2 KORINTH 8 - DARA GADAIN N.T. with PSA and PRO (BSI)

Lonyarao ne yaosandi rihi juruba

¹ Daphlungrao, Makedonia raji ni longjomrao ni bising ha Madai ni khasaoma rihi dongyaba khe nisi ne mithi ri ma ang nangjao du.

² Hamsi ning dukhu jahi nai naijao hi dongba ha, bonsi khajama ha gaphao khlai hi, bonsi hamsi ning khajama de khaithiyayaba gibi jang bonsi mai khali,

³ Bonsi blai ba lai lai ning bonsi blai ba thane bangdao hi ri ba thihi ang mithi phu du.

⁴ Bonsi bo subung gatharrao khe naisiba ha gaba pha mani khlai hi, bo nangjaoma khe bonsi hamsi ning ang khe khainsu ba.

⁵ Bo khebo jing asa jayayaba gede ha: bonsi jar ning Gabra niha sagang rida hi, boni yaohon hase Madai nangjaoba lai jini ha bonsi ri ba.

⁶ Olei riba de, boni sagang ha ning bonsi riba khe jen kha, nisi ni bising ha ebo khasaoma ni khusi khe, srap dang blai mani khlai hi Tita khe jing khainsu ba.

⁷ Khrip jinis ha, lonma ha ja thing, grao sainthiba ha ja thing, gyan ha ja thing, khah-muh ri ma nangyaba khrip ha ja thing, nisi ang khe hamjaoma ha ja thing, hamba khusi khe bara hi dangpha langba lai ning, khasaoma jang khusi dangyaba habo, hamdao hi khusi dangba bara pha lang mani khlai hi khah-muh ri lah.

⁸ Ebo grao riyaba khe ang thidaoba de niya, nisi ni hamjaoma khasaoma khe gibi ning thihi nai nai mani khlai hi jinis riyaba gede subung gibin buthu ni khah-muh rithai khe se ang thi ba.

⁹ Jini Gabra Jisi Krista ni hamjaoma khasaoma khe nisi tharmai kha, bo gnang jahibo nisi ni khlai hi dukhisa japhai ba, bede thikhala bo dukhisa jaba de nisi gnang ja mani khlai hi se.

¹⁰ Ebo grao ha nisi ne ang baothai ri du: bo de nisi ni khlai hi hamba se: minisi ni phrang se dangjenba niya hi, nisi dangma nangjao jenyaba se.

¹¹ Bo jenba ha nisi gajeb ba lai ning, nisi niha dongba lai ning khusi jang rihi, khah-muh rihi nisi duha sothar si khlai lah.

¹² Malai boni ha giri hibo boniha dongba lai khusi khaithiya hi rikha de bo khajama gnang se.

¹³ Subung gibin buthu khe lenggo rihi nisi khe bubain risi hor mani ang thiba niya, hor slai lai mani grao khe se ang thi ba.

¹⁴ Duha nisi gnang ja bani, bonsi baojo ba ha nisi baosi ronji lai ba; bonsibo gnang jaba bubli ha, nisi baojo ba ha bonsi nisi khe baosi ronji lai ma; odese, nisi saosi jang saosi baosi horpha lai ma thi.

¹⁵ Bo gabang khon thimyaba de bangdao jadaoya, bo gijisa khon thimyababo bangya jadao, thihi reb ba lai.

Tita jang boni lugurao

¹⁶ Nisi ni khlai hi khah-muh riyaba ani ha dongba lai, Tita ni khasu ha dengyaba Madai niha khajama dong thing.

¹⁷ Bo de jing khainsu ba ni niyahi, boni khah-muh gibi jang se, bo jarni nangjaoma ni grao jang nisi niha bo phai ba.

¹⁸ Bo jang baosi daphlung saosi haipha ha ba. Bokhe hamba graojma thi bani grao ha longjom sarao khrip jang hamsi ning bakhan khlai re.

¹⁹ Bo se ning niyahibo, Gabra ni muima ne khlai hi, khah-muh rihi ebo khasaoma ha khusi dangyaba khe, jing dangsaiyaba ha, jing mophosol thangpha mani khlai hi longjom sarao ning bonsi khe saikhoba se.

²⁰ Olei jasosi ning, subung buthu khaithiya hi bonsi rihi bojom khlaiyaba khe jing dibin sibin ha musibo malai thiphuya mani jing bao du.

²¹ Gabra ni sagang ha se ning majang ba niya hi, subung ni muh ha majang mane bo jing bao du.

²² Odehe, bonsi jang baosi jini daphlung khebo haiha ba se. Bobo khah-muh ri mani khrip jadi ni balam ha bo hamsi ning phnu kha, duha de, ning khe hamsi ning lon bani ar phai mani bo nangjaodao du.

²³ Tita de, ani lugu, nisi ni bising ha khusi ang jang dangphayaba se; jini daphlungrao bo, ebo longjomrao ni graodiyah buthu se, bonsi Krista ni muima se.

²⁴ Odebani, longjomrao ni hamjaoma khasaoma bangba khe bonsi nuhi, jing bakhan nisi khe khlaiyaba gibi jathai khe bonsi tharmai phu mani khlai hi, bonsi ni basao ha hamjaoma phnu ri lah.