rihi, nisi ne bara ri nang, nisi ni dormo ni bathai khe nisine lab khlai rima se.

¹¹ Nisi khrip khaithiyaba ni khlai hi khrip jadi ha nisi gnang khlaijao nang. Jing khe yaowai hi nisi khaithiyaba ni Madai niha khajama thiyaba bathai thai ma se.

¹² Ebo naisoyaba nusoyaba khusi dang ba ha subung gatharrao nangyaba bo hor jroba se ning bo niya hi, Madai niha gabang khajama ni grao thiyaba khe limkhlai si mai du.

¹³ Ebo nisi dangyaba khusi jang Krista ni hamba graojma khe nisi ajao hi nisi ni manithai ja thing, bonsi ne khlai hi ode khrip gibin subung ne khlai hi nisi ni khaithiya thai khe phnu hi, ebo ning Madai ni muima ja ma se.

¹⁴ Nisi ni basao ha hamsi ning khasaoma dong bani, bonsibo nisi khe gabang wainso hi, nisi ne Madaibo bonsi bi ri du.

¹⁵ Bo thisophuya si jinis ri bani khlai hi Madai niha khajama ni grao dong thing.